Read cisena 2 MBIRI 32 Bible Online

2 MBIRI 32 - cisena bible

2 MBIRI 32

¹Pidamala chitika penepi pandzidzi ule udatumikira Hezekia mwakukhulupirika, Senakeribu mfumu wa Asiria adachita nkhondo na Yuda. Iye adazungulira mizinda yakutchingwa na mpanda na anyankhondo ache mbatonga amunache kuti agomole mafufuwo towera apitemo.

²Pidapiona Hezekia kuti Senakeribu anafunambo pyakuchita naye nkhondo,

³iye pabodzi pene na mathubu ache adanyerezera pyakufunga mphuno za madzi kunja kwa mzinda, towera Aasiria aleke gumana madzi angafika chifupi na Yerusalemu. Mathubu ale adatsogolera mwinji ukulu mbafunga mphuno zonsene za madzi na mikulo ene ing'ono-ing'ono, towera paleke khalave madzi akwenda kunja kwa mzindawo.

⁵Mfumu adatchinjiriza mzinda ule mwamphamvu pakumanga pontho mpanda ukhadagomoka ule, kumanga nsanja padzulu pache, na kumanga pontho mafufu akunja. Iye adawangisa mbuto yakundendemezwa kukhundu yakumabulukiro dzuwa a mzinda wa Davite. Iye adasasanya pontho pida pizinji pya nkhondo na pyakugedera matswimo.

⁶Iye adasankhula akadamu a nkhondo pakati pa anthu mbaagumanyisa onsenewo pamaso pache pachintalo cha mzinda chifupi na msuwo wa mpanda mbaawangisa mtima na mafala awa:

⁷“Wangisani pontho wangani mtima! Lekani chita mantha penu kutaya mtima, thangwi ya mfumu wa Asiria na gulu yache ikulu ya nkhondoyi, podi kukhundu kwathu kuna mphamvu zikulu kupiringana kukhundu kwawo.

⁸Una iye ndi mkono wa munthu, mbwenye ana ife ndi MBUYA Mulungu wathu kutiphedza na kutimenyera nkhondo.” Natenepo anthu adawanga mtima na mafala adalonga Hezekia mfumu wa Yuda.

⁹Pidagwanda ndzidzi pang'ono mwenemo Senakeribu na anyankhondo ache akhali pa Lakishi, atumiza mphangwa izi kuna Hezekia na anthu a Yuda ale akhali na iye pabodzi mu Yerusalemu:

¹⁰“Ine Senakeribu mfumu wa Asiria ndikukuvunzani imwe anthu ninji chinakuwangisani mtima kuti muthimize kukhala mu Yerusalemu uku mwazungulirwa na anyankhondo?

¹¹Hezekia akukupangani kuti MBUYA Mulungu wanu anakupulumusani m'manja mwanga, kwache Hezekia akukunyengezani. Imwe munafa na nyota pontho njala.

¹²Iye ngule adavunga mbuto zakupembedzerapo milungu na maguwa ansembe a milungu yeneyi mbapanga anthu a ku Yuda na Yerusalemu kupembedza na kupyereza nsembe paguwa ibodzi ene basi.

¹³Ayi imwe nkhabe dziwa tayu pile pidachita makolo anga na ine kuna anthu a madzinza anango? Ayi ilipo milungu ya dzinza inango idapulumusa anthu awo m'manja mwa mfumu wa Asiria?

¹⁴Ndi lini mudapulumusa milungu yeneyo anthu a m'madziko enewo m'manja mwathu? Apo chinakuchitisani ninji kunyerezera kuti milungu yanu anakwanisa kukupulumusani kuna ife.

¹⁵Natenepo lekani tawirisa Hezekia kukunyengezani penu kukubausani. Lekani kumkhulupira! Nkhabe mulungu na mbodzi ene wa madzinza adapulumusa anthu ache m'manja mwanga penu mwa mfumu unango wa Asiria tayu. Natenepo milungu yeneyi nkhabe kwanisa kukupulumusani tayu!”

¹⁶Mathubu a ku Asiria adalongera MBUYA Mulungu pontho Hezekia, nyabasa wa MBUYA, pinthu pyakuipa pizinji.

¹⁷Kalata idalemba mfumu wa Asiria ikhali yakululupisa MBUYA Mulungu wa Israele. Iyo idalembwa kuti, “Milungu ya madzinza chipo hidzati pulumusa anthu awo m'manja mwanga tayu, natenepo mulungu wa Hezekia nkhabe pontho kwanisa kupulumusa anthu ache m'manja mwanga.”

¹⁸Mathubu ale adalonga penepi m'Chiheberi kufuna kuthuswa na kutayisa mtima anthu a mu Yerusalemu ale akhali pamafufu a mzinda, towera pikhale pyokhonda nensa kupokosera mzinda ule.

¹⁹Iwo adalonga pya Mulungu wa Yerusalemu m'njira yontho-yonthoyo ninga mumbalongera iye pya milungu ya madzinza anango, mifanikizo yakusasanywa na manja a anthu.

²⁰Tenepo Mfumu Hezekia na mprofeti Yesaya mwana Amozi adapemphera kuna Mulungu mbamulirira kuti aaphedze.

²¹MBUYA adatuma mngelo wache, ule adapha anyankhondo na akadamu a gulu ya nkhondo ya Aasiria. Natenepo mfumu adabwerera kwawo ku Asiria na manyadzo. Nsiku inango pikhali iye m'nyumba yakupembedzeramo milungu yache, anango mwa anache adampha na talasada.

²²Na njira yeneyi MBUYA adapulumusa Mfumu Hezekia na anthu a ku Yerusalemu m'manja mwa Senakeribu mfumu wa Asiria pontho m'manja mwa anyamalwawo onsene. Iye adachitisa kuti anthu akhale na mtendere[15] na madziko onsene achifupi na iwo.

²³Anthu azinji adadza ku Yerusalemu na pyakupereka pyawo kuna MBUYA pontho na mitukwa kuna Hezekia; natenepo kutomera penepo kwenda m'tsogolo madzinza anango onsene adapereka chilemedzo kuna Hezekia.

²⁴Pandzidzi wenewu Hezekia adadwala mbasala chifupi kufa. Iye adapemphera, tenepo MBUYA adampasa chidzindikiro chakuti iye anawanga.

²⁵Mbwenye Hezekia adatumbama pyakwanga mbakhonda kupereka takhuta thangwi ya kukoma mtima kudamuonesa MBUYA kule, natenepo ukali wa MBUYA ukhali pana Yuda na Yerusalemu.

²⁶Pakumalisira pache Hezekia na anthu ache adapichepesa okha ene, natenepo MBUYA hadaatchunyuse tayu kufikirana ndzidzi udafa Hezekia.

²⁷Mfumu Hezekia adafuma pyakwanga pontho munthu onsene akhamulemedza. Iye adamangisa masubi akukoyeramo golidi, siliva, miyala yakudula, pyakukomesera muliwo, pyakugedera matswimo, na pinthu pinango pyakufunika.

²⁸Kuthimiza penepo adamangisa pontho nyumba zakukoyeramo mapirache, vinyu na mafuta aolivi; mathanga a ng'ombe zache pontho na mabirache.

²⁹Padzulu pa penepi Mulungu adampasa mabira na ng'ombe zizinji pontho na mfuma inango yakuinjipa mwakuti iye adamanga mizinda mizinji.

³⁰Akhali Mfumu Hezekia ule adafunga mgelo wa madzi kubulukira kumphuno ya Gihoni mbapambusira kumadokero dzuwa a mzinda wa Davite. Pinthu pyonsene pidachita Hezekia pidamfambira mwadidi.

³¹Kwache pidadza aimiriri a dziko a ku Babiloni kudzavunza pya chidzindikiro chakudodomesa chidachitika m'dziko mule, Mulungu adatawirisa Hezekia kubauka kwenda njirachembo, towera kumuyesa na kudziwa pyonsene pikhali mumtima mwache.

³²Pyonsene pinango pidachita Mfumu Hezekia na kupipereka kwache kuna MBUYA pyalembwa m'bukhu yakulonga pya masomphenya a mprofeti Yesaya mwana Amozi na m'bukhu ya mbiri ya mafumu a Yuda na Israele.

³³Hezekia adagonera mkono mbaikhwa paphiri pale pana masiye a pidzukulu pya Davite. Anthu onsene a ku Yuda na Yerusalemu adamulemedza pikulu pamaliro pache. Manase mwanache adapita ufumu m'mbuto mwache.