Read cisena 2 MBIRI 4 Bible Online

2 MBIRI 4 - cisena bible

2 MBIRI 4

¹Mfumu Solomoni akhadasasanyisa guwa yansembe yankuwa, ile ulaphiache na umimbache ikhali sasawa makhono mafemba, pontho chengo chache chikhali makhono manayi na kati ya khono.

²Iye adasasanya pontho phiso ikulu yankuwa yakukoyeramo madzi. Kuzwika kwache kukhali makhono mawiri na dzanja ibodzi; milomo yache ikhali makhono manayi; manungo ache akhali makhono khumi na matatu na dzanja ibodzi.

³Kuzungulira minenwa ya phisoyo kunsi adaikhako mizere miwiri yakuthemesera yakuchita kusanjikizana. Pyakuthemeserapyo pikhaoneka ninga ng'ombe zimuna, zile zikhadaumbirwa kubodzi kwene na phiso ikuluyo.

⁴Phisoyo adaithikitiza pamsana pa ng'ombe zimuna zankuwa khumi na ziwiri, zitatu kuyang'ana kumpoto, zitatu kuyang'ana kumadokero dzuwa, zitatu kuyang'ana kumwera, pontho zitatu kuyang'ana kumabulukiro dzuwa.

⁵Ntchindu ya phiso ikuluyo ikhali ninga pyala pinayi. Milomo yache ikhali ninga milomo ya khomitcho, yakufuthukira kunja ninga masamba a maluwa a m'madzi. Chinthu chenechi chikhakoya madzi akukwana nkhali pikwi pitatu.[6]

⁶Iwo adasasanya pontho pyakusambiramo khumi, pishanu adapiikha kumwera, pinango pishanu adapiikha kumpoto kwa Nyumba ya Mulungu. Penepi basache ikhali kutsukira makhundu anango a nyama ale akhadaperekwa kukhala nsembe yakupyerera. Madzi akhali m'phiso ikulu ale akhali a anyansembe kuti aaphatise basa angafuna kusamba.

⁷Iwo adasasanya pyakuikhirapo nyale khumi pyagolidi malingana na msasanyiro wache, mbapiikha m'Nyumba ya Mulungu pishanu kukhundu yakumwera, pinango pishanu kumpoto.

⁸Iwo adasasanya mathebulu khumi mbaaikha m'Nyumba ya Mulungu mashanu kukhundu yakumwera, anango mashanu kumpoto. Iwo adasasanya pontho ndilo dzana zagolidi zakuwazira chiropa.

⁹Iwo adasasanya chintalo cha m'bwalo cha anyansembe, pontho na chintalo cha kunja. Misuwo ya pintalo pidakhwazwa na nkuwa.

¹⁰Phiso ikulu ile idaikhwa chifupi na nkhomo ya Nyumba ya Mulungu kumwera kumabulukiro dzuwa.

¹¹Huramu-Abi adasasanya pontho pikalango, mafosholo, na ndilo. Iye adamalisa kusasanya pinthu pyonsene pidadumbira iye kuna Mfumu Solomoni kuti anapisasanya pa Nyumba ya Mulungu pile: Nsanamira ziwiri Mphanda ziwiri zakukhala ninga ndilo padzulu pa nsanamira. Pyakuthemesera piwiri pyakuoneka ninga mangalade pamphanda ziwiri; Pyakuthemesera pyakuoneka ninga ntheme madzana manayi, kuikha madzana mawiri m'mizera miwiri kada mphanda ibodzi padzulu pa mangalade; Pigudumu khumi Pyakusambiramo khumi Phiso ikulu yakukoyeramo madzi Ng'ombe zimuna khumi na ziwiri padakhazikwa phiso ikulu pale Pikalango, mafosholo na pyakujobolera nyama. Huramu misiri wamkulu adasasanya pinthu pyonsenepi[7] na nkuwa wakuyetimira ninga montho mukhadapitongera Mfumu Solomoni, towera piphatiswe basa pa Nyumba ya Mulungu.

¹⁷Mfumu adasasanyisa pyonsenepi pakunyungulusa nkuwa mbapiikha m'pikombole pya dongo m'phedi ya Yorodani pakati pa Sukoti na Zaretani.

¹⁸Pinthu pizinji pidasasanywa mwakuti nkhabe munthu adakwanisa kudziwa kulemera kwa nkuwa udaphatiswa basa ule tayu.

¹⁹Mfumu Solomoni adasasanya pinthu pyonsene pyagolidi pya m'Nyumba ya Mulungu: guwa yansembe, thebulu yakuikhirapo mikate yakuperekwa kuna Mulungu,

²⁰pyakuikhirapo nyale na nyale zache zagolidi chadi-chadi, zile zidathema kugaka patsogolo pa Mbuto Yakuchenesesa malingana na mule mudapangirwa iye:

²¹pyakuthemesera pya maluwa, nyale na mbano zagolidi,

²²pyakukwizira tsakala ya nyale, ndilo na piwaya pyakufukizira pyakununkhira, pontho piwaya pyakupalira moto. Pyonsenepi pidasasanywa na golidi chadi-chadi. Misuwo ya kunja ya Nyumba ya Mulungu na misuwo ya ku Mbuto Yakuchenesesa pidakukutizwa na golidi.