Read cisena 2 MBIRI 36 Bible Online

2 MBIRI 36 - cisena bible

2 MBIRI 36

¹Anthu a ku Yuda adasankhula Yoahazi mwana Yosia mbamdzoza ufumu mu Yerusalemu.

²Yoahazi akhali na pyaka makumawiri na pitatu pidapita iye ufumu wa Yuda. Tenepo iye adatonga mu Yerusalemu miyezi mitatu.

³Neko mfumu wa Iguputo adamkwata ninga nyaperezo mbachitisa Yuda kupagali siliva wakukwana makilogramu pikwi pitatu na madzana manayi pontho na golidi wakukwana makilogramu makumatatu na manayi ninga msonkho.

⁴Mfumu Neko adaikha Eliakimu mbaleache Yoahazi kupita ufumu wa Yuda mbamtchandula kukhala Yehoiakimu. Yoahazi adakwatwa na Mfumu Neko kwenda ku Iguputo.

⁵Yehoiakimu akhali na pyaka makumawiri na pishanu pidapita iye ufumu wa Yuda mbatonga mu Yerusalemu pyaka khumi na chibodzi. Iye adachita pyakuipa pamaso pa MBUYA Mulungu wache.

⁶Mfumu Nebukadinezara wa ku Babiloni adenda ku Yuda kachita nkhondo, mbaphata Yehoiakimu mbaenda naye ninga nyaperezo ku Babiloni.

⁷Mfumu Nebukadinezara adakwata mfuma inango ya m'Nyumba ya Mulungu, mbakaiikha m'nyumbache yachifumu mu Babiloni.

⁸Kulonga pya pinthu pinango pyonsene pidachitika Yehoiakimu mbali mfumu wa Yuda na pinthu pyakunyansa na pyakuipa pidachita iye pyalembwa m'bukhu ya mbiri ya mafumu a Yuda. Yehoiakini mwanache adapita ufumu m'mbuto mwache.

⁹Yehoiakini akhali na pyaka khumi na pisere pyakubalwa pikhapita iye ufumu wa Yuda mbatonga mu Yerusalemu miyezi mitatu na nsiku khumi. Iye adachita pyakuipa pamaso pa MBUYA.

¹⁰Ndzidzi wakuphwitha miti Mfumu Nebukadinezara mbali mfumu adakwata Yehoiakini kukhala nyaperezo ku Babiloni mbapokosera mfuma yonsene ya m'Nyumba ya MBUYA. Tenepo Nebukadinezara adachitisa Zedekia, mbuyache[16] Yehoiakini, kukhala mfumu wa Yuda na Yerusalemu.

¹¹Zedekia akhali na pyaka makumawiri na chibodzi pikhapita iye ufumu wa Yuda mbatonga mu Yerusalemu pyaka khumi na chibodzi.

¹²Iye adachita pyakuipa pamaso pa MBUYA, pontho adakhonda kupichepesa yekha ene kuvesera mprofeti Yeremia, ule adalonga mafala a MBUYA.

¹³Mfumu Zedekia adapandukira Mfumu Nebukadinezara, ule adamchitisa kudumbira na dzina ya MBUYA kukhala wakukhulupirika kuna iye. Iye adakhala wakuuma mtima mbakhonda zungunukira kuna MBUYA Mulungu wa Israele.

¹⁴Kuthimizapo akadamu a Yuda na anyansembe na anthu onsene adatewera pyakudawika pya madzinza akuazungulira ale, pakupembedza mifanikizo, natenepo adaswipisa Nyumba ya MBUYA, ile idapipambulira MBUYA mu Yerusalemu.

¹⁵MBUYA Mulungu wa makolo awo adathimiza kuatumizira maprofeti kucheuza anthu ache, thangwi iye akhavera nsisi anthu ache na Nyumba ya MBUYA.

¹⁶Mbwenye iwo adaseka anyamphangwa a Mulungu, pontho adalulupisa mafalache mbasedegula maprofeti ache mwakuti iwo adalamusa ukali wa MBUYA mbachimwana kuuthawa.

¹⁷Natenepo MBUYA adadzesa mfumu wa ku Babiloni dzaasosa. Mfumu adapha aphale awo na talasada m'Nyumba ya MBUYA. Iye hadavere nsisi na mbodzi ene tayu, mphale penu nkhalamba, mkazi penu mamuna, mtenda penu wakuwanga. Mulungu adaapereka onsene m'manja mwache.

¹⁸Mfumu wa ku Babiloni adapokosera pinthu pyonsene pya m'Nyumba ya Mulungu, mfuma ya m'Nyumbamo, pontho na mfuma yonsene ya mfumu na mathubu ache, pontho adakwata pyonsene mbaenda napyo ku Babiloni.

¹⁹Iye adapisa Nyumba ya Mulungu na mzinda ule, pabodzi pene na nyumba zache zonsene zachifumu na mfumache ene mbagwisa mpanda wa mzindawo.

²⁰Onsene adasalira na moyo ale adaakwata kwenda nawo ku Babiloni. Kweneko iwo adatumikira mfumu na pidzukulu pyache ninga mabitchu kufikirana mfumu wa adasanduka wamphamvu pyakwanga.

²¹Natenepo pile pidalonga MBUYA kudzera muna mprofeti Yeremia pidakwana-kwana kuti: “Dziko inasanduka madembe pyaka makumanomwe, towera akwichize Nsiku Zakupuma zidakhonda anthu kuziteweza zile.”

²²Chaka chakutoma cha Kirusi mfumu wa ku Peresia, MBUYA adachitisa kukwana-kwana pinthu pidalonga iye kudzera muna mprofeti Yeremia. MBUYA adachitisa Kirusi kuti apereke matongero ali m'tchindewa mwakuchita kualemba mbaatumiza kuna anthu kuti awerengwe mwakugaluza fala konsene kwene muufumu wache:

²³“Ufu ngutongi wa Kirusi mfumu wa ku Peresia. MBUYA Mulungu wa kudzulu andichitisa kukhala mfumu wa dziko yonsene yapansi, pontho iye andipasa basa kuti ndimmangire nyumba mu Yerusalemu m'nthemba ya Yuda. Natenepo imwe monsene, ale ndimwe anthu a Mulungu, ndokoni kweneko pontho MBUYA Mulungu wanu mbakhale namwe.”