Read cisena EZARA 6 Bible Online

EZARA 6 - cisena bible

EZARA 6

¹Tenepo Mfumu Dariusi adapereka utongi wakuti pyakulembwa pyonsene pyakulonga pyachifumu pyakukoyiwa mu Babiloni pisakanyulwe.

²Mbwenye mpukutu udagumanwa mumzinda wa Ekibatana m'nthemba ya Media wakulonga pya pinthu pyakuti:

³“Chaka chakutoma cha utongi wa Kirusi adatonga kuti Nyumba ya Mulungu mu Yerusalemu imangwe pontho ninga mbuto yakuperekerapo nsembe. Nyumbayo yathema umimbache kukhala makhono makumawiri na manomwe pontho chengo chache makhono makumawiri na manomwe.

⁴Mafufu ache athema kumangwa na matabwa padzulu pa mizere yonsene mitatu ya miyala. Pyonsene pyakufunika pabasayo pinapagalwi na thumba yachifumu.

⁵Pontho pyombo pyagolidi na pyasiliva pidadza na Mfumu Nebukadinezara kuno ku Babiloni kubulukira napyo ku Nyumba ya Mulungu ku Yerusalemu pyathema kubwezerwa m'mbuto mwapyo m'Nyumba ya Mulungu mu Yerusalemu.”

⁶Tenepo Dariusi adatawira tenepa: “Kuna Tetanai, mkulu wa nthemba yakumadokero dzuwa a mkulo wa Yufurate, Shetari-Bozenai na mathubu anzanu m'nthemba yakumadokero dzuwa a mkulo wa Yufurate. “Fedzani kutali na Nyumba ya Mulungu,

⁷pontho lekani dzudzumisa basayo. Alekeni mkulu wa boma ya Yuda na akadamu a Chiyuda kuti amange pontho Nyumba ya Mulungu pambuto pakhali iyo kale pale.

⁸Natenepo ine pano ndikukutongani kuti muaphedze basayo. Pyonsene pyakufunika pabasayo pinapagalwi kabodzi kene monsene mwene na kobiri zakubulukira kuthumba yachifumu, kumsonkho wa kunthemba yakumadokero dzuwa a mkulo wa Yufurate, towera basa ileke dzudzumiswa.

⁹Nsiku na nsiku okhonda tchotchesa imwe mwathema kuapasa anyansembe mu Yerusalemu pyonsene pene pinasowa iwo: anamphulu achimuna, mabira penu anabira kuti zikhale nsembe zakupyerera kuna Mulungu wa kudzulu, penu tirigu, vinyu, munyu, penu mafuta aolivi.

¹⁰Penepi pyathema kuchitika towera iwo apereke nsembe zakukomera Mulungu wa kudzulu, pontho kuti iwo apemphere kuti mtsanzayiso wache ukhale pana ine na ananga.

¹¹Ndikuthimiza kutonga kuti ngakhala munthu unango anakhonda vera utongi wenewu, mphalupalu ya panyumba pache mbichololwe, isongolwe pontho mbitungulirwe nayo mimbache, pontho nyumbache inasanduka mulu wa khuku.

¹²Mulungu ule adasankhula Yerusalemu kukhala mbuto yache yakupembedzerwapo mbavunge mfumu onsene penu anthu anaswipisa utongi wenewu, pontho kuyesera kuvunga Nyumba ya Mulungu. Ndine Dariusi apereka utongi wenewu. Iwo wathema kuverwa monsene mwene.”

¹³Penepo Tatenai, mkulu wa boma, Shetari-Bozenai na mathubu anzawo adachita ninga montho mudatongera mfumu.

¹⁴Akadamu a Chiyuda adachitisa basa yakumanga pontho Nyumba ya Mulungu kwenda m'tsogolo mwadidi. Iwo adawangiswa mtima na mphangwa za Hagai na Zekaria mwana Ido, maprofeti. Iwo adamalisa kumanga Nyumba ya Mulungu ninga montho mudaatongera Mulungu wa Israele, pontho na utongi wa Kirusi, Dariusi na Aritaserisese, mafumu a ku Peresia.

¹⁵Iwo adamalisa basayo pansiku yachitatu ya mwezi wa Adara, chaka chachitanthatu cha utongi wa Mfumu Dariusi.

¹⁶Tenepo Aisraele, anyansembe na Alevi pontho na anthu anango onsene ale akhadabwerera kubulukira kudziko ya unyaperezo, adapambulira Nyumba ya Mulungu mwakukomerwa.

¹⁷Pamwambo wakupambulira Nyumbayo kuna Mulungu, iwo adapereka ng'ombe zimuna dzana ibodzi, mabira madzana mawiri, anabira madzana manayi kukhala nsembe. Iwo adapereka pontho mbuzi khumi na ziwiri ninga chakupereka chakubulusira pyakudawa, mbuzi ibodzi kuimirira dzinza ibodzi ya Israele.

¹⁸Iwo adabwezera pontho m'mbuto mwawo anyansembe na Alevi malingana na magulu awo, kuphata basa m'Nyumba ya Mulungu mu Yerusalemu pakuteweza matongero adalembwa m'bukhu ya Mose ale.

¹⁹Anthu akhadabwerera kubulukira kudziko ya unyaperezo ale, adasekera Phwando ya Paska pansiku yakhumi na chinayi ya mwezi wakutoma wa chaka.

²⁰Anyansembe na Alevi onsene akhadapichenesa okha ene, tenepo akhali akuchena pamaso pa Mulungu. Alevi adapha nyama kuti zikhale nsembe za Phwando ya Paska za anthu onsene akhadabwerera ale; za anyansembe na za iwo.

²¹Nsembe zidadyiwa na Aisraele onsene ale akhadabwerera kubulukira kudziko ya unyaperezo ale, pontho na anthu anango onsene ale adaleka njira zakuipa za anthu anango ale akhakhala m'dzikomo pontho akhadadza dzapembedza MBUYA Mulungu wa Israele.

²²Nsiku zinomwe, iwo adasekera Phwando ya mikate yakusowa chakufufumisira mwakukomerwa. Iwo adakomerwa pyakwanga pene thangwi MBUYA adachitisa mfumu wa Asiria[9] kuakomera mtima mwakuti iye adaaphedza basawo yakumanga pontho Nyumba ya Mulungu wa Israele.