Read cisena EZARA 7 Bible Online

EZARA 7 - cisena bible

EZARA 7

¹Pidagwanda pyaka pizinji pene, pikhali Aritaserisese mfumu wa ku Peresia, pakhali munthu unango dzinache Ezara, mwana Seraia, mwana Azaria, mwana Hilikia,

²mwana Shalumu, mwana Zadoki, mwana Ahitubu,

³mwana Amaria, mwana Azaria, mwana Meraioti,

⁴mwana Zerahia, mwana Uzi, mwana Buki,

⁵mwana Abishua, mwana Finiasi, mwana Eleazara, mwana Aroni Nyansembe Wamkulu.

⁶Ezara weneyu ngule adabulukira ku Babiloni. Iye akhali mfunzisi wakudziwisa mwadidi mwambo wa Mose, udapereka MBUYA Mulungu wa Israele ule. Mfumu adampasa pyonsene pidapempha iye, thangwi MBUYA Mulungu wache akhali naye.

⁷Anango mwa Aisraele, kuthimizapo anyansembe, Alevi, anyakuimba nyimbo, anyakulondali pamsuwo na anyakuphata basa m'Nyumba ya Mulungu adadzambo ku Yerusalemu chaka chachinomwe cha Mfumu Aritaserisese.

⁸Ezara adafika mu Yerusalemu mwezi wachishanu wa chaka chache chachinomwe.

⁹Ulendo wache adautomera ku Babiloni pansiku yakutoma ya mwezi wakutoma mbafika ku Yerusalemu pansiku yakutoma ya mwezi wachishanu thangwi Mulungu wache adamkomera mtima.

¹⁰Ezara adapipereka moyo wache onsene kuti adziwe matongero na mwambo wa MBUYA, pontho kufunzisa matongero ache pontho na pifunziso pyache kuna Aisraele.

¹¹Mfumu Aritaserisese adalembera Ezara nyansembe pontho nyakudziwisa mwambo, ule adafunza pizinji pya matongero na mwambo wa MBUYA kuna Aisraele kalata ishi:

¹²“Kubulukira kuna Aritaserisese,[10] mfumu wa mafumu, kwenda kuna Ezara nyansembe pontho nyakudziwisa mwambo wa MBUYA wa kudzulu.

¹³“Ine ndikutonga kuti muufumu wanga, Aisraele onsene, anyansembe na Alevi ale anafuna pyakwenda namwe ku Yerusalemu anakwanisa kwenda.

¹⁴Ine pabodzi pene na mapungu anga manomwe ndikukutumani kuti mukavunze-vunze pya mule munafambira pinthu mu Yerusalemu na Yuda, towera kuona ngakhala mwambo, udakupasani Mulungu wanu ule, ukuverwadi.

¹⁵Imwe mwathema kukwata mitukwa ya golidi na siliva inafuna ine na mapungu anga kupasa Mulungu wa Israele ile, ule Nyumbache ili ku Yerusalemu.

¹⁶Imwe mwathema kukwata golidi na siliva adasonkhesa imwe m'nthemba yonsene ya Babiloni na pyakupereka pidapereka Aisraele na anyansembe mwakufuna kwawo kuti pikhale pya ku Nyumba ya Mulungu wawo ku Yerusalemu.

¹⁷“Iwe wathema kuchita mphole-mphole pakuphatisa basa kobiri zenezi, tenepo ugule ng'ombe zimuna, mabira achimuna, mapira na vinyu mbupipereke nsembe paguwa yansembe m'Nyumba ya Mulungu ku Yerusalemu.

¹⁸Iwe na amunako munakwanisa kuphatisa basa golidi na siliva wakusalira pabasa yonsene malingana na kufuna kwa Mulungu wanu.

¹⁹Iwe wathema kupereka kuna Mulungu ku Yerusalemu pyombo pyonsene pyapaswa imwe kuti piphatiswe basa m'Nyumba ya Mulungu pile.

²⁰Chinthu chonsene chinafuna imwe kuti chiphate basa pa Nyumba ya Mulungu mukachikwate kubulukira kuthumba yachifumu.

²¹“Ndikutonga mathubu onsene ale anakoya kobiri ya kunthemba yakumadokero dzuwa a mkulo wa Yufurate kupereka mwakukomerwa kuna Ezara nyakudziwisa mwambo wa Mulungu wa kudzulu pinthu pyonsene pinapempha iye;

²²mpakana mdidache ukwane: siliva makilogramu pikwi pitatu na madzana manayi, tirigu makilogramu pikwi khumi, vinyu m'mabuyawo[11] madzana manayi, mafuta aolivi m'mabuyawo madzana manayi, pontho na munyu uzinji ene ninga munafunikira ipyo.

²³Imwe mwathema kuonesesa kuti mwapereka pyonsene pinafuna Mulungu wa kudzulu kuti piphatiswe basa pa Nyumbache, gopesera anandizhangalira ine na ale ene anafuna kudza m'nduli mwangamu.

²⁴Imwe mwakhondeswa kukhomesa msonkho anyansembe, Alevi, anyakuimba nyimbo na anyakulondali misuwo ya Nyumba ya Mulungu penu anthu onsene akuphata basa m'Nyumba ya Mulunguyi.

²⁵“Iwe Ezara, pakuphatisa basa nzeru zidakupasa Mulungu wako, wathema kusankhula amuna akudziwa mafambisiro a pinthu pontho na anyakutonga miseru kuti atonge anthu a kunthemba yakumadokero dzuwa a mkulo wa Yufurate, ale ambateweza mwambo wa Mulungu. Iwe wathema kufunzisa mwambowo kuna munthu onsene okhonda kuudziwa.

²⁶Ngakhala munthu unango anakhonda kuvera mwambo wa Mulungu wanu penu matongero a mfumu, weneyo athema kutchunyuswa pikulu pene na imfa penu kuthamangiswa m'dziko, penu kupokoserwa pinthu pyache, penu kuikhwa m'perezo.”

²⁷Ezara adalonga mbati, “Kuzani MBUYA Mulungu wa makolo athu. Iye achitisa mfumu kulemedza Nyumba ya Mulungu mu Yerusalemu na njira yeneyi.

²⁸Tenepo na kundifuna kwache kokhonda mala kwandionesa iye, Mulungu achitisa mfumu na mapungu ache pontho na mathubu ache onsene amphamvu kundikomera mtima. Ndidawanga mtima thangwi MBUYA Mulungu wanga akhali na ine, natenepo ine ndakwanisa kunyengerera akadamu a mabanja azinji kubwerera nane pabodzi.”