Read cisena EZARA 10 Bible Online

EZARA 10 - cisena bible

EZARA 10

¹Ndzidzi ukhapemphera Ezara na kubweka kudawa, kulira na kupigwisa yekha ene patsogolo pa Nyumba ya Mulungu, mwinji wa Aisraele; amuna, akazi, na ana ene, adagumanyikana mwakumzungulira. Iwombo akhalira pikulu pene.

²Tenepo Shekania mwana Yehiele wa mbumba ya Elamu adalonga kuna Ezara mbati, “Ife taleka kukhala akukhulupirika kuna Mulungu thangwi ya kusemba akazi achilendo, kwache podi kwene kuti pili tenepo, Aisraele ana chidikhiro basi.

³Chinchino ife tathema kudumbira pikulu pene kuna Mulungu wathu kuti ife tinati tigwinye kwawo akazi achilendowa na anawo ene. Ife tinati tichite pinthu pinatipanga iwe na anthu ale ambagopa matongero a Mulungu wathu. Penepi mbapichitwe malingana na mwambo wa Mulungu.

⁴Lamuka Ezara, penepi pili m'manja mwako. Ife tili kunduli kwako, natenepo wangisa mbupichite.”

⁵Tenepo Ezara adatoma na kudumbirisa anyansembe akulu, Alevi na Aisraele anango onsene kuti iwo anachita pinthu pidanyerezera Shekania kuti pichitwe pile.

⁶Tenepo iye adabuluka patsogolo pa Nyumba ya Mulungu pale mbaenda kusubi a Yehohanani mwana Eliashibu mbakhalapo mosiku onsene[14] uku akulira thangwi ya kukhonda khulupirika kwa anthu akhadabulukira kudziko ya unyaperezo ale. Iye hadadye penu kumwa na chinthu chene tayu.

⁷Mphangwa zidatumizwa mu Yerusalemu na mu Yuda monsene kuti anthu akhadabulukira kudziko ya unyaperezo ale athema kugumanyikana mu Yerusalemu.

⁸Mathubu na akadamu adatonga kuti, “Ngakhala munthu unango anachimwana kudza pansiku zitatu, pinthu pyache pyonsene pyathema kupokoserwa, pontho athema kutaya chidzo chache chakukhala mbodzi wa dzinzayi.”

⁹Nsiku zenezi pansiku yachimakumawiri ya mwezi wachifemba, amuna onsene akukhala m'nthemba ya Yuda na Benjemani adadza ku Yerusalemu mbagumanyikana pachintalo cha Nyumba ya Mulungu. Kunja kukhavumba mvula pyakwanga, tenepo na thangwi ya kunja pontho na kufunika kwa mgumanowo, munthu onsene akhatetemera.

¹⁰Ezara nyansembe adaimira mbalonga kuna iwo mbati, “Imwe mwakhonda kukhulupirika pakusemba akazi achilendo, kuthimizira kudawa pa Israele.

¹¹Chinchino mphapo, bwekani pyakudawa pyanu kuna MBUYA, Mulungu wa makolo anu mbamuchite pyakumkomera. Lekanani na alendo ambakhala m'dziko mwathu muno ale, pontho na akazi achilendowo.”

¹²Anthu adatawira mwakukhuwa mbati, “Ife tinachita pyonsene pene pinalonga iwe.

¹³Kwache pano pana anthu azinji, pontho kunjaku kuna mvula, tenepo ife nkhabe kwanisa kuimira pakwecha tayu. Kuthimiza penepo penepi nkhabe kupimalisa nsiku ibodzi penu ziwiri tayu, thangwi ife tadawa pikulu pene.

¹⁴Aleke akadamu apichite m'mbuto mwa Aisraele onsene. Tenepo munthu onsene m'maluwani mwathu ule adasemba mkazi wachilendo mbadze pandzidzi wakusankhulika pabodzi pene na akadamu na anyakutonga miseru a mumzinda mwawo, mpakana ukali wa Mulungu pana ife umbombowe.”

¹⁵Nkhabe munthu na mbodzi ene adapokanyisa penepi tayu kupambula Yonatani mwana Asahele na Yahizeia mwana Tikiva, ale akhali khundu ibodzi ene na Meshulamu na Shabetai Mlevi.

¹⁶Anyakubwerera kubulukira kudziko ya unyaperezo ale, adaphatizana nawo manyerezero enewo, tenepo Ezara adasankhula amuna pakati pa mbumba mbaalemba madzinawo. Pansiku yakutoma ya mwezi wakhumi, iwo adatoma kuvunza-vunza,

¹⁷tenepo kumala kwa miyezi mitatu, iwo adamalisa miseru yonsene ya amuna akukhala na akazi achilendo ale.

¹⁸Pakati pa pidzukulu pya anyansembe amuna awa ndiye akhadasemba akazi achilendo: Kubulukira kuna pidzukulu pya Yeshua mwana Yozadaki na abale ache: Maaseia, Eliezere, Yaribu na Gedalia.

¹⁹Iwo onsene adadumbira kusiya akazawo, pontho munthu onsene adapereka bira wamamuna kubulukira pa mkumbi wache kuti akhale nsembe yakubulusira pyakudawa.

²⁰Kubulukira kuna pidzukulu pya Imeri akhali Hanani na Zebadia.

²¹Kubulukira kuna pidzukulu pya Harimu akhali Maaseia, Elia, Shemaia, Yehiele na Uzia.

²²Kubulukira kuna pidzukulu pya Pashuri akhali Elioenai, Maaseia, Ishimaele, Netanele, Yozabadi na Elasa.

²³Pakati pa Alevi akhali Yozabadi, Shimei, Kelaia, (weneyu ndi Kelita), Petahia, Yuda na Eliezere.

²⁴Kubulukira pakati pa anyakuimba nyimbo akhali Eliashibu. Kubulukira pakati pa anyakuyang'anira Nyumba ya Mulungu akhali Shalumu, Telemu na Uri.

²⁵Pontho kubulukira pakati pa Aisraele anango: Kubulukira kuna pidzukulu pya Paroshi akhali Ramia, Izia, Malikia, Miamini, Eleazara, Malikia na Benaia.

²⁶Kubulukira kuna pidzukulu pya Elamu akhali Matania, Zekaria, Yehiele, Abidi, Yeremoti na Elia.

²⁷Kubulukira kuna pidzukulu pya Zatu akhali Elioenai, Eliashibu, Matania, Yeremoti, Zabadu na Aziza.

²⁸Kubulukira kuna pidzukulu pya Bebai akhali Yehohanani, Hanania, Zabai na Atilai.

²⁹Kubulukira kuna pidzukulu pya Bani akhali Meshulamu, Maluki, Adaia, Yashubu, Sheale na Yeremoti.

³⁰Kubulukira kuna pidzukulu pya Pahati-Moabu akhali Adina, Kelali, Benaia, Maaseia, Matania, Bezalele, Binui na Manase.

³¹Kubulukira kuna pidzukulu pya Harimu akhali Eliezere, Ishia, Malikia, Shemaia, Shimeoni,

³²Benjemani, Maluki na Shemaria.

³³Kubulukira kuna pidzukulu pya Hashumu akhali Metania, Matata, Zabadu, Elifeleti, Yeremai, Manase na Shimei.

³⁴Kubulukira kuna pidzukulu pya Bani akhali Maadai, Amuramu, Uele,

³⁵Benaia, Bedaia, Keluhi,

³⁶Vania, Meremoti, Eliashibu,

³⁷Matania, Matenai na Yaasu.

³⁸Kubulukira kuna pidzukulu pya Binui akhali Shimei,

³⁹Shelemia, Natani, Adaia,

⁴⁰Makinadebai, Shashai, Sharai

⁴¹Azarele, Shelemia, Shemaria,

⁴²Shalumu, Amaria na Yosefe.

⁴³Kubulukira kuna pidzukulu pya Nebo akhali Yeiele, Matitia, Zabadu, Zebina, Yadai, Yowele na Benaia.

⁴⁴Onsenewa akhadasemba akazi achilendo, tenepo iwo adaagwinya kwawo pabodzi pene na anawo ene.