Read cisena NEHEMIA 11 Bible Online

NEHEMIA 11 - cisena bible

NEHEMIA 11

¹Akadamu adakhazikika mu Yerusalemu, tenepo anthu anango onsene adachita ntsango kufuna kusankhula banja ibodzi pamabanja khumi onsene ile idathema kwenda kakhala mumzinda wakupambulika wa Yerusalemu, mwenemo anango adapangwa kakhala kumizinda na kumaluwani anango.

²Tenepo anthu adasimba anthu anango onsene ale adapipereka mwakufuna kwawo kukhazikika mumzinda wa Yerusalemu.

³M'maluwani anango a nthemba ya Yuda, Aisraele, anyansembe, Alevi, anyakuphata basa m'Nyumba ya Mulungu na pidzukulu pya anyabasa a Solomoni, adakhala kumisa kwawo m'maluwani mwawo. Madzina ali m'tchindemu mbakadamu a nthemba ya Yuda ale akhakhala mumzinda wa Yerusalemu.

⁴Anthu a m'dzinza ya Yuda: Ataia, mwana Uzia pontho mdzukuluache Zekaria. Makolo ache anango nkhuthimizapo Amaria, Shefatia, na Mahalalele, pidzukulu pya Perezi mwana Yuda.

⁵Maaseia mwana Baruki pontho mdzukuluache Kolihoze. Makolo ache anango nkhuthimizapo Hazaia, Adaia, Yoiaribu na Zekaria pidzukulu pya Shela mwana Yuda.

⁶Pakati pa pidzukulu pya Perezi amuna akuveka madzana manayi na makumatanthatu na asere akhakhala mu Yerusalemu.

⁷Anthu a m'dzinza ya Benjemani: Salu mwana Meshulamu pontho mdzukuluache Yoedi. Makolo ache anango nkhuthimizapo Pedaia, Kolaia, Maaseia, Itiele na Yeshaia.

⁸Gabai na Salai, abale ache Salu chadi-chadi. Pakati pa anthu onsene, anthu madzana mafemba na makumawiri na asere ndiye adakhala mu Yerusalemu.

⁹Yowele mwana Zikiri ndiye akhali mkadamu wawo, pontho Yuda mwana Hasenua akhali mkadamu wachiwiri wa mzindawo.

¹⁰Anyansembe: Yedaia mwana Yoiaribu, na Yakini.

¹¹Seraia mwana Hilikia pontho mdzukuluache Meshulamu. Makolo ache nkhuthimizapo Zadoki, Meraioti na Ahitubu, ule akhali Nyansembe Wamkulu.

¹²Pakati pa anthu onsene anthu madzana masere na makumawiri na awiri ndiye adatumikira m'Nyumba ya Mulungu; Adaia mwana Yerohamu pontho mdzukuluache Pelalia. Makolo ache nkhuthimizapo Amizi, Zekaria, Pashuri na Malikia.

¹³Pakati pa anthu onsene anthu madzana mawiri na makumanayi na awiri akhali akadamu a mbumba; Amashisai mwana Azarele pontho mdzukuluache Ahizai. Makolo ache nkhuthimizapo Meshilemoti na Imeri.

¹⁴Pakhali anthu dzana na makumawiri na asere a mbumba yeneyi ale akhali anyankhondo akuveka. Mkadamu wawo akhali Zabidiele mwana Hagedolimu.

¹⁵Alevi: Shemaia mwana Hashubu pontho mdzukuluache Azirikamu. Makolo ache nkhuthimizapo Hashabia na Buni.

¹⁶Shabetai na Yozabadi, Alevi akuveka akuyang'anira basa ya m'Nyumba ya Mulungu;

¹⁷Matania mwana Mika pontho mdzukuluache Zabidi, chidzukulu cha Asafu. Iye akhatsogolera gulu ya anyakuimba nyimbo kuimba nyimbo zakupereka nazo takhuta kuna Mulungu. Bakibukia ule akhali nyakuphedzera Matania. Abada mwana Shamua pontho mdzukuluache Galali, chidzukulu cha Yedutuni.

¹⁸Pakati pa anthu onsene, Alevi madzana mawiri na makumasere na anayi ndiye adakhala mumzinda wakupambulika wa Yerusalemu.

¹⁹Anyakulondali Nyumba ya Mulungu: Akubu, Talimoni na abale ache, onsene akhalipo dzana na makumanomwe na awiri.

²⁰Aisraele anango onsene pabodzi pene na anyansembe na Alevi akusalira akhakhala m'maluwani a mu Yuda, kada munthu mbuto idamsiyira makolo ache.

²¹Anyakuphata basa ku Nyumba ya Mulungu akhakhala kukhundu inango ya Yerusalemu yakuthulwa Ofele, akadamu awo mbakhala Ziha na Gishipa.

²²Mkadamu wa Alevi akhakhala mu Yerusalemu ule dzinache ikhali Uzi, mwana Bani pontho mdzukuluache Hashabia. Makolo ache nkhuthimizapo Matania na Mika, pontho mbumbawo ikhali ya Asafu; Basa yawo ikhali kuimba nyimbo ndzidzi wa chipembedzo m'Nyumba ya Mulungu.

²³Akhali pansi pa matongero a mfumu akulonga pya buswawo pakutsogolera nyimbo m'Nyumba ya Mulungu nsiku na nsiku.

²⁴Petahia mwana Meshezabele wa mbumba ya Zera pontho wa dzinza ya Yuda, akhali phungu wa mfumu wa ku Peresia papinthu pyakulonga Aisraele.

²⁵Anthu azinji adakhala m'maluwani a chifupi na mindawo. Anthu anango a m'dzinza ya Yuda adakhala ku Kiriati-Ariba, Diboni, na Yekabizele, pontho na midzi yakuzungulira mizinda yeneyi.

²⁶Iwo akhakhala pontho m'mizinda ya Yeshua, Molada, Beti-Peleti,

²⁷na Hazari-Shuali, pontho mu Beeresheba na midzi yakuzungulira.

²⁸Iwo akhakhala mumzinda wa Zikilagi, Mekona na midzi yache,

²⁹mu Enirimoni, mu Zora, mu Yarimuti,

³⁰mu Zanoa, mu Adulamu, na midzi yachifupi na maluwani enewa. Iwo akhakhala mu Lakishi pontho na m'minda yachifupi, mu Azeka na midzi yache. Penepa nkhulonga kuti anthu a ku Yuda adakhala m'nthemba ya pakati pa Beeresheba na phedi ya Hinomu.

³¹Anthu a dzinza ya Benjemani adakhala pa Geba, Mikimashi, Ai, Betele na midzi yachifupi,

³²Anatoti, Nobu, Anania,

³³Hazori, Rama, Gitaimu,

³⁴Hadidi, Zeboimu, Nebalati,

³⁵Lodi na Ono, pontho na Phedi ya Amisiri.

³⁶Magulu anango a Alevi ale adakhala m'nthemba ya Yuda adapangwa kakhala pabodzi pene na anthu a Benjemani.