Read cisena NEHEMIA 13 Bible Online

NEHEMIA 13 - cisena bible

NEHEMIA 13

¹Ndzidzi ukhawerengwa mwambo wa Mose mwakugaluza fala kuna anthu, iwo adafika pandima ile ikhalonga kuti nee munthu wa ku Amoni penu wa ku Moabu athema kuphatizana na anthu a Mulungu tayu.

²Penepi pikhali tenepo thangwi Aamoni na Amoabu hadapase Aisraele pyakudya na madzi tayu, ndzidzi ukhabuluka iwo m'dziko ya Iguputo. M'mbuto mwache iwo adadyekera Balamu na kobiri kuti atemberere Aisraele, mbwenye Mulungu wathu adasanduza dzedzeyo kukhala mtsanzayiso.

³Pidava Aisraele mwambo wenewu, adabulusa alendo onsene pakati pawo.

⁴Eliashibu, nyansembe akhali mkadamu wakuyang'anira masubi akukoyeramo pinthu m'Nyumba ya Mulungu. Iye akhali mbaleache Tobia wakusemberana naye,

⁵tenepo adampasa subi ikulu, ile pakutoma ikhaphatiswa basa kukoyeramo pyakupereka pya mapira na pyakufukiza pyakununkhira na pyombo pya m'Nyumba ya Mulungu, pontho na chakhumi na vinyu wachinchino, mafuta aolivi akuperekwa kuna Alevi, anyakuimba nyimbo na anyakulondali ku Nyumba ya Mulungu.

⁶Ndzidzi ukhachitika penepi, ine nee ndikhali mu Yerusalemu tayu, thangwi chaka chamakumatatu na chiwiri pikhatonga Mfumu Aritaserisese[10] dziko ya Babiloni ndikhadabwerera kuna iye kampanga pyonsene pikhachitika pile. Pidagwanda ndzidzi pang'ono ndidampempha kuti anditawirise kubwerera,

⁷tenepo ndidabwerera ku Yerusalemu. Kweneko ine ndidagumana kuti Eliashibu akhadachita chinthu chakuipa kutawirisa Tobia kuphatisa basa subi ibodzi ya m'Nyumba ya Mulungu.

⁸Ine ndidadzidzwa napyo mtima mbanditayira panja pinthu pyonsene pile pikhali pya Tobia.

⁹Ine ndidatonga kuti pachitike mwambo wakuchenesa nawo subiyo, pontho kuti pyombo pya m'Nyumba ya Mulungu, pyakupereka pya mapira pontho na pyakufukiza pyakununkhira pibwezerwe m'mbuto mwache.

¹⁰Ndidagumana pontho kuti anyakuimba nyimbo m'Nyumba ya Mulungu na Alevi anango akhadabuluka mu Yerusalemu kubwerera kumazunde kwawo, thangwi anthu hakhadaapasa tayu pinthu pidathema iwo kutambira.

¹¹Ine ndidasumulula mathubu mbandiavunza kuti, “Thangwi yache ninji mwasiya Nyumba ya Mulungu gwamwa tenepa?” Tenepo ine ndidadzesa pontho Alevi ku Nyumba ya Mulungu na anyakuimba nyimbo ene mbandiachitisa kutoma pontho kuphata basa.

¹²Tenepo Aisraele onsene adatoma pontho kudza na pyakupereka kumasubi akukoyeramo pinthu a m'Nyumba ya Mulungu; chakhumi cha mapirawo, vinyu, na mafuta aolivi.

¹³Ine ndidaikha amuna awa kukhala anyakuyang'anira masubi enewa: nyansembe Shelemia, Zadoki nyakudziwisa mwambo, na Pedaia Mlevi. Hanani mwana Zakuri pontho mdzukuluache Matania ndiye akhali nyakuaphedzera. Ine ndidaanyindira anthu enewa kuti anagawiza pinthu pakati pa anyabasa anzawo mwakuona mtima.

¹⁴Ndikumbukeni thangwi ya penepi, Imwe Mulungu wanga, pontho lekani duwalira na pang'ono pene pinthu pyonsene pyachitira ine mwakukhulupirika Nyumba ya Mulungu wanga na mabasache ene.

¹⁵Pandzidzi wenewo ndidaona anthu anango mu Yuda akutchitchitha vinyu pa Nsiku Yakupuma. Anango akhapakiza pabulu pawo mapira, vinyu, mfesa, nkhuyu, na pinthu pinango kwenda napyo ku Yerusalemu. Natenepo ndidaasumulula kuti aleke gulisa pinthu pa Nsiku Yakupuma.

¹⁶Anthu anango a kumzinda wa Turo akhakhala mu Yerusalemu, tenepo adadza mumzinda na nsomba pontho na pyakudya pya mtundu onsene mbapigulisa kuna anthu athu pa Nsiku Yakupuma.

¹⁷Ine ndidasumulula akadamu a Chiyuda mbandilonga kuna iwo kuti, “Yang'anani pinthu pyakuipa pinachita imwepi. Imwe mukuchitisa Nsiku Yakupuma kukhala nsiku yokhonda chena pamaso pa Mulungu.”

¹⁸Ndi thangwi yache Mulungu adatchunyusa makolo anu pidavunga iye mzindawu. Kwache imwe mukukakamira basi kuti ukali wa Mulungu udze pana Israele pakuswipisa Nsiku Yakupuma.

¹⁹Natenepo ndidatonga kuti misuwo ya mzinda ikhale yakufungwa pa Nsiku yonsene Yakupuma sindzidzi dzuwa nkhuthobila,[11] mbifungulwa pakumala pa Nsiku Yakupuma. Ine ndidaikha anango a amunanga pamisuwo ya mzindawo kuonesesa kuti nkhabe na chinthu chene chikupita mumzindamo pa Nsiku Yakupuma.

²⁰Kabodzi penu kawiri anyamalonda akugulisa pinthu pya mtundu onsene akhagona kunja kwa mzinda.

²¹Tenepo ine ndidaacheuza kuti, “Nkhabe basa tayu kudikhira kunja kwa mzinda kuti machibese akwane. Ngakhala imwe munayesa pontho kuchita penepi, ine ndinaphatisa basa njira zavinga pana imwe.” Kubuluka ndzidzi wenewo kwenda m'tsogolo nkhabe na mbodzi ene adadza pa Nsiku Yakupuma tayu.

²²Ine ndidatonga Alevi kupichenesa okha ene pontho kuti aende kayang'anira pamisuwo ya mzinda kuonesesa kuti Nsiku Yakupuma ikhale yakuchena. Ndikumbukeni pontho thangwi ya penepi, Imwe Mulungu wanga, mbamukoye moyo wanga, thangwi ya kukula kwa kundifuna kwanu kokhonda mala.

²³Pandzidzi wenewo ndidadzindikira pontho kuti Ayuda azinji akhadasemba akazi a ku Ashidodi, Amoni na ku Moabu.

²⁴Anawo anango akhalonga Chiashidodi, penu pilongero pinango pene, mbachimwana kudziwa chilongero chathu, ife Ayuda.

²⁵Ine ndidasumulula amunawa mbandiatemberera. Ndidaamenya mbandiakwedzula tsisi yawo. Kubuluka penepo ndidaapanga kuti adumbire pikulu pene na dzina ya Mulungu kuti na kutani kwene iwo pabodzi pene na anawo hanasemberanave pontho na anthu achilendo tayu.

²⁶Ine ndidalonga kuti, “Mbakazi achilendo onthowa adachitisa Mfumu Solomoni kudawa. Iye akhali munthu wakuveka pyakwanga kupiringana mafumu anango onsene a padziko yapansi. Mulungu adamfuna mbampitisa ufumu wa anthu ache Aisraele. Kwache iye adachita chakudawa ninga chenechi.

²⁷Apo ifembo tive pontho basi kuti mwachita chinthu chakuipa ninga chenechi mbamukhonda vera Mulungu wathu pakusemba akazi achilendo?”

²⁸Yehoiada akhali mwana wamamuna wa Eliashibu, Nyansembe Wamkulu, kwache mbodzi wa ana a Yehoiada adasemba mwana wa Sanibalati wa Chihoroni, tenepo ndidamthamangisa Yehoiada mu Yerusalemu.

²⁹Kumbukani MBUYA mudaswipisira anthu enewa basa ya unyansembe na chiverano chidasasanya imwe na anyansembe, pontho na Alevi chile.

³⁰Ine ndidachenesa anthu kuna pinthu pyonsene pyachilendo; ndidasasanyira anyansembe na Alevi matongero, towera munthu onsene adziwe basache;

³¹ndidasasanya nkhuni zakupyerezera pyakupereka kuti zibwere pandzidzi wache, pontho kuti anthu adze na pyakupereka pyawo pya mapira, pontho nsapo zakutoma tokota. Imwe Mulungu wanga, ndikumbukeni mbamundikomere mtima thangwi ya penepi.