Read cisena NEHEMIA 5 Bible Online

NEHEMIA 5 - cisena bible

NEHEMIA 5

¹Pidagwanda ndzidzi ene anthu azinji, amuna na akazi ene, adatoma kudungunya thangwi ya Ayuda anzawo.

²Anango adalonga mbati, “Ife tina mabanja akulu-akulu. Tenepo tinafuna mapira towera tikhale na moyo.”

³Anango adalonga mbati, “Ife tikuchitisa pinyolo mindathu, mindathu yamfesa na nyumba zathu zene kuti tigumane mapira akukwana towera tileke kufa na njala.”

⁴Anangombo akhalonga mbati, “Ife tikufiyali kobiri towera tikhomere msonkho mindathu na minda yamfesa kuna mfumu.

⁵Ife ndife a dzinza ibodzi ene na Ayuda anzathuwa. Ayi anathu si sasawa na anawo tayu? Ife tikukhakhamizwa kupereka anathu kuti akhale mabitchu mwakuti anathu anango achikazi aguliswa kale ninga mabitchu. Ife nkhabe pakuphata tayu, thangwi mindathu na minda yamfesa yamala pokoserwa.”

⁶Pidava ine kudungunya kwawo ndidazhangali pyakwanga,

⁷mbandinyerezera kuchitapo pinthu. Ine ndidalongera mathubu na akadamu kuti, “Imwe mukupondereza abale anu.” Ine ndidagumanyisa mgumano wa anthu onsene kuti ndimalise pinthu penepi,

⁸mbandilonga kuti, “Ninga mwapikwanisira ife, taombola Ayuda anzathu, ale adaguliswa ninga mabitchu a anthu achilendo. Apo chinchino mukukhakhamiza abale anu kupigulisa ninga mabitchu kuna imwe Ayuda anzawo!” Akadamu ale adamatama mbasowa chakulonga.

⁹Tenepo ine ndidalonga kuti, “Pinachita imwepi mphyakuipa! Imwe mwathema kuvera Mulungu mbamuchita pinthu pyakulungama. Penepo imwe nee mbamudachitisa anyamalwathu, anthu okhonda khala Ayuda, kutiselusa tayu.

¹⁰Ine, abale anga na anyabasanga adafiyalisambo anthu kobiri na mapira, tenepo mbatilekeni kuchitisa katapira.

¹¹Bwezerani mindawo, mindawo yamfesa na yaolivi, pontho misawo kabodzi kene. Apagalini katapira adatambira imwe kubulukira pa mapira, kobiri, vinyu, na mafuta aolivi.”

¹²Akadamu adatawira mbati, “Ife tinachita ninga munalongera imwe. Ife tinati tibwezere pinthu pidakwata ife. Ife nkhabeve funa kuti atipase chinthu na chibodzi chene tayu.” Ine ndidachemeresa anyansembe mbandichitisa akadamu ale kudumbira pamaso pawo kuti anakoya pikhadapangana ife pile.

¹³Tenepo ine ndidadula mthimbalimba[4] ukhadamanga ine m'chuno mwanga ule mbandiugubudza pontho mbandilonga kuti, “Umu ndi mule munafuna Mulungu dzagubudzira munthu onsene wa imwe anaswa pinthu pyapangana ife pile.” Ine ndidalonga kuti, “Mulungu anakupokoserani misanu, pontho na pinthu pyonsene pina imwe mbakusiyani chimanja-manja.” Munthu onsene ule akhali penepo adalonga mbati, “Ameni, pontho MBUYA mbakuzwe.” Akadamu adakoya pidadumbira iwo pile.

¹⁴Ndzidzi onsene wa pyaka khumi na piwiri pikhali ine mkulu wa boma wa dziko ya Yuda, kubulukira chaka chamakumawiri cha utongi wa Aritaserisese mpakana chaka chache chamakumatatu na chiwiri, nee abale anga penu ine tidadya tayu pyakudya pidathema ine kutambira ninga mkulu wa boma.

¹⁵Mbwenye mkulu wa boma onsene, ule akhali pampando ine mbindidzati pitapo, adanensa anthu mbaapanga kuti ampase kobiri zasiliva makumanayi nsiku na nsiku padzulu pa pyakudya na vinyu. Podi na anyabasawo ene adaponderezambo anthu. Kwache ine sidapichite ninga mukhachitira iwo tayu, thangwi ine ndikhali munthu wakugopa Mulungu.

¹⁶Ine ndidaikha mtimanga onsene pabasa yakumanga pontho mafufu. Amunanga onsene ndidaagumanyisa pabodzi kuphata basa. Ine sidagule mbuto ninga yanga ene tayu.

¹⁷Ndzidzi uzinji ene ine ndikhadyesa Ayuda dzana na makumashanu pabodzi pene na akadamu awo padzulu pa onsene akhadza kuna ine kubulukira kumadziko akuzungulira ale.

¹⁸Nsiku na nsiku ine ndikhasasanyirwa ng'ombe imuna, mabira adidiletu atanthatu na nkhuku zizinji, pontho kumala kwa nsiku khumi zonsene ine ndikhapereka vinyu wakuinjipa wa mtundu onsene. Kwache ine sidapemphe tayu pinthu pidathema mkulu wa boma kutambira, thangwi ndikhapidziwa kuti penepi pidanensa anthu pyakwanga pene.

¹⁹Imwe Mulungu wanga, ndikomereni mtima mbamukumbuke pinthu pyonsene pyachitira ine anthuwa.