Read cisena 2 MBIRI 33 Bible Online

2 MBIRI 33 - cisena bible

2 MBIRI 33

¹Manase akhali na pyaka khumi na piwiri pikhapita iye ufumu wa Yuda, tenepo adatonga mu Yerusalemu pyaka makumashanu na pishanu.

²Manase adadawa pamaso pa MBUYA pakuchita pyakunyansa pikhachita madzinza anango, ale adathamangiswa na MBUYA m'dzikomo ndzidzi ukhapita anthu ache mwenemo.

³Iye adasasanya pontho mbuto zakupembedzerapo milungu, zile zikhadavunga babache Hezekia. Iye adamanga maguwa ansembe akupembedzerapo milungu Baala. Iye adasasanya mfanikizo wa milungu Ashera, pontho adapembedza nyenyezi.

⁴Iye adamanga maguwa ansembe a milungu inango m'Nyumba ya Mulungu, pambuto pale padalonga MBUYA kuti penepo ndiye pathema iye kupembedzerwapo kwenda na kwenda.

⁵Mupintalo piwiri pya Nyumba ya Mulungu, iye adamangamo maguwa ansembe akupembedzerapo nyenyezi.

⁶Iye adapereka anache achimuna m'phedi ya Beni-Hinomu ninga nsembe yakupyerera. Iye akhachita pyaufiti na matsenga mbavunza nzeru kuna anyakuombedza na anyakukhumira. Iye adadawa pikulu pamaso pa MBUYA mbalamusa ukali wache.

⁷Iye adaikha mfanikizo m'Nyumba ya Mulungu, pambuto pale padalonga Mulungu kuna Davite na mwanache Solomoni kuti, “Muno mu Yerusalemu m'Nyumba yeneyi, ndi mbuto yasankhula ine pakati pa nthemba zonsene za madzinza khumi na mawiri a Israele kukhala mbuto ile yathema ine kupembedzerwapo.

⁸Tenepo ngakhala Aisraele anavera matongero anga onsene mbakoya Mwambo onsene udaapasa nyabasanga Mose ule, penepo ine nkhabe dzatawirisa tayu kuti iwo athamangiswe m'dziko idapereka ine kuna makolo awo ile.”

⁹Manase adatsogolera anthu a Yuda kuchita pyakuipa pikulu pene kupiringana pyakuipa pidachita madzinza ale akhadathamangiswa na MBUYA pikhapita Aisraele m'dzikomo.

¹⁰Podi kwene kuti MBUYA akhadacheuza Manase na anthu ache, iwo hadapivere tayu.

¹¹Natenepo MBUYA adatawirisa anyankhondo a Aasiria kupita mu Yuda. Iwo adaphata Manase, kumulasa na ngoloweko, kummanga na njema, mbaenda naye ku Babiloni.

¹²Na thangwi ya kusanyika kukhachita iye, iye adapichepesa, mbazungunukira kuna MBUYA Mulungu wache mbapempha Mulungu wa makolo ache kuti amphedze.

¹³Mulungu adava kupempha kwa Manase mbamtawirisa kubwerera mu Yerusalemu katonga pontho. Penepi pidamchitisa Manase kukhulupira mumtima mwache kuti MBUYA ndi Mulungu.

¹⁴Kubuluka penepo Manase adathimizira chengo cha mafufu akunja a mpanda kumabulukiro dzuwa a mzinda wa Davite, kubulukira kuphedi chifupi na mphuno za madzi a ku Gihoni kumpoto mpakana ku Msuwo wa Nsomba pontho na kuzungulira phiri ya Ofele. Iye adaikha pontho akadamu a nkhondo m'mizinda yonsene yakutchingwa na mpanda mu Yuda.

¹⁵Iye adabulusa m'Nyumba ya Mulungu milungu yachilendo na mifanikizo idaikha iye mwenemo, pontho na maguwawo ansembe ale akhali paphiri, pale pakhali Nyumba ya Mulungu pontho na mbuto zinango zonsene mu Yerusalemu; iye adakwata pinthu pyonsenepi kwenda napyo kunja kwa mzinda mbapitaya.

¹⁶Iye adasasanyisa pontho guwa yansembe pale pakhapembedzwa MBUYA, penepo iye adapereka nsembe zachiphatizano na nsembe zakupereka nazo takhuta. Iye adatonga anthu onsene mu Yuda kupembedza MBUYA Mulungu wa Israele.

¹⁷Podi kwene kuti anthu anango adathimiza kupereka nsembe pambuto zakupembedzerapo milungu, kwache akhazipereka kuna MBUYA yekha basi.

¹⁸Pinango pyonsene pidachita Manase, kupemphera kudachita iye kuna Mulungu, pontho na mphangwa za maprofeti ale adalonga kuna iye na dzina ya MBUYA Mulungu wa Israele, pyonsene pyalembwa m'bukhu ya mbiri ya mafumu a Israele.

¹⁹Kupemphera kwa mfumu na kumtawira kudachita Mulungu, pabodzi pene na pyakudawa pyonsene pidachita iye, kukhonda khulupirika kwache, mbuto zakupembedzerapo milungu na adzimunthu a milungu Ashera adasasanya iye, pontho na kupembedza mifanikizo kudachita iye, iye mbadzati kupileka; pyonsenene pyalembwa m'bukhu ya mbiri ya maprofeti.

²⁰Manase adagonera mkono mbaikhwa m'masiye a panyumbache yachifumu, tenepo Amoni mwanache adapita ufumu m'mbuto mwache.

²¹Amoni akhali na pyaka makumawiri na piwiri pidapita iye ufumu wa Yuda, mbatonga mu Yerusalemu pyaka piwiri.

²²Ninga mudachitirambo Manase babache, iye adadawa pamaso pa MBUYA mbapembedza mifanikizo ikhapembedzambo babache ile.

²³Kwache iye hadapichepese na kuzungunukira kuna MBUYA tayu ninga mudachitira babache. Iye akhali munthu wakudawika pyakwanga kupiringana babache.

²⁴Mathubu a Amoni adamsandukira mbamphera m'nyumba yachifumu.

²⁵Anthu a ku Yuda adaphambo amuna akhadapha mfumu ale, tenepo iwo adapitisa Yosia mwanache kukhala mfumu m'mbuto mwache.