Read cisena 2 MBIRI 3 Bible Online

2 MBIRI 3 - cisena bible

2 MBIRI 3

¹Mfumu Davite, babache Solomoni, akhadasankhula kale mbuto yakumangapo Nyumba ya Mulungu. Mbuto yache ikhali mu Yerusalemu paphiri ya Moria kule kudaonekera MBUYA kuna Davite, pambuto pale Arauna Myebusi akhaphatisapo basa ninga mbuwa ya tirigu. Mfumu Solomoni adaitoma basa ile

²pansiku yachiwiri ya mwezi wachiwiri wa chaka chachinayi iye mbali mfumu.

³Nyumba ya Mulungu idamanga Mfumu Solomoni ulaphiache ukhali makhono makumawiri na anomwe, umimbache ukhali makhono mafemba.

⁴Kukula kwa subi ya pamsuwo kukhali ninga umimba wa nyumbayo makhono khumi, pontho chengo chache chikhali makhono khumi. M'bwalo mwa nyumba mudaphophwa na golidi chadi-chadi.

⁵Mafufu a subi ikulu adaphophwa na mapembo amkungudza ale adaphophwa na golidi chadi-chadi mbathemeserapo na pithunzi-thunzi pya miti yamchindu na mangalade.

⁶Mfumu adathemesera m'nyumbamo na miyala yakubalika yakudula pontho na golidi wakuchita kugulwa kubulukira m'dziko ya Paravaimu.

⁷Iye adaphatisa basa golidi kuphopha mafufu a nyumbayo, mitandache ya pansoyi na ya pamsuwo, pontho na misuwo yache ene. M'mafufu adajembamo pyakulengwa pyakukhala na maphaphido.

⁸Subi ya m'bwaloletu, ile imbachemerwa Mbuto Yakuchenesesa, ulaphiache ukhali makhono mafemba, umimbache ukhali makhono mafemba, ule ukhali sasawa na umimba wa Nyumba yonseneyo. Golidi wakulemera makilogramu pikwi makumawiri adaphatiswa basa kuphopha mafufu a Mbuto Yakuchenesesa.

⁹Mapedego adasasanywa na golidi wakulemera magramu madzana mashanu na makumanomwe kada pedego. Mafufu a masubi a padzulu adaphophwa pontho na golidi.

¹⁰Mfumu adatonga amunache akhaphata basa ale kuti asasanye pyakulengwa piwiri pyakukhala na maphaphido pyasimbi, mbapikukutiza na golidi, na kupiikha m'Mbuto Yakuchenesesa.

¹¹Kweneko adapiimisa mwakuyang'ana kumsuwo, chibodzi kumabzere chinangocho kumadyo. Pyonsene pikhali na maphaphido awiri awiri. Phaphido ibodzi kulapha kwache kukhali makhono mawiri. Maphaphidowo adafuthulwa towera aphatane pakati pa subiyo, uku anangowa akhuye mafufu ku makhundu onsene awiri. Onsene pidafuthula iwo, ulaphiache udakwana makhono mafemba, kukwaniratu umimba onsene wa nyumbayo.

¹⁴Chinguwo chakutchinga nacho Mbuto Yakuchenesesa chidasasanywa na usalu wakufewa wakuikhwa tinta yachoza, msuzi wanyemba, na yakufira mbichilukwa mwakuchithemesera na pyakulengwa pyakukhala na maphaphido pile.

¹⁵Mfumu adasasanyisa nsanamira ziwiri, ibodzi ulaphiache ukhali makhono khumi na ashanu pontho na kati ya khono, mbaziikha kunkhope kwa nyumbayo. Mphanda zache chengo chache chikhali makhono mawiri kada mphanda.

¹⁶Padzulu pa nsanamirazo padathemeserwa na mangalade, pontho na ntheme zankuwa dzana.

¹⁷Nsanamirazo zidaikhwa pamsuwo wa nyumbayo. Nsanamira yakumwera adaithula Yakini,[4] inangombo yakumpoto adaithula Boazi.[5]