Read cisena 2 MBIRI 30 Bible Online

2 MBIRI 30 - cisena bible

2 MBIRI 30

¹Anthu hakhakwanisa tayu kusekera Phwando ya Paska pandzidzi wakuthema wa mwezi wakutoma, thangwi si anyansembe azinji akhali akuchena pamaso pa Mulungu, pontho si anthu azinji akhadagumanyikana mu Yerusalemu tayu. Natenepo Mfumu Hezekia, mathubu ache na anthu a mu Yerusalemu adaphatizana kuchita phwando yeneyi mwezi wachiwiri, tenepo mfumu adatumiza mphangwa kuna anthu onsene a mu Israele na Yuda. Iye adaonesesa kuti atumiza makalata kuna madzinza a Eferemu na Manase kuachemera ku Nyumba ya Mulungu mu Yerusalemu dzasekera Phwando ya Paska kulemedza MBUYA Mulungu wa Israele.

⁴Mfumu na anthu akhadakomerwa pyakwanga na pidanyerezera iwo kuchita pile.

⁵Tenepo iwo adachemeresa Aisraele onsene, kubulukira ku Dani kumpoto mpakana ku Beeresheba kumwera, kuti agumanyikane pabodzi pene mu Yerusalemu mwinji ukulu ene kupiringana pakutoma pale mbasekera Phwando ya Paska malingana na mwambo wache.

⁶Anyamphangwa adatumwa na mfumu pontho mathubu ache mbaenda ku Yuda konsene na Israele onsene na mphangwa zakulonga kuti: “Imwe Aisraele, mudapulumuka m'manja mwa Aasiria ale akhafuna kukunda dziko yathu. Natenepo zungunukani kuna MBUYA Mulungu wa Abrahamu, Isake na Yakobo, iye anabwerambo kuna imwe.

⁷Lekani khala ninga makolo anu na Aisraele anzanu ale akhali okhonda kukhulupirika kuna MBUYA Mulungu wawo. Imwe munakwanisa kuona mwekha ene kuti iye adaatchunyusa pikulu pene.

⁸Lekani umisa mtima ninga mudachitira iwo. Mbwenye verani MBUYA. Dzani ku Nyumba ya Mulungu mu Yerusalemu, ile MBUYA Mulungu wanu aichitisa kukhala yakuchena ndzidzi onsene mbamumpembedze, towera ukali wache wakugoswa ubuluke pana imwe.

⁹Ngakhala imwe munabwerera kuna MBUYA, tenepo ale adakwata abale anu ninga anyaperezo anaavera nsisi mbaatawirisa kubwerera kumusa kwawo. MBUYA Mulungu wanu ngwakukoma mtima pontho wansisi, tenepo ngakhala imwe munabwerera kuna iye, iyembo anati akutambireni.”

¹⁰Anyamphangwa ale adenda kumizinda yonsene m'nthemba za madzinza a Eferemu na Manase, pontho mpakana kumpoto kuna dzinza ya Zebuloni, mbwenye anthu adaaseka mbaasedegula.

¹¹Kwache pakhali anango akubulukira kuna madzinza a Asheri, Manase na Zebuloni ale akhapifuna kwenda ku Yerusalemu.

¹²Mulungu akhaphata basache mu Yuda mbachitisa anthu kukhala akuphatizana paphinga yawo kufuna kuvera pinafuna iye pakuteweza matongero a mfumu na mathubu ache.

¹³Mwinji ukulu wa anthu udagumanyikana mu Yerusalemu mwezi wachiwiri kuchita Phwando ya Mikate yakusowa chakufufumisira.

¹⁴Iwo adabulusa maguwa onsene ale akhadaphatiswa basa mu Yerusalemu kuperekerapo nsembe zakupyerera na kufukiza pyakununkhira kuna milungu mbapitaya m'phedi ya Kidroni.

¹⁵Tenepo pansiku yakhumi na chinayi ya mwezi, iwo adapha anabira kuti aperekwe nsembe pa Phwando ya Paska. Anyansembe na Alevi ale akhali okhonda chena pamaso pa MBUYA akhali na manyadzo pyakwanga mwakuti iwombo adapichenesa okha ene pamaso pa MBUYA, tenepo iwo adakwanisa kupereka nsembe zakupyerera m'Nyumba ya MBUYA.

¹⁶Iwo adakwata chidzo chikhali na iwo m'Nyumba ya MBUYA malingana na mwambo wa Mose, munthu wa Mulungu ule. Alevi adapereka chiropa cha nsembe kuna anyansembe, ale adachiwazira paguwa yansembe.

¹⁷Na thangwi yakuti anthu azinji akhali okhonda chena pamaso pa MBUYA, iwo mbadapha tayu mabira akuperekwa nsembe pa Phwando ya Paska, natenepo Alevi ndiye adaaphera mbapereka anabira ale m'manja mwa MBUYA.

¹⁸Kuthimiza penepo ale akhadadza kubulukira kumadzinza a Eferemu, Manase, Isakara na Zebuloni hakhadachita tayu mwambo wakupichenesa, natenepo iwo adadya na anthu Phwando ya Paska mwakuswa mwambo. Mfumu Hezekia adaapempherera mbati,

¹⁹“MBUYA Mulungu wa makolo athu, na udidi wanu lekererani pyakudawa pya anthu ambakupembedzani na mtima onsene ale, podi kwene kuti iwo ngokhonda chena pamaso panu.”

²⁰MBUYA adava kupemphera kwa Hezekia; iye adalekerera anthu ache mbakhonda kuakuwaza.

²¹Nsiku zinomwe anthu akhadagumanyikana mu Yerusalemu ale adasekera Phwando ya Mikate yakusowa chakufufumisira na kukomerwa kukulu, tenepo nsiku na nsiku Alevi na anyansembe adakuza MBUYA na mphamvu zawo zonsene.

²²Hezekia adapereka takhuta kuna Alevi, thangwi ya kupidziwisa kwawo kuchita mwambo wakupembedza MBUYA. Pidagwanda nsiku zinomwe zile zikhapereka iwo nsembe kukuza MBUYA Mulungu wa makolo awo,

²³onsene adaphatizana kusekera pontho nsiku zinango zinomwe. Natenepo iwo adasekera na kukomerwa.

²⁴Mfumu Hezekia adapereka ng'ombe zimuna chikwi, mabira pikwi pinomwe kuti anthu aphe mbadya, tenepo mathubu adaperekambo ng'ombe zimuna chikwi na mabira pikwi khumi. Anyansembe azinji adachita mwambo wakupichenesa nsiku yeneyo.

²⁵Natenepo munthu onsene adakomerwa; anthu a ku Yuda, anyansembe, Alevi, anthu akhadabulukira kumpoto ale, na alendo akhadakhazikika mu Israele na Yuda ale.

²⁶Mzinda onsene wa Yerusalemu udadzala na kukomerwa, thangwi pinthu ninga penepi chipo pidzati chitika tayu kutomera pansiku za Mfumu Solomoni mwana Davite.

²⁷Anyansembe na Alevi adapempha MBUYA kuti atsanzayise anthu. M'Nyumba mwache kudzulu Mulungu adava kupemphera kwawo mbaatawira.