Read cisena 2 MBIRI 7 Bible Online

2 MBIRI 7 - cisena bible

2 MBIRI 7

¹Pidamala Mfumu Solomoni kupemphera, moto udatchitha kudzulu mbupyereza nsembe zikhadaperekwa zile, tenepo demelero ya MBUYA idadzala m'nyumbamo.

²Na thangwi yakuti m'nyumbamo mudadzala na demelero ya MBUYA anyansembe hadakwanise kupitamo tayu.

³Pidaona Aisraele moto ukugwa kudzulu pontho demelero ya MBUYA yadzala m'nyumbamo, iwo adagwisa nkhope zawo pansi kupembedza na kukuza MBUYA thangwi ya udidi wache pontho na kuafuna kwache anthu ache kokhonda mala.

⁴Kubuluka penepo Solomoni pabodzi pene na anthu onsene ale, adapereka nsembe kuna MBUYA.

⁵Iye adapereka ng'ombe pikwi makumawiri na piwiri, pontho mabira pikwi dzana na makumawiri ninga nsembe zachiphatizano. Natenepo iye pabodzi na anthu onsene adapambulira Nyumba ile kuna Mulungu.

⁶Anyansembe adaimira m'mbuto zawo zidapaswa iwo, tenepo Alevi adaimirambo mwakuyang'anisana na iwo, kukuza MBUYA na pyakuimbira pidapereka Mfumu Davite pontho na kuimba nyimbo zakumkuza nazo, ninga montho mukhadaapangira Davite kuti, “Kutifuna kwache nkhokhonda mala!” Anyansembe akhaliza ngoma uku anthu onsene adaimira.

⁷Solomoni adachitisa mbuto ya pakatiletu pa chintalo kutsogolo kwa Nyumba ya Mulungu kukhala yakupambulika, tenepo adaperekapo nsembe zamumphu zakupyerera, pyakupereka pya mapira, na mafuta a nyama za nsembe zachiphatizano zile. Iye adachita tenepo thangwi guwa yansembe yankuwa ikhadasasanya iye ile, ikhali ing'ono pyakwanga kukwanapo nsembe zonsenezi.

⁸Solomoni na Aisraele onsene adachita Phwando ya Misasa nsiku zinomwe. Penepo pakhali mwinji ukulu wakubulukira kumakata a Hamati kumpoto na kumadire a Iguputo kumwera.

⁹Iwo adamala nsiku zinomwe kuchita mwambo wakupambulira guwa yansembe kuna MBUYA, pontho nsiku zinango zinomwe kusekera Phwando ya Misasa. Tenepo pansiku yakumalisa pakhali phwando yakufunga nayo pyonsene.

¹⁰Mangwana mwache pansiku yamakumawiri na chitatu ya mwezi wachinomwe, Solomoni adagwinya anthu ale kwenda m'misa mwawo. Iwo adakomerwa pyakwanga na mtsanzayiso onsene ukhadapereka MBUYA kuna anthu ache Aisraele, kuna Davite na kuna Solomoni.

¹¹Pidamalisa Mfumu Solomoni kumanga Nyumba ya Mulungu, pontho kumanga nyumba yachifumu, kuimalisa mwadidi mwene ninga montho mukhadapisasanyira iye,

¹²MBUYA adamuonekera na mosiku mwache. Iye adalonga kuna Solomoni mbati, “Ine ndava kupemphera kwako, tenepo ndasankhula Nyumba yeneyi kuti ikhale mbuto yakuperekeramo nsembe kuna ine.

¹³Ngakhala ine ndinakhondesa mvula, penu kutumiza nyadzombe dzadya mbewu zawo, penu kutumiza muliri pakati pa anthu anga,

¹⁴tenepo ngakhala, anthu ambachemerwa na dzinanga ale, anapichepesa okha ene mbapemphera kuna ine, mbasaka nkhope yanga, mbaleka pyakudawa pyawo, penepo ine ndinavesera kudzulu mbandilekerera pyakudawa pyawo na kuchitisa pinthu pyawo kufamba pontho mwadidi.

¹⁵Maso anga anakhala pa Nyumbayi pontho ndasasanyika kuva kupemphera konsene kunafuna dzachitika pano,

¹⁶thangwi ndaisankhula na kuipambula kuti ikhale mbuto yanga yakupembedzerwamo kwenda na kwenda. Maso anga na mtimanga pinakhala penepo ndzidzi onsene.

¹⁷Ngakhala iwe unanditumikira mwakukhulupirika ninga mudachitira babako Davite, kuvera matongero anga na kuchita pyonsene pyakutonga ine,

¹⁸ndinachita pidadumbira ine kuna babako Davite, pidampanga ine kuti ndzidzi onsene pidzukulu pyache pinatonga mu Israele.

¹⁹Mbwenye ngakhala iwe na anthu ako munakhonda kuvera mwambo na matongero akupasani inewa mbamupembedza milungu inango,

²⁰penepo ine ndinakubulusani m'dziko idakupasani ineyi pontho ndinaikhonda Nyumba yapambula ine leroyi kukhala mbuto yanga yakupembedzerwamo. Konsene kwene anthu anaiyesa chinthu chakusekesa mbaichitira pyakuseluka.

²¹“Nyumbayi lero yalemedzwa pyakwanga, mbwenye pansiku yeneyo munthu onsene wakugwanda na njira anatutumuka mbavunza mbati, ‘Thangwi yache ninji MBUYA achita penepi kuna dzikoyi, pontho kuna Nyumbayi?’

²²Anthu anatawira kuti, ‘Ndi thangwi yakuti iwo adamkhonda MBUYA Mulungu wawo, ule adabulusa makolo awo m'dziko ya Iguputo. Iwo apipereka okha ene kuna milungu inango mbaipembedza. Ndi thangwi yache MBUYA adzesa kuvungikaku pakati pawo.’ ”