Read cisena 2 MBIRI 5 Bible Online

2 MBIRI 5 - cisena bible

2 MBIRI 5

¹Pidamalisa Mfumu Solomoni basa yonsene ya pa Nyumba ya Mulungu, adaikha m'masubi akukoyeramo pinthu pya m'Nyumba ya Mulungu, pinthu pyonsene pidapambulira babache Davite kuna MBUYA; siliva, golidi na pyombo pinango.

²Kubuluka penepo Mfumu Solomoni adachemeresa akadamu onsene a Israele, akadamu a madzinza na a mabanja onsene kuti agumanyikane mu Yerusalemu, towera akakwate Bokosi ya Chiverano ya MBUYA kubulukira ku Zioni, mzinda wa Davite, kudza nayo ku Nyumba ya Mulungu.

³Aisraele onsene adagumanyikana pabodzi pene ndzidzi wa Phwando ya Misasa mwezi wachinomwe.

⁴Pidagumanyikana akadamu onsene a Aisraele, tenepo Alevi adathukula Bokosi ya Chiverano

⁵mbadza nayo ku Nyumba ya Mulungu. Anyansembe na Alevi adathukula pontho Chikhumbi cha MBUYA pabodzi pene na pyombo pyonsene kwenda napyo ku Nyumba ya Mulungu.

⁶Mfumu Solomoni pabodzi pene na Aisraele onsene adagumanyikana patsogolo pa Bokosi ya Chiverano mbapereka nsembe mabira na ng'ombe zizinji zene zokhonda lengeseka.

⁷Kubuluka penepo anyansembe adapitisa Bokosi ya Chiverano ile m'Nyumba ya Mulungu mbakaiikha m'Mbuto Yakuchenesesa pansi pa pyakulengwa pyakukhala na maphaphido.

⁸Maphaphido awo akufuthuka ale, adaphimbira Bokosiyo na miti yache yakuthukulira.

⁹Miti ile ikhali yakulapha pyakwanga mwakuti nkhomo zache zikhakwanisa kuoniwa na m'Mbuto Yakuchenesesa patsogolo pa mbuto yakuchena ile, kwache nee zikhakwanisa kuoniwa na kunja kwa Mbuto Yakuchenesesa tayu; mitiyo na lero ili ponthopo.

¹⁰M'bwalo mwa Bokosi ya Chiverano ile, mukhali nkhabe chinthu na chibodzi chene tayu kupambula miyala miwiri padalembwa matongero pale, ile idaikha Mose paphiri ya Sinai ndzidzi udachita MBUYA chiverano na Aisraele pidabuluka iwo m'dziko ya Iguputo.

¹¹Anyansembe onsene akhadafika penepowo nee kuwerengera kuti akhali wa m'gulu yanji tayu, onsene adapichenesa okha ene. Natenepo anyakuimba nyimbo onsene a Chilevi; Asafu, Hemani, Yedutuni na onsene a m'mabanja mwawo, adavala nguwo zakuchena zakufewa. Alevi adaimira kumabulukiro dzuwa chifupi na guwa yansembe uku akhali na nkhotcho na anyakatangale, pontho pabodzi pene na iwo pakhali anyansembe dzana na makumawiri ale akhaliza ngoma. Anyakuimba nyimbo ale akhatawirizana mwadidi mwene pakuphatisa basa ngoma, nkhotcho na pyakuimbira pinango pikhapembedza iwo MBUYA pakuimba kuti: “Kuzani MBUYA thangwi iye ngwadidi, pontho kutifuna kwache nkhokhonda mala.” Pikhabuluka anyansembe ale pa Nyumba ya Mulungu mwakututumusa makole akuyetimira na demelero ya MBUYA adadzala m'Nyumbamo, tenepo iwo hadathimize pontho tayu kuchita chipembedzo chikhachita iwocho.