Read cisena 2 MBIRI 34 Bible Online

2 MBIRI 34 - cisena bible

2 MBIRI 34

¹Yosia akhali na pyaka pisere pyakubalwa pikhapita iye ufumu wa Yuda mbatonga mu Yerusalemu pyaka makumatatu na chibodzi.

²Yosia adachita pinthu pyakukomera MBUYA; iye adateweza upangizi wa kholoache Mfumu Davite mbachita mphole-mphole kuvera matongero onsene a Mulungu.

³Chaka chachisere Yosia mbali mfumu, mwenemo iye mbali wamng'onoletu, Iye adatoma kupembedza Mulungu wa kholo ache Davite. Pidagwanda pyaka pinayi iye adatoma kuvunga mbuto zakupembedzerapo milungu inango, adzimunthu a milungu Ashera na mifanikizo inango.

⁴Na utongi wache amunache adagomola maguwa ansembe akupembedzerapo milungu Baala mbagwisa maguwa akufukizirapo pyakununkhira chifupi nawo. Iwo adapeya adzimunthu a milungu Ashera na mifanikizo inango ile, mbakaponya dothache ile panthumbi za anthu akhadapereka nsembe kuna iye ale.

⁵Iye adapisa magogodo a anyansembe pamaguwa pale pakhapembedza iwo milungu inango. Pakuchita penepi iye adachitisa Yuda na Yerusalemu kukhala wakuchena pontho pamaso pa Mulungu.

⁶Iye adachita chibodzi-bodzi kuna mizinda na nthemba zinango za Manase, Eferemu, Simioni mpakana kumpoto m'nthemba ya Nafitali.

⁷Muufumu onsene wakumpoto wa Israele iye adagomola maguwa onsene ansembe na adzimunthu onsene a Ashera mbapipeya, pontho adaswa m'mapindi-mapindi maguwa onsene akufukizirapo pyakununkhira. Kubuluka penepo adabwerera ku Yerusalemu.

⁸Chaka chakhumi na chisere Yosia mbali mfumu, pidamala iye chenesa dziko na Nyumba ya Mulungu pakumalisa chipembedzo cha milungu inango, iye adatuma anthu atatu kasasanya pontho Nyumba ya MBUYA Mulungu: Shafani mwana Azalia, Maaseia mkulu wa boma ya Yerusalemu na Yoa mwana Yoahazi, ule akhali nyakulemba pya m'dziko.

⁹Kobiri zile zikhadasonkhesa anyakulondali a Chilevi m'Nyumba ya Mulungu zidaperekwa kuna Hilikia Nyansembe Wamkulu. Kobirizo zidasonkheswa kubulukira kuna dzinza ya Eferemu, Manase na muufumu wakumpoto, pontho na madzinza a Yuda na Benjemani na anthu a mu Yerusalemu.

¹⁰Kubuluka penepo kobirizo zidaperekwa kuna amuna atatu, ale akhali anyakuyang'anira basa yakusasanya pontho Nyumba ya Mulungu; iwo adazipereka kuna

¹¹anyakupala matabwa na kuna amisiri akumanga nyumba kuti akagule miyala yakucheketeza kale na matabwa kuti piphatiswe basa kusasanya pontho nyumba, zile zidaleka mafumu a Yuda kuti zivunde pyazo.

¹²Amuna akhaphata basa yeneyi ale, akhali akukhulupirika pyakwanga. Iwo akhayang'anirwa na Alevi anayi: Yahati na Obadia a m'banja ya Merari, pontho Zekaria na Meshulamu a m'banja ya Kohati. Alevi onsene akhali achesa pakuimba.

¹³Alevi anango basawo ikhali kuyang'anira basa yakuthukulathukula, pontho na kuyang'anira anyakuphata mabasa akulekana lekana. Alevi anango akhali anyakulemba, mathubu na anyakulondali.

¹⁴Pikhabuluswa kobiri kubulukira m'subi yakukoyeramo pinthu m'Nyumba ya MBUYA, Hilikia adagumana bukhu ya mwambo wa MBUYA, mwambo ule udapereka Mulungu kudzera muna Mose.

¹⁵Iye adalonga kuna Shafani, nyakulemba m'thando ya miseru mbati, “M'Nyumba ya MBUYA ndagumanamo bukhu ya mwambo.” Iye adapereka bukhu ile kuna Shafani.

¹⁶Shafanimbo adaikwata mbaenda nayo kuna mfumu. Iye adalonga mbati, “Ife tachita pyonsene pyatipanga imwe.

¹⁷Ife takwata kobiri zile zikhadakoyiwa m'Nyumba ya MBUYA mbitizipereka kuna anyakuphata basa na anyakuayang'anirawo.”

¹⁸Tenepo iye adathimiza kulonga mbati, “Pano ndina bukhu yandipasa Hilikia.” Natenepo iye adaiwerenga mwakugaluza fala kuna mfumu.

¹⁹Pidava mfumu kuwerengwa kwa bukhu ile, adang'amba nguwo zache mwakutsukwala

²⁰mbalonga kuna Hilikia nyansembe, Ahikamu mwana Shafani, Abidoni mwana Mikaia, Shafani nyakulemba m'thando ya miseru, na Asaia nyakufiriviri mfumu mbati,

²¹“Ndokoni mukavunze nzeru kuna MBUYA m'mbuto mwanga pontho na anthu, ale asalira mu Israele na Yuda. Kavunzeni pya pifunziso pya bukhu yeneyi. MBUYA atizhangalira thangwi makolo athu hadavere tayu mafala a MBUYA, pontho hadachite tayu ninga munalongera bukhuyi kuti pyathema kuchitwa.”

²²Na kutongwa na mfumu, Hilikia na anango ale, adenda kavunza nzeru kuna mprofeti unango wachikazi dzinache Hulida, ule akhakhala kukhundu yachinchino ya Yerusalemu. Mamunache akhali Shalumu mwana Tikiva, mdzukuluache Harihasi, ule akhali nyakukoya mikhanjo ya m'Nyumba ya Mulungu. Iwo adampanga pyonsene pikhadachitika pile.

²³Tenepo Hulida adaapanga kuti abwerere kuna mfumu mbakampanga

²⁴mphangwa zakubulukira kuna MBUYA zakuti: “Ine ndinafuna nditchunyuse Yerusalemu pabodzi pene na anthu ache onsene pakuphatisa basa dzedze yalembwa m'bukhu, yawerengwa kuna mfumu ile.

²⁵Iwo andikhonda mbapereka nsembe kuna milungu inango, natenepo iwo alamusa ukali wanga na pinthu pyonsene pyachita iwo. Ukali wanga ukugaka pana Yerusalemu pontho nkhabe dzambombowa tayu.

²⁶Mbwenye kulonga pya mfumu, ine MBUYA Mulungu wa Israele ndikulonga kuti: Iwe udavera pyalembwa m'bukhumo,

²⁷mbuleka pyakudawa pyako, pontho udapichepesa wekha ene pamaso panga, kung'amba nguwo zako na kulira pidava iwe mule mudathuswira ine kutchunyusa Yerusalemu na anthu ache ene. Ine ndava kupemphera kwako,

²⁸tenepo kutchunyusa Yerusalemu kunafuna ine dzachita nee kunadza chinchino tayu kufikirana iwe ufe. Ine ndinakutawirisa kuti ufe na mtendere.” Amuna ale adabwerera kuna Mfumu Yosia na mphangwa zenezi.

²⁹Mfumu Yosia adachemeresa akadamu onsene a mu Yuda na Yerusalemu,

³⁰mbaenda onsene pabodzi pene ku Nyumba ya Mulungu mbatsagana na anyansembe, pontho Alevi, pabodzi pene na anthu anango onsene, anyakufuma na anyakutcherenga ene. Pamaso pa anthu onsene ale, mfumu adawerenga bukhu yonsene ya chiverano, ikhadagumanwa m'Nyumba ya Mulungu ile.

³¹Iye adaimira chifupi na mzati mbachita chiverano na MBUYA kuti anamvera, anateweza mwambo na matongero ache na mtimache onsene, na moyo wache onsene, pontho kuti anachita pinthu pinalongwa m'chiverano ninga mwalemberwa ipyo m'bukhumo.

³²Iye adachitisa anthu a dzinza ya Benjemani na anthu anango onsene ale akhali mu Yerusalemu kudumbira kuti anakoya chiveranocho. Natenepo anthu a mu Yerusalemu adavera pinthu pikhafunika pachiverano chidachita iwo na Mulungu wa makolo awo chile.

³³Mfumu Yosia adavunga mifanikizo yonsene yakunyansa ile ikhali m'dziko yonsene ya Israele. Pikhali Yosia na moyo anthu adathimiza kutumikira MBUYA, Mulungu wa makolo awo.