Read cisena NEHEMIA 1 Bible Online

NEHEMIA 1 - cisena bible

NEHEMIA 1

¹Awa ndi mafala a Nehemia mwana Hakalia: Mwezi wa Kisilevi chaka chamakumawiri ndzidzi ukhatonga Mfumu Aritaserisese, ine Nehemia ndikhali ku Susa mzinda ukulu.

²Mbaleanga Hanani adadza kubulukira ku Yuda pabodzi pene na amuna anango mbandiavunza pya Yerusalemu na pya Ayuda, ale akhadabwerera kubulukira ku[1] Babiloni m'dziko ya unyaperezo.

³Iwo adandipanga kuti ale akhadasala na moyo mbabwerera kudziko kwawo[2] akhali panyatwa zikulu pontho kuti alendo akhakhala chifupi na iwo ale, adaalulupisa. Iwo adandipanga kuti mpanda wa Yerusalemu wagwa, pontho misuwo yache yavungwa na moto.

⁴Pidava ine pyonsenepi ndidakhala pansi mbandilira. Ine ndidasintili mbandipimana kudya nsiku zizinji zene mbandipemphera pamaso pa Mulungu wa kudzulu.

⁵Ine ndidalonga kuti, “MBUYA Mulungu wa kudzulu. Ndimwe wamkulu pontho wakugopeka, ule ambakoya chiverano chache mbaonesa kuafuna kwache kokhonda mala anthu ale ambamfuna mbavera matongero ache.

⁶Ikhani khutu na kufungula maso anu kuna kupemphera kwa nyabasanu, ule akupempherera anyabasanu, Aisraele, mosiku na masikati. Ine ndikutawira kuti ife Aisraele tadawa. Makolo anga na ine tadawa.

⁷Ife takudawirani, pontho ife sidachite malingana na matongero anu tayu. Ife sidakoye mwambo wanu udatipasa imwe kudzera muna Mose, nyabasanu ule tayu.

⁸Chinchino kumbukani pidapanga imwe Mose pile kuti, ‘Ngakhala imwe Aisraele munakhonda kukhulupirika kuna ine, ine ndinakubalalisani pakati pa madzinza anango.

⁹Mbwenye ngakhala munabwerera kuna ine mbamuchita pinthu pidakutongani ine pile, ine ndinakubwezerani kumbuto idasankhula ine kuti ndipembedzwemo ile, podi kwene kuti imwe mwabalaliswa kumadolomero a dziko yapansi.’

¹⁰“Mbuya awa mbanyabasanu, anthu anu adapulumusa imwe na mphamvu zanu zikulu ale.

¹¹Veserani kupemphera kwanga pontho na kupemphera kwa anyabasanu anango onsene, ambafuna kudzesa chilemedzo kuna dzinanu ale. Chitisani ine, nyabasanu, kukhala wakupikwanisa mbamuchitise Mfumu kundikomera mtima.” Ndzidzi wenewo ine ndikhali nyakufiliviri vinyu kuna mfumu.