Read cisena 2 MBIRI 8 Bible Online

2 MBIRI 8 - cisena bible

2 MBIRI 8

¹Solomoni pidamkwatira pyaka makumawiri kumanga Nyumba ya Mulungu na nyumba yachifumu.

²Iye adamanga pontho mizinda ikhadampasa Mfumu Huramu mbakhazikisamo Aisraele.

³Iye adakunda nthemba ya Hamati na Zoba

⁴mbamanga mpanda kutchinga mwadidi mzinda wa Tadimori m'thando yatchetcha. Iye adamanga pontho mizinda yonsene mu Hamati ile ikhali yakukoyeramo pinthu.

⁵Solomoni adamanga pontho mizinda ishi: Beti-Horoni wa kumtunda na Beti-Horoni wa kuphedi (Mizinda yakutchingwa na mpanda yakukhala na misuwo na mphinga zasimbi),

⁶mzinda wa Baalati, mizinda yonsene ikhakoyera iye pinthu, pontho na mizinda kule kukhakoya iye akavalo na pingolo pyache. Pyonsene pidasasanya iye kupimanga, adapichitadi mu Yerusalemu, Lebanoni na m'nthemba zonsene zikhatonga iye.

⁷Solomoni adaphatisa basa mwakukhakhamiza pidzukulu pyonsene pya anthu a Kanani, ale adasalira khonda phiwa na Aisraele pidapokosera iwo dzikoyo kukhala yawo ene. Enewa mba: Ahiti, Aamori, Aperizi, Ahivi, na Ayebusi, ale pidzukulu pyawo ndi mabitchu na lero.

⁹Mbwenye Solomoni hadaphatise Aisraele ninga mabitchu pa basache tayu; basawo ikhali ya unyankhondo, akadamu a nkhondo, akadamu a anyakutekenya pingolo pya nkhondo, pontho akadamu a anyakupakira akavalo a nkhondo.

¹⁰Pakhali akulu-akulu madzana mawiri na makumashanu, ale akhayang'anira anthu akhaphata basa ya mtundu na mtundu yakumanga-manga ale.

¹¹Solomoni adabulusa mkazache, mwana wamkazi wa mfumu wa ku Iguputo mumzinda wa Davite kamuikha m'nyumba idammangira iye. Iye adalonga mbati, “Iye hadatheme tayu kukhala m'nyumba yachifumu ya Mfumu Davite wa Israele, thangwi mbuto yonsene yakhala Bokosi ya Chiverano njakupambulika.”

¹²Solomoni adapereka nsembe kuna MBUYA paguwa yansembe ikhadamanga iye kunkhope kwa Nyumba ya Mulungu.

¹³Iye adapereka nsembe zakupyerera malingana na pinafuna mwambo wa Mose pansiku yonsene yakupambulika: Nsiku Yakupuma, Phwando yakusekera Kubalwa kwa Mwezi, na maphwando a chaka na chaka atatu: Phwando ya Mikate yakusowa chakufufumisira, Phwando ya Kuvuna na Phwando ya Misasa.

¹⁴Kuteweza matongero ali m'tchindewa, ale adaikhwa na babache Davite, iye adasasanya basa ya nsiku na nsiku ya anyansembe pontho na ya Alevi ene, ale akhaphedza anyansembe pakuimba nyimbo na pabasawo. Iye adaikha pontho anyakulondali m'misuwo ya mpanda mbapasa basa ya nsiku na nsiku pakuchita buswa-buswa pamsuwo ubodzi malingana na montho mudatongera Davite munthu wa Mulungu.

¹⁵Upangizi udapereka Davite kuna anyansembe na Alevi pya nyumba yakukoyeramo pinthu na pinthu pinango pikhachitwadi ninga montho mudapangirwa iwo.

¹⁶Pandzidzi wenewo basa yonsene ya Solomoni ikhadamala phatwa, kutomera pamaziko a Nyumba ya Mulungu mpakana kumala kwayo; basa yonsene idaphatika mwadidi mwene.

¹⁷Kubuluka penepo Solomoni adenda ku Ezioni-Geberi na Elati, magombe m'dziko ya Edomu.

¹⁸Mfumu Hiramu adamtumizira miyadiya mikulu-mikulu pansi pa utongi wa mathubu ache pontho na anyaluso pakuifambisa. Iwo adenda pabodzi pene na mathubu a Solomoni kudziko ya Ofiri mbabwerera kuna Solomoni na golidi wakukwana makilogramu pikwi khumi na pishanu.