Read cisena 2 MBIRI 9 Bible Online

2 MBIRI 9 - cisena bible

2 MBIRI 9

¹Mfumukazi wa ku Sheba adava pya kuveka kwa Mfumu Solomoni, tenepo iye adenda ku Yerusalemu kuti akamuyese pakuvunza mivunzo yakunensa. Iye adadza na mwinji ukulu wa anyabasache pabodzi pene na ngamila zakuthukula pyakukomesera muliwo, miyala yakudula na golidi mzinji ene. Pikhachedza iye na Solomoni, iye adamvunza mivunzo yonsene ikhali na iye kumtima kwache.

²Solomoni adatawira mivunzo yache yonsene ile; nkhabe mvunzo na ibodzi ene ukhali wakunensa kuna kuufuthula tayu.

³Mfumukazi wa ku Sheba adava nzeru za Solomoni mbaona nyumba yachifumu ikhadamanga iye.

⁴Iye adaona pyakudya pidaikhirwa iye pathebulu, nyumba zakugona mathubu ache, kudziwa basa kwa anyakuphata basa m'nyumbache yachifumu na pyakuvala pya pabasa pya mtundu ubodzi ene pikhavala iwo, pyakuvala pya anyabasa akhamtumikira pamaphwando ale, pontho na nsembe zidapereka iye m'Nyumba ya Mulungu. Pyonsene pidamchitisa mkazi ule kusowa chakulonga pontho kudodoma.

⁵Iye adalonga kuna mfumu mbati, “Pidava ine m'dziko mwanga pya imwe na nzeru zina imwe, mphyakuonadi!

⁶Pidalonga iwo nee ndikhapikhulupira tayu kufikirana lero ndadza ndekha mbandiona na maso anga. Pidava inepyo nee pidakwana theka ya nzeru zanuzi tayu. Imwe ndimwe wanzeru pyakwanga kupiringana pimbalonga anthu.

⁷Ngamwayi pyakwanga amuna ambakuphatirani basa, ale ndzidzi onsene ambakhala chifupi na imwe kuvesera mafalanu anzeru!

⁸Mbakuzwe MBUYA Mulungu wanu! Iye aonesa kuti ambakomerwa namwe pakukuchitisani kukhala mfumu kutonga na dzinache. Na thangwi yakuti iye ambafuna anthu ache Israele pontho nakuti anafuna kuakoya kwenda na kwenda, iye akuchitisani kukhala mfumu wawo towera pakhale kukoya mwambo pontho chilungamo.”

⁹Kubuluka penepo mfumukazi ule, adapereka kuna Mfumu Solomoni mitukwa idadza na iye ile: golidi wakulemera kupiringana makilogramu pikwi pinayi, pyakukomesera muliwo pizinji pontho na miyala yakudula. Chipo nee pakhali pyakukomesera muliwo pyadidi tayu ninga pidapereka mfumukazi wa ku Sheba kuna Mfumu Solomoni.

¹⁰Amuna a Mfumu Hiramu na Mfumu Solomoni, ale adadza na golidi kubulukira ku Ofiri, adadza pontho na miti yamphingwe na miyala yakudula.

¹¹Solomoni adaphatisa basa miti ile kusasanya nsikada za pa Nyumba ya Mulungu na panyumbache yachifumu, pontho kusasanya anyakatangale na malimba pya anyakuimba. Pinthu ninga penepi chipo nee pikhadadzati oneka tayu m'dziko ya Yuda.

¹²Mfumu Solomoni adapereka kuna mfumukazi wa ku Sheba ule pyonsene pidapempha iye. Kweneku kukhali kuthimizira papinthu pidapereka iye kuna mkazi ule ninga mitukwa yakuchinjisana na mitukwa idadza na mfumukazi ule. Kubuluka penepo mfumukazi pabodzi pene na anyabasache adabwerera kudziko ya Sheba.

¹³Chaka na chaka Mfumu Solomoni akhatambira golidi wakulemera makilogramu pikwi makumawiri na pitatu,

¹⁴kuthimizira pamsonkho ukhakhoma anyamalonda akufamba-famba. Mafumu a Arabia, na akulu-akulu a m'nthemba za Israele akhadza pontho na siliva pontho golidi kuna iye.

¹⁵Solomoni adasasanya pyakugedera matswimo pikulu-pikulu pyakukwana madzana mawiri, chonsene chidakukutizwa na golidi wakuchita kufula wakulemera makilogramu anomwe,

¹⁶na pyakugedera matswimo ping'ono-ping'ono madzana matatu, chonsene chidakukutizwa na golidi wakuchita kufula wakulemera makilogramu matatu. Iye adaikha pyonsenepyo m'Chinyumba chakuchemerwa Msitu wa Lebanoni.[8]

¹⁷Mfumu adasasanyisa pontho mpando wachifumu. Khundu ibodzi ya mpandowo idakukutizwa na nyanga za nzowu, pontho khundu inango yakusalirayo idakukutizwa na golidi chadi-chadi.

¹⁸Pakhali nsikada zitanthatu kafika pampandopo, pontho pakhali chakutsamizirapo manyalo chakukukutizwa na golidi, chile chidaphatanizwa kubodzi kwene na mpandowo. Kukhundu zonsene ziwiri za mpandowo kukhali pyakusanjikira mikono, kada khundu mbakukhala mfanikizo wa nkhalamu.

¹⁹Pansikada pale pakhali mifanikizo ya nkhalamu khumi na miwiri, ubodzi pankhomo yonsene ya nsikada, ibodzi khundu inango, ibodzimbo khundu inangoyo. Chipo nee padzati oneka mpando unango wachifumu ninga wenewu ufumu unango tayu.

²⁰Makhomitcho onsene a Mfumu Solomoni akhali akusasanywa na golidi, pontho pyombo pyonsene pya m'Chinyumba chakuchemerwa Msitu wa Lebanoni pikhali pyakusasanywa na golidi chadi-chadi. Pandzidzi wa Solomoni siliva akhayeswa ninga ntchinthu chakukhonda funika.

²¹Iye akhali pontho na miyadiya mikulu-mikulu yakufamba pa bara pabodzi pene na miyadiya ya Mfumu Hiramu. Tenepo pachaka chachitatu chonsene miyadiyacheyo ikhabwerera, uku yathukula golidi, siliva, nyanga za nzowu, mabongwe na makolo.

²²Mfumu Solomoni akhali wakufuma pontho wanzeru pyakwanga kupiringana mafumu anango onsene padziko yapansi.

²³Iwo onsene akhavunza nzeru kuna iye kuti ave nzeru zidampasa Mulungu zile.

²⁴Munthu onsene wa iwo akhadza na mitukwa kuna Solomoni; pinthu pyakusasanywa na siliva pontho golidi, mikhanjo, pida pya nkhondo, pyakukomesera muliwo, akavalo na mabulu. Penepi pikhachitika chaka na chaka.

²⁵Mfumu Solomoni akhali na masubi pikwi pinayi akukoyeramo pingolo na akavalo, pontho akhali na akavalo pikwi khumi na piwiri. Iye adapikoya pinango mu Yerusalemu, pontho pinango pyonsene adapiikha m'mizinda yakusiyana-siyana.

²⁶Iye akhali na utongi pana mafumu onsene a nthemba zakubulukira kumkulo wa Yufurate, nkhwenderatu kudziko ya Afilisti mpakana ku madire a Iguputo.

²⁷Pandzidzi ukhatonga Solomoni, siliva akhali nadza-nadza mu Yerusalemu ninga miyala, pontho miti yamkungudza ikhali dala-dala ninga miti enembo pyayo ya mkuyu yakumera m'tchinde mwa phiri ya Yuda.

²⁸Solomoni akhagula akavalo kubulukira ku Iguputo na kubulukira kumadziko anango onsene.

²⁹Mbiri yonsene ya kutonga kwa Solomoni, kutomera pakutoma kufikirana pakumalisira, idalembwa m'bukhu ya mbiri ya mprofeti Natani, m'bukhu yauprofeti wa Ahia wa ku Shilo, pontho m'bukhu ya masomphenya a mprofeti Ido, ile adalonga pontho pya kutonga kwa Mfumu Yeroboamu mwana Nebati.

³⁰Solomoni adakhala mu Yerusalemu kutonga Aisraele onsene pyaka makumanayi.

³¹Iye adagonera mkono mbaikhwa m'masiye a makolo ache mumzinda wa Davite, tenepo Rehoboamu mwanache adapita ufumu m'mbuto mwache.