Read cisena NEHEMIA 6 Bible Online

NEHEMIA 6 - cisena bible

NEHEMIA 6

¹Sanibalati, Tobia, Geshemu, na anyamalwathu onsene adapiva kuti tikhadamalisa basa yakumanga mpanda, pontho pakhali nkhabe panango pakusalira tayu, podi kwene kuti tikhadadzati kuikha misuwo m'mbuto mwache tayu.

²Natenepo Sanibalati na Geshemu adatuma anyamphangwa kuna ine kundipanga kuti ndikagumanikane nawo pamudzi ubodzi paphedi ya Ono. Penepa iwo akhafuna kandichita pyakuipa.

³Ine ndidatuma anyamphangwa kalonga kuna iwo kuti, “Ine ndikuphata basa yakufunika, tenepo ine sinakwanisa kwendako tayu. Ine nkhabe tawira kuti basa iimire thangwi ya kudza dzaonana namwe tayu.”

⁴Iwo adanditumira pontho mphangwa ninga zakutoma zile kanayi, kwache ndzidzi onsene ine ndikhatawira chibodzi-bodzi.

⁵Tenepo Sanibalati adatuma mbodzi wa anyabasache na mphangwa kuna ine kachishanu. Ndzidzi wenewu adadza na kalata yakukhonda myatira.[5]

⁶Kalatayo idalembwa tenepa: “Geshemu andipanga kuti mbiri ikuveka pakati pa atsanthembathu kuti iwe na Ayuda munafuna pyakupandukira, tenepo ndi thangwi yache imwe mukumanga pontho mpanda. Iye akulonga pontho kuti iwepo ukusasanya pyakupiikha wekha ene mfumu,

⁷pontho kuti wasankhula maprofeti kulalika mu Yerusalemu kuti, ‘Mu Yuda muna mfumu!’ Mfumu wa ku Peresia anati apive penepi, natenepo idza kuti tikhalirane pansi pa pinthu penepi.”

⁸Ine ndidamtawira kuti, “Nkhabe chakuona na chibodzi chene papinthu pinalonga imwepi. Pinalonga imwepi mphyamumsolo.”

⁹Pyonsene pikhachita iwo nkhufuna kuyesa kutithuswa kunyerezera kuti, “Magogodo awo anati awonzoke kuchimwana kuphata basa, tenepo basayo hinamaliswa tayu.” Mbwenye ine ndidapemphera kuti, “Mulungu, chinchino ene wangisani nkhongono zathu.”

¹⁰Nsiku inango ndidenda kunyumba kwa Shemaia mwana Delaia mdzukuluache Mehetabele, ule adapifungira m'nyumba mwache. Shemaia adalonga mbati, “Tende tikagumanikane m'Nyumba ya Mulungu m'Mbuto Yakuchena mbatifunga misuwo thangwi anthu akudza dzakupha; mosiku uno pano anati adze dzakupha.”

¹¹Mbwenye ndidalonga kuti, “Ayi munthu wache ndine athema kuthawa? Penu athawire m'Nyumba ya Mulungu kupulumusa moyo wache? Ine sinaendako tayu!”

¹²Ine ndidadzindikira kuti Mulungu hadamtume tayu, mbwenye iye adandilongera mphangwa zakunama zauprofeti, thangwi adadyekerwa na Tobia, na Sanibalati.

¹³Iwo adadyekera kuna iye, towera andithuswe kuti ndidawe, towera aipise mbiri yanga mbandilulupisa.

¹⁴Ine ndidapemphera kuti, “Mulungu, kumbukani pinthu pyachita Tobia na Sanibalati mbamuatchunyuse. Kumbukani mkazi ule Noadia na maprofeti anango onsene akhandithuswa ale.”

¹⁵Pidagwanda nsiku makumashanu na ziwiri zakuphata basa, mpanda onsene udamala kumangwa pansiku yamakumawiri na chishanu ya mwezi wa Eluli.[6]

¹⁶Pidava anyamalwathu penepi, madzinza onsene akuzungulira adachita mantha mbanyala, thangwi iwo adadzindikira kuti basa yeneyi idaphatika na chiphedzo cha Mulungu wathu.

¹⁷Pandzidzi wenewu akadamu a Chiyuda akhalemberana makalata na Tobia.

¹⁸Anthu azinji mu Yuda akhali kunduli kwache, thangwi ya tebzalache wa Chiyuda Shekania mwana Ara. Kuthimiza penepo mwanache Yehohanani adasemba mwana Meshulamu mwana Berekia.

¹⁹Anthu akhalonga pamaso panga pinthu pyadidi pidachita Tobia mbampanga pyonsene pikhalonga ine, pontho iye akhathimiza kundilembera makalata kuyesa kundithuswa.