Read cisena 2 MBIRI 35 Bible Online

2 MBIRI 35 - cisena bible

2 MBIRI 35

¹Mfumu Yosia adasekera Phwando ya Paska mu Yerusalemu kulemedza nayo MBUYA; pansiku yakhumi na chinayi ya mwezi wakutoma adapha nyama kuchita nazo phwando ile.

²Iye adapereka basa idathema anyansembe kuiphata m'Nyumba ya MBUYA mbaawangisa mtima kuti aiphate mwadidi.

³Iye adalonga pontho kuna Alevi, afunzisi a Israele ale, akhadapipereka kuna MBUYA mbati, “Ikhani Bokosi ya Chiverano yakupambulikayo m'Nyumba ya MBUYA, ile idamangwa na Mfumu Solomoni mwana Davite. Imwe nkhabeve funika kuithukula kubuluka pambuto kwenda pambuto inango tayu, mbwenye mwathema kutumikira MBUYA Mulungu wanu na anthu ache Israele.

⁴Mupigawe mwekha ene m'magulu malingana na mabanjanu ninga montho mudapilembera Mfumu Davite pontho na mwanache Mfumu Solomoni.

⁵Khalani m'magulu-magulu pambuto yakuchena kuimirira Aisraele anzanu, okhonda khala anyansembe ale, malingana na magulu a mabanjawo. Gulu ibodzi ya Alevi kuimirirambo gulu ibodzi.

⁶Imwe mwathema kupha anabira na mbuzi kuchitira Phwando ya Paska. Natenepo picheneseni mwekha ene mbamusasanye nsembe, towera Aisraele anzanu atewezembo pinthu pidalonga MBUYA kudzera muna Mose.”

⁷Pa Phwando ya Paska, Mfumu Yosia adapereka pifuyo pyache; mabira, anabira na anambuzi ene pyakukwana pikwi makumatatu, pontho na ng'ombe zimuna pikwi pitatu kuti anthu adye.

⁸Mathubu ache adaperekambo mwakufuna kwawo kuna anthu, anyansembe na Alevi. Pontho akadamu ale akhayang'anira Nyumba ya Mulungu, Hilikia Nyansembe Wamkulu, Zekaria na Yehiele, adapereka kuna anyansembe anabira na mbuzi zakukwana pikwi piwiri na madzana matanthatu, pontho na ng'ombe zimuna madzana matatu kuti ziperekwe nsembe pansiku ya phwandoyo.

⁹Akadamu a Chilevi; Konania, Shemaia, na mbaleache Netanele, Hashabia, Yeiele na Yozabadi, adapereka anabira na mbuzi pikwi pishanu na ng'ombe zimuna madzana mashanu kuti Alevi azipereke nsembe.

¹⁰Pidamala sasanywa pinthu pyonsene pya phwandoyo, anyansembe na Alevi adakhala m'magulu mwawo ninga montho mudatongera mfumu.

¹¹Pidamala phiwa anabira na mbuzi, Alevi adazisuwa. Anyansembe adakwata chiropa chile mbachiwazira paguwa yansembe.

¹²Natenepo iwo adagawa nyama zile malingana na mabanjawo kuti ziperekwe nsembe yakupyerera, towera akwanise kuzipereka mwakuteweza mwambo wa Mose.

¹³Alevi adaotcha nsembe za paphwando ile pamoto malingana na mwambo wache mbatereka m'chikalango, m'supulia, na m'piwaya pyakupereka pyakupambulika pile, mbachimbiza kupigawiza kuna anthu onsene penepo.

¹⁴Kubuluka penepo iwo adapisasanyira okha ene pyakudya pyawo na pya anyansembe ene, thangwi pandzidzi wenewo anyansembe pidzukulu pya Aroni akhapereka nsembe zakupyerera na khundu ya mafuta kufikirana mosiku. Natenepo Alevi adasasanya pyakudya pyawo na pya anyansembe ene, pidzukulu pya Aroni.

¹⁵Anyakuimba nyimbo pidzukulu pya Asafu, akhali pambuto zile zidapaswa iwo na Davite: Asafu, Hemani na Yedutuni, mprofeti wa mfumu. Anyakulondali m'misuwo hadabulukemo tayu, thangwi Alevi anzawo adaasasanyira pyakudya pile.

¹⁶Natenepo pandzidzi wenewo basa yonsene ya MBUYA, kuchita Phwando ya Paska na kupereka paguwa ya MBUYA nsembe zakupyerera, idachitika ninga montho mukhadatongera Mfumu Yosia.

¹⁷Nsiku zinomwe anthu onsene a Israele akhali penepo ale, adasekera Phwando ya Paska na Phwando ya Mikate yakusowa chakufufumisira.

¹⁸Kutomera nsiku zikhali mprofeti Samuele na moyo, chipo Phwando ya Paska hidzati yachitika ninga tenepo tayu. Nkhabe mbodzi wa mafumu akhadachitisa Phwando ya Paska ninga ile idachita Mfumu Yosia, anyansembe, Alevi, na anthu a ku Yuda, Israele na Yerusalemu.

¹⁹Phwando yeneyi idachitika chaka chakhumi na chisere cha ufumu wa Yosia.

²⁰Pidamala Mfumu Yosia kuchita pyonsenepi pa Nyumba ya Mulungu, Mfumu Neko wa ku Iguputo adatsogolera anyankhondo ache kamenyana na Karikemishi pamkulo wa Yufurate. Kwache Yosia adayesa kuakhondesa,

²¹mbwenye Mfumu Neko adatumiza mphangwa kuna Yosia mbati, “Nkhondo inachita ineyi nkhabe tayu pinthu na iwe Yosia mfumu wa Yuda. Ine sidadze dzamenyana na iwe tayu, mbwenye na anyamalwanga, pontho Mulungu andipanga kuti ndichimbize. Mulungu ali kukhundu kwanga. Natenepo leka kundikhondesa gopesera iye anakuvunga.”

²²Mbwenye Yosia adachita phinga kuti amenyane naye. Iye adakhonda kuva pile pidalonga Mulungu kudzera muna Mfumu Neko, natenepo iye adapizimbaisa yekha ene mbakamenya nawo nkhondo paphedi ya Megido.

²³Ndzidzi wa nkhondo ule, Mfumu Yosia adalaswa na matswimo a Aiguputo. Iye adatonga nyabasache mbati, “Ndibuluse; ine ndakuwazwa pyakwanga!”

²⁴Iwo adamthukula kumbulusa m'chingolo mwache mbakamuikha pachingolo chachiwiri chikhali na iye penepo chile mbaenda naye ku Yerusalemu. Kweneko iye adafa mbaikhwa m'masiye achifumu. Anthu onsene a ku Yuda na Yerusalemu adasintili thangwi ya imfache.

²⁵Mprofeti Yeremia adaipeka nyimbo ya maliro thangwi ya Mfumu Yosia. Lero wasanduka ninga nsambo wawo ene mu Israele kuna anyakuimba nyimbo amuna na akazi ene kuphatisa basa nyimbo yeneyi kusintili Mfumu Yosia. Nyimbo yeneyi ili m'bukhu ya nyimbo ya maliro.

²⁶Pyonsene pidachita Yosia, kupipereka kwache kuna MBUYA, kuvera kwache mwambo,

²⁷na mbiri yache kutomera pakutoma mpakana kumamalisiro; pyonsene pyalembwa m'bukhu ya mbiri ya mafumu a Israele na Yuda.