Read cisena NEHEMIA 4 Bible Online

NEHEMIA 4 - cisena bible

NEHEMIA 4

¹Pidapiva Sanibalati kuti ife tikhamanga pontho mpanda, iye adaswirizwa napyo mbatoma kutisedegula. Iye adatitikana ife Ayuda.

²Pamaso pa anzache na anyankhondo a ku Samaria adalonga mbati, “Ayuda akusowa mphamvuwa akuchitanji? Ayi iwo anamanga pontho mpanda? Ayi iwo anapereka nsembe, pontho kumalisa basa pansiku ibodzi basi? Ayi iwo angakwanise kusasanya miyala yakumanga nayo kubulukira kumulu wa madongolomwa akupiswa motowa?”

³Tobia adaimira penepo m'khundu mwache mbathimiza kulonga mbati, “Ayi mpanda unafuna iwo kumangawo ngwakutani? Podi na mbinzi ene ungakwirapo unakwanisa kuugwisa.”

⁴Ine ndidapemphera kuti, “Mulungu ngavesereni kutisedegula kunachita iwoku. Chitisani kutisedegula kunachita iwoku kugwere pamsolo pawo. Iwo mbaberwe pinthu pyonsene pina iwo, pontho mbakwatwe kukhala anyaperezo kudziko yachilendo.

⁵Lekani kualekerera pyakuipa pinachita iwopi, pontho lekani duwalira pyakudawa pyawo, thangwi iwo atitikana ife, ale tikumanga mpanda.”

⁶Ife tidathimiza kumanga mpanda ule. Chengo chache chidafika kati na kati, thangwi anthu akhali na chipapu kufuna kuphata basa.

⁷Sanibalati, Tobia na anthu a ku Arabia, Amoni na Ashidodi adava kuti basa yakumanga mpanda wa Yerusalemu ikhaenda m'tsogolo, pontho kuti mipata ikhali m'mafufu ile idafungiswa, tenepo iwo adazhangali napyo pyakwanga.

⁸Natenepo iwo onsene adasasanya pya kudza ku Yerusalemu dzasosa anthu, pontho kuadzudzumisa pa basawoyo,

⁹mbwenye ife tidapemphera kuna Mulungu wathu, pontho mbatiikha anyakulondali mosiku na masikati gopesera anyamalwathu.

¹⁰Anthu a ku Yuda akhali na nyimbo yawo ikhaimba iwo: “Mphamvu za anyakuphata basa zikumala! Pana madongolomwa azinji kuti tiataye! Apo ife tinakwanisa tani kumanga mafufuwo lero?”

¹¹Anyamalwathu akhanyerezera kuti ife nee tinaaona, penu kudziwa pinthu pinachita iwo tayu mpakana iwo atigundikiza mbatipha, towera basayi ilekeke.

¹²Mbwenye ndzidzi uzinji Ayuda, akhakhala pakati pa anyamalwathu ale, akhadza dzaticheuza pya pinthu pikhasasanya anyamalwathu kuchita.

¹³Tenepo ndidapanga anthu kuti aphatire matalasada, madipa na mauta mbandiaikha malingana na mabanjawo kunduli kwa mafufu ponsene pale pakhali pokhonda mala.

¹⁴Ine ndidaona kuti anthu adaswipa mtima, natenepo ndidalonga kuna iwo na kuna akadamu awo kuti, “Lekani chita mantha na anyamalwathuwa. Kumbukani Mbuya, ule ngwamkulu pontho wakugopeka, pontho menyerani nkhondo abale anu, ananu, akazanu pontho na pya m'nyumba mwanu mwene.”

¹⁵Anyamalwathu adapiva kuti ife tadziwa pinthu pidasasanya iwo kupichita kuna ife, pontho iwo adadzindikira kuti Mulungu adadzudzumisa pidasasanya iwo pile. Natenepo tonsene tidabwerera kumanga pontho mpandawu.

¹⁶Kubuluka ndzidzi wenewo anango a amunanga adaphata basa mwenemo, anangombo uku aphatira madipa, pyakugedera matswimo, mauta pontho kuvala pida pyankhondo gopesera anyamalwathu. Akadamu athu adaphedza monsene mwene anthu a ku Yuda

¹⁷akhamanga pontho mafufu ale. Podi na ale ene akhathukula pyakumangira, akhaphata basa na mkono ubodzi uku aphatira chida kumkono unango,

¹⁸pontho anyakumanga onsene adamala feka matalasada m'chuno mwawo. Munthu akhaliza ngoma ule, akhali na ine pano.

¹⁹Ine ndidapanga anthu, mathubu awo na akadamu awo kuti, “Basayi ikuphatika pyakwanga pontho yakula pyakwanga mwakuti mpanda wakulapha watilekanisa kuna unango na mwanzache.

²⁰Ngakhala imwe munava kulira kwa ngoma gumanyikanani mwakundizungulira. Mulungu wathu anatimenyera nkhondo.”

²¹Natenepo nsiku zonsene kutomera m'makalakwecha mpakana nyenyezi kubuluka na mosiku, anango a amunanga akhaphata basa mwenemo anangombowo akhaonera uku aphatira madipawo.

²²Ndzidzi wenewu ndidapanga amuna akhayang'anira ale kuti iwo pabodzi pene na anyakuphedzera onsene akhale mu Yerusalemu na mosiku, towera ife tiyang'anire mzinda na mosiku mbatiphata basa na masikati.

²³Podi na mosiku ene ine sidadule nguwo zanga tayu, nee anzanga, anyabasa penu anyakuyang'anira, kugopesera anyamalwa. Tenepo tonsene tidaphatira pida m'manja mwathu.