Read cisena 2 MBIRI 31 Bible Online

2 MBIRI 31 - cisena bible

2 MBIRI 31

¹Pidamala phwando ile, anthu onsene Aisraele adenda kumaluwani onsene a Yuda mbagomola piguwa pyakupambulika, kugwisa adzimunthu a milungu Ashera mbagomola maguwa onsene ansembe na kuvunga mbuto zonsene zakupembedzerapo milungu. Adachita chibodzi-bodzi kuna nthemba zinango zonsene za Yuda, Benjemani, Eferemu na Manase; kubuluka penepo onsene adabwerera kumisa kwawo.

²Mfumu Hezekia adakhazikisa pontho gulu ya anyansembe na Alevi, ale kada gulu ikhali na basache. Mabasa enewa nkhuthimizapo kupereka nsembe zakupyerera na nsembe zachiphatizano, kukwata khundu pachipembedzo m'Nyumba ya Mulungu, kukuza na kupereka takhuta pambuto zakulekana lekana m'Nyumba ya MBUYA.

³Kubulukira pa mkumbi wa pifuyo pyache iye adapereka nyama kuti zikhale nsembe zakupyerera machibese onsene na mawulo onsene, pontho na zile zikhaperekwa pa Nsiku Yakupuma, pa Phwando yakusekera Kubalwa kwa mwezi na maphwando anango akusankhulika ale adathema kuchitika malingana na mwambo wa MBUYA.

⁴Kuthimiza penepo mfumu adapanga anthu a ku Yerusalemu kudza na pyakupereka kuna anyansembe na Alevi, pile pidathema iwo kutambira, towera ndzidzi wawo onsene apipereke kuna pinafuna mwambo wa MBUYA.

⁵Sindzidzi Aisraele nkhuva penepi, adadza na mitukwa ya mapira akutoma kutokota, vinyu, mafuta aolivi, uchi na pinango pya m'munda, mbadza pontho na chakhumi cha pyonsene pikhali na iwo.

⁶Anthu onsene akhakhala m'mizinda ya Yuda adadza na chakhumi cha ng'ombe zawo na mabira mbadza pontho na mitukwa izinji, ile idapambulira iwo kuna MBUYA Mulungu wawo, mbaimuluka.

⁷Mitukwa idatoma kudza pamwezi wachitatu mbithimiza kudza basi mpakana miyezi inango minayi.

⁸Mfumu Hezekia na mathubu ache pidaona iwo pinthu pikhadaperekwa pile, adakuza MBUYA mbakuza pontho anthu ache.

⁹Mfumu adalonga kuna anyansembe na Alevi pya mitukwa yeneyi,

¹⁰tenepo Azaria Nyansembe Wamkulu, chidzukulu cha Zadoki ule, adalonga kuna iye mbati, “Kutomera nsiku idatoma anthu kudza na mitukwa ku Nyumba ya Mulungu, pana pyakudya pyakukwanira, pinango mbapisala pontho. Ife tina pyonsene thangwi MBUYA atsanzayisa anthu ache.”

¹¹Mfumu adatonga kuti masubi akukoyeramo pinthu asasanywe m'Nyumba ya Mulungu.

¹²Tenepo iwo adaikhamo mitukwa na chakhumi chonsene kuti pikoyeke mwadidi. Iwo adaikha Mlevi unango dzinache Konania kukhala nyakuyang'anira penepyo mbaikha pontho mbaleache Shimei kukhala nyachiwiriache.

¹³Alevi khumi adapangwa kuphata basa pansi pa utongi wawo: Yehiele, Azazia, Nahati, Asahele, Yerimoti, Yozabadi, Eliele, Isimakia, Mahati na Benaia. Pyonsenepi pidachitwa pansi pa utongi wa Mfumu Hezekia na Azaria Nyansembe Wamkulu.

¹⁴Kore mwana Imina, Mlevi ule akhali nyakulondali wamkulu pa msuwo wa mpanda kumabulukiro dzuwa a Nyumba ya Mulungu, ndiye akhali mkadamu wakutambira mitukwa yakuperekwa kuna MBUYA na kuigawiza anthu.

¹⁵Kumizinda inango kukhakhala anyansembe kule, iye akhaphedzwa mwakukhulupirika na Alevi anango: Edeni, Miniamini, Yeshua, Shemaia, Amaria, na Shekania. Iwo adagawa pyakudya pile sasawa kuna Alevi anzawo malingana na basa ikhaphata iwo,

¹⁶nee malingana na mbumba ikhadabulukira iwo tayu. Iwo akhadapereka pinthu pile kuna amuna onsene akukwanisa pyaka makumatatu penu kupiringana penepo ale akhaphata basa nsiku na nsiku m'Nyumba ya Mulungu malingana na chidzo chawo.

¹⁷Anyansembe akhapaswa basa malingana na mabanjawo, Alevimbo akukwanisa pyaka makumawiri pyakubalwa, penu kupiringana penepo akhapaswa basa malingana na gulu yawo.

¹⁸Onsene akhadalembwa pabodzi pene na akazawo, anawo, na anango akhakoya iwo ale, thangwi pikhafunika kuti ndzidzi onsene akhale akusasanyika kuphata basawo yakupambulika.

¹⁹Anyansembe ale akhakhala m'mizinda idaperekwa kuna pidzukulu pya Aroni na mbuto zawo zene zakudyeserapo pifuyo, basawo ikhali yakugawa pyakudya pile kuna amuna onsene a m'mabanja a unyansembe pontho na kuna munthu onsene wakukhala nawo panyandandanda wa mabanja a Alevi.

²⁰Mu Yuda monsene, Mfumu Hezekia ndiye adachita pinthu pyakulungama pontho pyakukomera MBUYA Mulungu wache.

²¹Iye adapikwanisa thangwi pyonsene pidachita iye pa Nyumba ya Mulungu penu kuteweza mwambo kudachita iye, adapichita mwakukhulupirika pontho na mtima wakupipereka kuna Mulungu wache.