Read cisena NEHEMIA 3 Bible Online

NEHEMIA 3 - cisena bible

NEHEMIA 3

¹Umu ndi mule mudamangirwa mpanda wa mzinda wa Yerusalemu. Nyansembe Wamkulu Eliashibu pabodzi pene na anyansembe anzache adamanga pontho Msuwo wa Mabira. Iwo adaupambulira kuna MBUYA mbauikha pontho m'mbuto mwache mbukhala Nsanja ya Dzana mbaipambula mpakana mbufika pontho ku Nsanja ya Hananele.

²Amuna a ku Yeriko adamanga khundu inango, Zakuri mwana Imri adamangambo khundu inango.

³Mbumba ya Hasena ndiye idamanga Msuwo wa Nsomba. Iwo adaikha matabwa na misuwo yache ene m'mbuto mwache, mbaikha pyakumangira pya mazinga na mphinga zasimbi.

⁴Meremoti mwana Uria pontho mdzukuluache Hakozi adamanga khundu inango. Meshulamu mwana Berekia pontho mdzukuluache Meshezabele adamanga khundu inango, Zadoki mwana Baana adamangambo khundu inango.

⁵Amuna a ku Tekoa adamanga khundu inango, kwache akulu-akulu a mumzindamo adakhonda kuphata basa idapaswa iwo na anyakuyang'anira basa ale.

⁶Yoiada mwana Pasea pabodzi na Meshulamu mwana Besodeia adamanga Msuwo wa Yeshana.[3] Iwo adaikha matabwa na misuwo yache ene m'mbuto mwache, mbaikha pyakumangira pya mazinga na mphinga zasimbi.

⁷Melatia wa ku Gibeoni, Yadoni wa ku Meronoti na amuna a ku Gibeoni na ku Mizipa adamanga khundu inango mpakana kunyumba ya mkulu wa boma ya nthemba yakumadokero dzuwa a mkulo wa Yufurate.

⁸Uziele mwana Harihaia nyakufula golidi adamanga khundu inango. Hanania nyakusasanya mafuta akununkhira adamangambo khundu inango mpakana ku Fufu ya Ntchindu.

⁹Refaia mwana Huri mtongi wa khundu inango ya nthemba ya Yerusalemu adamangambo khundu inango.

¹⁰Yedaia mwana Harumafu adamangambo khundu inango, ikhali chifupi na nyumbache ile. Hatushi mwana Hashabineia adamangambo khundu inango.

¹¹Malikia mwana Harimu na Hashubu mwana Pahati-Moabu adamangambo khundu inango, pontho na Nsanja ya Mauvuni.

¹²Shalumu mwana Haloheshi, mtongi wa khundu inango ya nthemba ya Yerusalemu adamangambo khundu inango. Anache achikazi adamphedza basayo.

¹³Hanuni na mzika za mzinda wa Zanoa adamanga pontho Msuwo wa Kuphedi. Iwo adaikha matabwa na misuwo yache ene m'mbuto mwache, mbaikha pyakumangira pya mazinga na mphinga zasimbi. Iwo adasasanya pontho fufu yakulapha makhono madzana manayi na anayi mbafika ku Msuwo wa Khuku.

¹⁴Malikia mwana Rekabu mtongi wa nthemba ya Beti-Hakeremu adamanga pontho Msuwo wa Khuku. Iye adaikha matabwa na misuwo yache ene m'mbuto mwache, mbaikha pyakumangira pya mazinga na mphinga zasimbi.

¹⁵Shalumu mwana Kolihoze mtongi wa nthemba ya Mizipa adamanga pontho Msuwo wa Mphuno ya madzi. Iye adaikha nsoyi padzulu pa msuwo mbaikha matabwa na misuwo yache ene m'mbuto mwache, mbaikha pyakumangira pya mazinga na mphinga zasimbi. Pathawale ya Shela iye adamanga pontho fufu ya chifupi na munda wachifumu mpakana ku nsikada zakutchithira kubulukira kumzinda wa Davite.

¹⁶Nehemia mwana Azibuku mtongi wa nthemba inango ya Beti-Zuri adamangambo khundu inango ya mpanda mpakana kunthumbi ya Davite, kuthawale na ku Nyumba ya Anyankhondo akuveka.

¹⁷Alevi ale adamanga pontho makhundu anango azinji a mpanda mbawa: Rehumu mwana Bani adamangambo khundu inango; Hashabia mtongi wa khundu inango ya nthemba ya Keila adamangambo khundu inango m'mbuto mwa anthu a m'nthemba mwache;

¹⁸Bavai mwana Henadadi mtongi wa nthemba inango ya Keila adamangambo khundu inango;

¹⁹Ezeri mwana Yeshua mtongi wa Mizipa adamanga khundu inango kunkhope kwa nyumba yakukoyeramo pida pyankhondo mpakana pambuto padagonya fufu;

²⁰Baruki mwana Zabai adamangambo khundu inango mpakana kumsuwo wa nyumba ya Eliashibu, Nyansembe Wamkulu;

²¹Meremoti mwana Uria pontho mdzukuluache Hakozi adamangambo khundu inango mpakana kumadolomero a nyumba ya Eliashibu.

²²Awa mbanyansembe ale adamangambo makhundu anango azinji a mpanda: Anyansembe a kunthemba yakuzungulira Yerusalemu adamangambo khundu inango;

²³Benjemani na Hashubu adamangambo khundu inango ile ikhali mwakuyang'anisana na nyumba zawo; Azaria mwana Maaseia pontho mdzukuluache Anania adamangambo khundu inango ile ikhadayang'anisana na nyumbache.

²⁴Binui mwana Henadadi adamangambo khundu inango, kubulukira kunyumba ya Azaria mpakana padagonya fufu.

²⁵Palali mwana Uzai adamangambo khundu inango, kubulukira padagonya mpanda na nsanja ya nyumba yachifumu ya padzulu chifupi na chintalo cha anyakulondali. Pedaia mwana Paroshi adamangambo khundu inango kunkhomo yakumabulukiro dzuwa chifupi na Msuwo wa Madzi pontho na nsanja ya anyakulondali ku Nyumba ya Mulungu. (Yeneyi ikhali khundu ya mzinda yakuchemerwa Ofele, kukhakhala anyakuphata basa pa Nyumba ya Mulungu ale.)

²⁷Amuna a ku Tekoa adamangambo khundu inango, khundu yawo yachiwiri kuimanga, kubulukira kunkhomo yakuyang'anisana na nsanja ikulu ya anyakulondali ku Nyumba ya Mulungu mpakana kufufu chifupi na Ofele.

²⁸Gulu ya anyansembe adamangambo khundu inango kwendera kumpoto kubulukira ku Msuwo wa Akavalo kada munthu kumanga mwakuyang'anisana na nyumbache.

²⁹Zadoki mwana Imeri adamangambo khundu inango ikhadayang'anisana na nyumbache ile. Shemaia mwana Shekania, nyakulondali Msuwo wa Kumabulukiro dzuwa, adamangambo khundu inango.

³⁰Hanania mwana Shelemia pabodzi pene na Hanuni mwana wachitanthatu wa Zalafu adamangambo khundu inango; yeneyi ikhali khundu yawo yachiwiri kuimanga. Meshulamu mwana Berekia adamangambo khundu inango, ile ikhali mwakuyang'anisana na nyumbache.

³¹Malikia nyakufula golidi adamangambo khundu inango mpakana kunyumba ikhakhala anyakuphata basa pa Nyumba ya Mulungu na anyakuchita malonda, ile ikhali chifupi na Msuwo wa Mifikadi chifupi na subi yapadzulu kunkhomo yakumabulukiro dzuwa ya fufu.

³²Anyakufula golidi na anyakuchita malonda adamangambo khundu yakumalisira kubulukira kusubi pankhomo mpakana ku Msuwo wa Mabira.