Read cisena EZARA 1 Bible Online

EZARA 1 - cisena bible

EZARA 1

¹Chaka chakutoma cha Kirusi mfumu wa ku Peresia,[1] MBUYA adachitisa mafala adalonga iye kudzera muna mprofeti Yeremia kukwana-kwana. MBUYA adampasa chipapu Kirusi kuti apereke matongero akuchita kulembwa, pontho kuti akawerengwe mwakugaluza fala konsene kwene muufumu wache. Iye adalonga mbati,

²“Kirusi, mfumu wa ku Peresia, akulonga tenepa: MBUYA Mulungu wa kudzulu andiikha kukhala mtongi wa dziko yonsene yapansi, pontho andipasa basa yakummangira Nyumba mu Yerusalemu, m'dziko ya Yuda.

³Mulungu mbakhale namwe monsenene ale ndimwe anthu ache. Imwe mwathema kwenda ku Yerusalemu mbamukamanga pontho Nyumba ya MBUYA Mulungu wa Israele, Mulungu ambapembedzwa mu Yerusalemu ule.

⁴Ngakhala anthu ache anango ale ali m'dziko ya unyaperezo anafuna chiphedzo kuti abwerere, atsanthembawo athema kuaphedza. Iwo athema kuapasa siliva, golidi, phoso na pifuyo; aapase pontho mitukwa yakuti akaipereke ku Nyumba ya Mulungu ku Yerusalemu.”

⁵Akadamu a madzinza a Yuda na Benjemani, a nyansembe na Alevi pontho na munthu onsene Mulungu adampasa chipapu ule, adasasanyika kwenda kamanga pontho Nyumba ya Mulungu mu Yerusalemu.

⁶Atsanthembawo onsene adaaphedza pakuapasa pinthu pizinji: siliva, pyombo, golidi, phoso na pifuyo, pinthu pinango pyakufunika pontho na mitukwa yakuti akaipereke ku Nyumba ya Mulungu.

⁷Kirusi adaabwezera ndilo na makhomitcho, pile pikhadakwata Mfumu Nebukadinezara m'Nyumba ya MBUYA ku Yerusalemu mbapiikhambo m'nyumba ya milungu yache.

⁸Iye adapipereka kuna Mitiredati nyakukoya kobiri, ule adapilengesera kuna Sheshibazari, mkulu wa boma ya Yuda.

⁹Kulengesa kukhali tenepa: mabakuli agolidi makumatatu, mabakuli asiliva chikwi chibodzi, piwaya pyakufukizira makumawiri na pifemba,

¹⁰mapalato agolidi makumatatu, mapalato asiliva madzana manayi na khumi, pontho pyombo pinango pene chikwi chibodzi.

¹¹Pyonsene pabodzi pene pikhali pinthu pikwi pishanu na madzana manayi pyagolidi na pyasiliva. Sheshibazari adadza napyo pinthu penepi ku Yerusalemu ndzidzi ukhabwerera iwo kubulukira kudziko ya unyaperezo, ku Babiloni.