Read cisena EZARA 4 Bible Online

EZARA 4 - cisena bible

EZARA 4

¹Pidava anyamalwa a Yuda na Benjemani kuti anthu akhadabwerera kudziko ya unyaperezo ale, akumanga pontho Nyumba ya MBUYA Mulungu wa Israele,

²iwo adadza kuna Zerubabele na kuna akadamu a mabanja mbalonga mbati, “Tinafuna tikhalembo namwe pabodzi pabasa yakumanga Nyumba ya Mulungu. Ife timbapembedza Mulungu ontho ambapembedza imwe ule, pontho ife timbapereka nsembe kuna iye kutomera ndzidzi wa Esarihadoni mfumu wa Asiria, adatidzesa kuno ule.”

³Mbwenye Zerubabele, Yeshua na akadamu a mabanja onsene adalonga mbati, “Ife nkhabe funa kuti imwe mutiphedze kumanga Nyumba ya Mulungu wathu tayu. Ife tinaimanga tekha ene Nyumba ya MBUYA Mulungu wa Israele ninga montho mudatipangira Kirusi mfumu wa ku Peresia.”

⁴Tenepo anthu akhakhala m'dzikomo ale adayesa kuagwisa mfuwa Ayuda mbaathuswa kuti aleke kuphata basayo.

⁵Iwo adadyekera mathubu a ku Peresia kuti achite mwakupokanyisana nawo. Iwo adachita penepi ndzidzi onsene wa kutonga kwa Kirusi mpakana ndzidzi wa kutonga kwa Dariusi.[5]

⁶Ndzidzi wakutoma kutonga kwa Ahasuwero, anyamalwawo akukhala ku Yuda na Yerusalemu adalemba pinthu pyakuapambizira.

⁷Ndzidzi wakutonga kwa Aritaserisese mfumu wa ku Peresia, Bishilamu, Mitiredati, Tabele na anzawo anango adalembera mfumu kalata. Kalatayo idalembwa m'Chiaramu,[6] tenepo idathema kuthumbusulwa ndzidzi ukhawerengwa iyo.

⁸Rehumu, mkulu wa boma na Shimishai mlembi wa nthemba adalemba kalata ili m'tchindemu kuna Aritaserisese kupokanyisana na Yerusalemu:

⁹“Kubulukira kuna Rehumu, mkulu wa boma, na Shimishai, mlembi wa nthemba na kuna anzawo anango, anyakutonga miseru, pontho kubulukira kuna mathubu anango onsene a ku Ereke, Babiloni na Susa m'nthemba ya Elamu

¹⁰pabodzi pene na anthu anango, ale adabuluswa m'misa mwawo na Ashuribanipali, munthu wamkulu pontho wamphamvu, mbakhazikika mumzinda wa Samaria na konsene kwene m'nthemba yakumadokero dzuwa a mkulo wa Yufurate.”[7]

¹¹Kalatayo idalembwa tenepa: “Kubulukira kuna anyabasanu, amuna a kunthemba yakumadokero dzuwa a mkulo wa Yufurate, kwenda kuna Mfumu Aritaserisese.

¹²“Ife tinafuna, imwe Mfumu, mupidziwe kuti Ayuda ale adadza kubulukira kunthemba zanu zinango akhazikika mu Yerusalemu, tenepo iwo akumanga pontho mzinda wakupandukira na wakudawika ule. Iwo atoma kumanga pontho mafufu ache na kusasanya maziko a Nyumba ya Mulungu mwakuti chinchino pano anati amalise.

¹³Mfumu, ngakhala mzinda wenewu unamangwa pontho mafufu ache mbamaliswa, anthu anati aleke kukhoma msonkho, natenepo konta ya kobiri imbagumana imwe ile inati itchithe.

¹⁴Chinchino podi ife tili kunduli kwanu, Mfumu, tenepo ife nkhabe funa kuona mfumu kuchitiswa manyadzo na njira yeneyi tayu, tenepo ife tanyerezera kuti

¹⁵mupereke utongi wakuti pile pidalembwa pya makolo anu pisakanyulwe. Ngakhala imwe munachita tenepo, munagumana kuti mzinda wenewu ndzidzi onsene ngwakupandukira, pontho kutomera kale ene waonesa mafumu na atsanthembawo nyatwa zikulu. Anthu ache ndzidzi onsene ngakunensa kutonga; ndi thangwi yache mzindawu udavungwa.

¹⁶Natenepo ife tikukudziwisani kuti ngakhala mzindawu unamangwa pontho mafufu ache mbamaliswa, penepo imwe Mfumu nkhabe dzakhalave na utongi pana nthemba yakumadokero dzuwa a mkulo wa Yufurate tayu.”

¹⁷Mfumu adatawira mbati, “Mwenyikiro kuna Rehumu, mkulu wa boma, Shimishai mlembi wa nthemba na anzawo onsene ambakhala mu Samaria na konsene kwene kunthemba yakumadokero dzuwa a mkulo wa Yufurate.

¹⁸“Kalata idatilembera imwe ile idathumbusulwa mbiwerengwa kuna ine.

¹⁹Ine ndidapereka utongi, tenepo kusakanyulwa kudachitwa mbapigumanwa kuti kubulukira kale ene Yerusalemu apandukiradi atongi, pontho ngwakudzala na anthu akupandukira pontho na akunensa kutonga.

²⁰Mafumu amphamvu atonga kweneko, pontho atonga kunthemba yonsene yakumadokero dzuwa a mkulo wa Yufurate kukhomesa msonkho na kusonkhesa kobiri m'misika.

²¹Natenepo imwe mwathema kutonga kuti amunawo aleke kumanga pontho mzindawo mpakana ndichite kutonga kuti achite tenepo.

²²Chitani penepi kabodzi kene towera paleke khala chinthu chinango chakupasa Mfumu kaluma.”

²³Sindzidzi kalata yakubulukira kuna Aritaserisese ile nkhuwerengwa kuna Rehumu, Shimishai na kuna anzawo, iwo adachimbiza kwenda ku Yerusalemu mbakhakhamiza Ayuda kuleka kumanga pontho mzindawo.

²⁴Basa yakumanga Nyumba ya Mulungu mu Yerusalemu idalekera panjira mpakana chaka chachiwiri cha utongi wa Dariusi mfumu wa ku Peresia.