Read cisena EZARA 8 Bible Online

EZARA 8 - cisena bible

EZARA 8

¹Awa mbakadamu a mabanja na anthu akhadalembwa pabodzi pene nawo, pontho ale adadza pabodzi pene na ine kubulukira kudziko ya Babiloni pandzidzi wa Mfumu Aritaserisese:

²Gereshomu wa mbumba ya Finiasi Daniele wa mbumba ya Itamara

³Hatushi mwana Shekania wa mbumba ya Davite Zekaria wa mbumba ya Paroshi pabodzi pene na amuna dzana na makumashanu a mbumbache (pile pidalembwa pya makolo awo pikhalipo)

⁴Eliehoenai mwana Zerahia wa mbumba ya Pahati-Moabu pabodzi pene na amuna madzana mawiri.

⁵Shekania mwana Yahaziele wa mbumba ya Zatu[12] pabodzi pene na amuna madzana matatu.

⁶Ebedi mwana Yonatani wa mbumba ya Adini pabodzi pene na amuna makumashanu.

⁷Yeshaia mwana Atalia wa mbumba ya Elamu pabodzi pene na amuna makumanomwe.

⁸Zebadia mwana Mikaele wa mbumba ya Shefatia pabodzi pene na amuna makumasere.

⁹Obadia mwana Yehiele wa mbumba ya Yoabu pabodzi pene na amuna madzana mawiri na khumi na asere.

¹⁰Shelomiti mwana Yosifia wa mbumba ya Bani[13] pabodzi pene na amuna dzana na makumatanthatu.

¹¹Zekaria mwana Bebai wa mbumba ya Bebai pabodzi pene na amuna makumawiri na asere.

¹²Yohanani mwana Hakatani wa mbumba ya Azigadi pabodzi pene na amuna dzana ibodzi na khumi.

¹³Elifeleti, Yeuele na Shemaia wa mbumba ya Adonikamu pabodzi pene na amuna makumatanthatu (enewa adabwerera m'nduli mwache).

¹⁴Utai na Zakuri a mbumba ya Bigivai pabodzi pene na amuna makumanomwe.

¹⁵Ine ndagumanyisa gulu yonsene ya anthu pamgelo wakwendera ku Ahava mbatimanga msasa nsiku zitatu penepo. Ine ndidagumana kuti pagulupo pakhali anyansembe, kwache iwo hakhali Alevi tayu.

¹⁶Ine ndidachemeresa akadamu afemba ale akhali: Eliezere, Ariele, Shemaia, Elinatani, Yaribu, Elinatani, Natani, Zekaria na Meshulamu, pontho na afunzisi awiri Yoiaribu na Elinatani.

¹⁷Ine ndidaatuma kuna Ido, mkadamu wa ku Kasifia, kampempha iye pabodzi pene na anyakuphata basa anzache a m'Nyumba ya Mulungu akukhala kweneko ale kuti atitumizire anthu kuti atumikire m'Nyumba wa Mulungu wathu mu Yerusalemu.

¹⁸Na kukoma mtima kwa Mulungu, iwo adatitumizira Sherebia pabodzi pene na anache na abale ache, onsene pabodzi akhalipo amuna khumi na asere. Iye akhali munthu wakukwanisa pinthu, Mlevi wa mbumba ya Mahili.

¹⁹Iwo adatuma pontho Hashabia na Yeshaia a mbumba ya Merari pabodzi pene na abale awo makumawiri.

²⁰Kuthimiza penepo pakhali pontho amuna madzana mawiri na makumawiri akuphata basa m'Nyumba ya Mulungu ale, gulu idakhazikisa Davite na mathubu ache kuti iphedze Alevi. Onsenewo adamala lembwa na madzinawo.

²¹Penepo chifupi na Mgelo wa Ahava, ine ndidapereka matongero akuti tonsenefe tipimane kudya, towera tipichepese pamaso pa Mulungu wathu kumpempha kuti ulendo wathu ife, anathu na pinthu pyathu pyonsene pene ukhale wadidi.

²²Ndikhachita manyadzo kupempha mfumu kuti atipase anyankhondo na anyakutekenya akavalo kuti atitchinjirize kuna anyamalwathu panjira thangwi tikhadampanga mfumu kuti Mulungu wathu ambatsanzayisa munthu onsene ambamnyindira ule, kwache iye nkhabe komerwa tayu na anyakubauka kubuluka kuna iye, tenepo iye ambaatchunyusa.

²³Natenepo ife tidapimana kudya na kupemphera kuna Mulungu wathu kuti atitchinjirize, iye adava kupemphera kwathu.

²⁴Kubuluka penepo ndidapambulira kuna Mulungu anyansembe akulu khumi na awiri: Sherebia, Hashabia na anango khumi ale.

²⁵Ine ndidapima siliva, golidi na pyombo pile pidapereka mfumu, mapungu ache na mathubu ache pontho na anthu a ku Israele kuti piphatiswe basa m'Nyumba ya Mulungu, tenepo ndidapipereka kuna anyansembe.

²⁶Pidaapasa ine mphipi: siliva wakukwana makilogramu pikwi makumawiri na awiri pyombo pyasiliva dzana ibodzi, pyakulemera makilogramu makumanomwe, golidi makilogramu pikwi pitatu na madzana manayi ndilo zagolidi makumanayi, zakulemera makilogramu masere na theka pyombo piwiri pyankuwa pyakuyetimira, pya mtengo sasawa na golidi.

²⁸Ine ndidalonga kuna iwo kuti, “Imwe ndimwe akupambulika kuna MBUYA Mulungu wa makolo anu, tenepo golidi, siliva na pyombo pyonsene pyagolidi pyadzeswa kuna iye ninga mitukwa yakuperekwa mwakufuna kwawo anthu mphyakupambulikambo.

²⁹Piyang'anireni mwadidi mpakana pikafike ku Nyumba ya Mulungu. Kweneko m'masubi a anyansembe pipimeni mbamupipereke kuna anyansembe akulu na Alevi na kuna akadamu a Aisraele ku Yerusalemu.”

³⁰Tenepo anyansembe na Alevi adakwata siliva, golidi na pyombo kuti aende napyo ku Nyumba ya Mulungu ku Yerusalemu.

³¹Pansiku yakhumi na chiwiri ya mwezi wakutoma, tidabuluka pa Mgelo wa Ahava kwenda ku Yerusalemu. Mulungu wathu akhali nafe mbatitchinjiriza kuna anyamalwa na anyakutibisalira pikhafamba ife.

³²Pidafika ife ku Yerusalemu tidapuma nsiku zitatu.

³³Kubuluka penepo pansiku yachinayi tidenda ku Nyumba ya Mulungu mbatipima golidi, siliva na pyombo mbatipipereka kuna nyansembe, Meremoti, mwana Uria. Iye akhali pabodzi pene na Eleazara mwana Finiasi pontho Alevi awiri, Yozabadi mwana Yeshua na Naodia mwana Binui.

³⁴Pyonsene pidalengeswa mbipipimwa mwadidi mwene mbipilembwa na ndzidzi onthowo.

³⁵Onsene ale akhadabwerera kubulukira kudziko ya unyaperezo adadza mbapereka nsembe zakupyerera kuna Mulungu wa Israele, ng'ombe zimuna khumi na ziwiri kuimirira Aisraele onsene, mabira amuna makumafemba na atanthatu, pontho anabira makumanomwe na anomwe. Iwo adapereka pontho nsembe mbuzi khumi na ziwiri kuti zikhale nsembe zakubulusira pyakudawa. Nyama zonsenezi zidaperekwa kuna MBUYA kuti zikhale nsembe zakupyerera.

³⁶Iwo adakwata pontho kalata idaapasa mfumu mbakaipereka kuna akulu a boma na kuna mathubu a m'nthemba yakumadokero dzuwa a mkulo wa Yufurate, alembo adadza dzaphedza anthu, pontho na basa ya pa Nyumba ya Mulungu.