Read cisena 2 MBIRI 6 Bible Online

2 MBIRI 6 - cisena bible

2 MBIRI 6

¹Kubuluka penepo Mfumu Solomoni adapemphera mbati, “MBUYA imwe mwasankhula kukhala m'makole na mumdima.

²Lero ndakumangirani Nyumba yademelero, mbuto yanu kuti mukhalemo kwenda na kwenda.”

³Aisraele onsene mbali chiliri-chiliri penepo, Mfumu adazungunukira kuna iwo mbapempha Mulungu kuti aatsanzayise.

⁴Iye adalonga mbati, “Mbakuzwe MBUYA, Mulungu wa Israele! MBUYA akoya pidadumbira iye kuna babanga Davite pidalonga iye kuna iye kuti,

⁵‘Kutomera ndzidzi udabulusa ine anthu anga m'dziko ya Iguputo kufikirana lero, ine sidasankhule mzinda na ubodzi ene tayu m'dziko ya Israele kuti ikhale mbuto yakumangapo Nyumba towera ine ndipembedzerwemo, pontho ine sidasankhule munthu na mbodzi ene tayu kuti atsogolere anthu anga Aisraele.

⁶Mbwenye lero ndasankhula Yerusalemu kuti ikhale mbuto inafuna ine kupembedzerwapo ile, pontho ndasankhula iwe, Davite kukhala mtongi wa anthu anga.’ ”

⁷Solomoni adathimiza kulonga mbati, “Babanga Davite akhali na chipapu kufuna kumanga nyumba kuti MBUYA Mulungu wa Israele apembedzwemo.

⁸Mbwenye MBUYA adalonga kuna iye mbati, ‘Ande, mphyadidi kuti iwe udanyerezera pyakundimangira nyumba,

⁹kwache anafuna kundimangira nyumbayo si iwe tayu, mbwenye mwanako ule ndi manungo ako pontho chiropa chako, ndiye anati andimangire nyumba.’

¹⁰“Chinchino MBUYA achita pidadumbira iye pile: Ine ndapita m'mbuto mwa babanga ninga mfumu wa Israele, pontho ndamanga nyumba yakupembedzerwamo MBUYA Mulungu wa Israele.

¹¹Bokosi ya Chiverano ndaiikha m'Nyumba ya Mulungu. Tenepo m'Bokosimo muna pyakulemberapo piwiri pyamiyala, chiverano chidachita MBUYA na Aisraele chile.”

¹²Kubuluka penepo Solomoni adaimira patsogolo paguwa yansembe pamaso pa anthu mbakwiza manjache m'dzulu kupemphera.

¹³Solomoni akhadasasanyisa chiguwa chankuwa mbachiikha kati na kati pa chintalo. Makhundu onsene akhali sasawa, ulaphiache ukhali makhono mawiri, chengo chache chikhali khono ibodzi na kati ya khono. Iye adakwira pachiguwa pale mbagodama pambuto yakukwanisa kuoniwa na munthu onsene, tenepo iye adakwiza manjache m'dzulu.

¹⁴Iye adapemphera mbati, “MBUYA Mulungu wa Israele, nkhabe mulungu unango ninga imwe kudzulu penu padziko yapansi ponsene. Imwe mumbachita kuna anthu anu pinthu pimbadumbira imwe mbamuonesa kuafuna kwanu iwo angathimiza kuchita pinafuna imwe na mtima onsene.

¹⁵Imwe mwachita pidadumbira imwe kuna babanga Davite; lero mafalanu onsene akwana-kwana.

¹⁶Natenepo MBUYA Mulungu wa Israele, chitani pidadumbira imwe kuna babanga pidampanga imwe kutikuti ndzidzi onsene mbodzi wa pidzukulu pyache anatonga ufumu wa Israele, ngakhala iwo anachita mphole-mphole kuvera Mwambo wanu ninga mudachitirambo iye.

¹⁷Natenepo MBUYA Mulungu wa Israele, chitisani pyonsene pidadumbira imwe kuna nyabasanu Davite kukwana-kwana.

¹⁸“Ayi imwe Mulungu nkhukhaladi pansi pano na anthu? Podi na kudzulu kwene nkhabe mbuto yakukwana imwe tayu. Apo ndi tani na nyumba ing'ono yakumangirani ineyi!

¹⁹MBUYA Mulungu wanga, ine ndine nyabasanu. Veserani kupemphera kwanga mbamundichitire pinthu pinakupemphani ine leropi.

²⁰Yang'anirani Nyumbayi mosiku na masikati. Imwe mudadumbira kuti penepa ndiye panafuna imwe kupembedzerwepo, tenepo ndivesereni pinapemphera ine mwakuyang'ana Nyumbayi.

²¹Vani kupemphera kwa nyabasanu na kwa anthu anu Israele pinapemphera iwo kuyang'ana nyumba yeneyi. Kudzulu kumbakhala imweko tivesereni mbamutilekerere.

²²“Munthu angadawira tsanthembache mbapafunika kudumbira kuti iye hadadawe tayu, tenepo iye angadza patsogolo pa guwanu yansembe m'Nyumba mwanu muno kudumbira,

²³MBUYA, mvesereni kudzuluko mbamuchitapo pinthu. Nyakudawayo mbatchunyuswe malingana na pinthu pyachita iye, pontho nyakukhonda dawayo mulongeni kuti iye hadadawe tayu.

²⁴“Anthu anu Aisraele angakundwa kunkhondo na anyamalwawo thangwi yakukudawirani, iwo mbabwerera kuna imwe mbatawira na mulomo wawo kuti ndiwe Mulungu wawo mbapemphera kuna imwe m'Nyumba mwanu muno,

²⁵avesereni kudzuluko mbamulekerera pyakudawa pya anthu anu Aisraele mbamuabwezere kudziko idapereka imwe kuna iwo na makolo awo ile.

²⁶“Ngakhala kudzulu kunafungika mbakukhonda kuvumbisa mvula thangwi anthu anu akudawirani, tenepo iwo angapemphera mwakuyang'ana Nyumbayi mbatawira na mulomo wawo kuti ndimwe Mulungu wawo mbaleka pyakudawa pyawo na thangwi yakuti mwaatchunyusa,

²⁷MBUYA, avesereni kudzuluko mbamulekerera pyakudawa pya anyabasanu anthu anu Aisraele, pontho afunziseni makhaliro akulungama. Tenepo MBUYA, vumbisani mvula m'dziko mwanu, idapasa imwe anthu anu kuti ikhale yawo ene ile.

²⁸“Ngakhala m'dziko munagwa njala penu muliri, penu mbewu zavungika na mphepo penu na nyadzombe, penu anthu anu anasoswa na anyamalwa awo, penu pakati pawo pagwa muliri penu utenda wa mtundu onsene,

²⁹veserani kupempha kwawo. Ngakhala munthu unango ene wa Aisraele anadzidzwa mumtima mwache na penepi, iye mbakwiza manjache m'dzulu kupemphera mwakuyang'ana Nyumbayi,

³⁰vani kupemphera kwawo. Avesereni kudzuluko kumbuto kumbakhala imwe. Lekererani pyakudawa pyawo mbamuaphedze. Podi ndimwe ene basi ule ambadziwa pyamumtima mwa munthu, tenepo chitani kuna munthu onsene mwakuthemerana na pinthu pyaphata iye,

³¹towera anthu anu akugopeni ndzidzi onsene unakhala iwo m'dziko idapereka imwe kuna makolo athu ile.

³²“Ngakhala mlendo pyache wakukhala kudziko yakutali anava pya ukulu wanu pontho mphamvu zanu, pontho kusasanyika kumbachita imwe ndzidzi onsene kuchita pinthu, anadza mbapemphera mwakuyang'ana Nyumbayi,

³³mvesereni kupemphera kwache. Kudzulu kumbuto kunakhala imweko, mvesereni mbamuchite pinakupemphani iyepyo, towera madzinza onsene a padziko yapansi akudziweni mbakuverani, ninga mumbachitira anthu anu Aisraele. Penepo iwo anadziwa kuti Nyumba yakumangirani ineyi ndi mbuto yathema imwe kupembedzerwamo.

³⁴“Ngakhala anthu anu aenda kunkhondo kamenyana na anyamalwawo konsene kwene kunaatuma imweko mbapemphera kuna imwe mwakuyang'ana mzinda udasankhula imwewu pontho Nyumba yakumangirani ineyi,

³⁵avesereni kupemphera kwawo. Kudzuluko avesereni mbamuachitise kukunda.

³⁶“Ngakhala iwo anakudawirani (thangwi nkhabe munthu na mbodzi ene okhonda dawa tayu) imwe mbamuazhangalira na kuapereka m'manja mwa anyamalwawo, ale anaaphata ninga anyaperezo mbaenda nawo kudziko yakutali penu chifupi,

³⁷veserani kupemphera kwa anthu anu. Ngakhala m'dziko iwo anatchunyuka mbapemphera kuna imwe kutawira na mulomo wawo kuti iwo adawadi pontho kuti achitadi pyakudawika, avesereni kupemphera kwawo MBUYA.

³⁸Ngakhala m'dzikomo anatawiradi kudawa kwawo na mtima wakuona pontho mwakukhulupirika mbapemphera kuna imwe mwakuyang'ana dziko idapereka imwe kuna makolo athu ile, mzinda wasankhula imwewu, pontho na Nyumba yakumangirani ineyi,

³⁹tenepo veserani kupemphera kwawo. Kudzulu kumbuto kumbakhala imweko, veserani kupemphera kwawo mbamuavere nsisi. Lekererani pyakudawa pyonsene pya anthu anu.

⁴⁰“Chinchino Mulungu wanga, tiverenimbo nsisi ife, pontho veserani kupemphera kwachita ife panoku.

⁴¹Lamukani MBUYA Mulungu, pontho pabodzi pene na Bokosi ya Chiverano yakuonesa mphamvu zanu ile, pitani m'Nyumbayi mbamukhale mwenemo kwenda na kwenda. Anyansembe anu mbaphate basawo mwakulungama, pontho anthu anu onsene mbakomerwe thangwi ya udidi umbaachitira imwe.

⁴²MBUYA Mulungu, lekani khonda mfumu asankhula imwe, kumbukani kumfuna kwanu kokhonda mala kukhachita imwe kuna nyabasanu Davite kule.”