Read cisena NEHEMIA 9 Bible Online

NEHEMIA 9 - cisena bible

NEHEMIA 9

¹Pansiku yamakumawiri na chinayi ya mwezi wache onthowo Aisraele adagumanyikana pabodzi kupimana kudya, towera kuonesa kutsukwala kwawo thangwi ya pyakudawa pyawo. Iwo akhadapipambula kale okha ene kubuluka kuna alendo onsene. Iwo adavala masakha mbapiwaza fumbi mumsolo mwawo kuonesa kutsukwala. Iwo adaimira mbatoma kubweka pyakudawa pidachita iwo na makolo awo ene.

³Mwambo wa MBUYA Mulungu wawo udawerengwa kuna iwo maora matatu, pontho maora anango matatu iwo adabweka pyakudawa mbapembedza MBUYA Mulungu wawo.

⁴Yeshua, Bani, Kadimiele, Shebania, Buni, Sherebia, Bani, na Kenani Alevi ale, adaimira pansikada za chiguwa chile. Iwo adapemphera kuna MBUYA Mulungu wawo mwakugaluza fala.

⁵Alevi awa adachemera anthu kuti apembedze: Yeshua, Kadimiele Sherebia, Bani, Hashabineia, Hodia, Shebania, na Petahia. Iwo adalonga mbati, “Imirani mbamupembedze MBUYA Mulungu wanu! Mkuzeni kwenda na kwenda! Munthu onsene mbakuze dzinache yademelero, podi kwene kuti munthu nkhabe kwanisa kumkuza ninga mwathemera iye tayu.”

⁶Tenepo Aisraele adapemphera tenepa: “MBUYA imwe ene basi ndimwe MBUYA. Kudzulu na nyenyezi zakuthambo mwapisasanya ndimwe. Ndimwe mudasasanya nthunda, bara na pyonsene pili mwenemo. Pyonsenepyo imwe mudapipasa moyo. Gulu yonsene ya kudzulu imbakulambirani kukupembedzani.

⁷MBUYA Mulungu, imwe mudasankhula Abramu, mbamumtsogolera kubuluka mu Uri m'dziko ya Babiloni, pontho mudamtchandula dzinache Abrahamu.

⁸“Imwe mudamgumana kuti akhali munthu wakukhulupirika kuna imwe, mbamuchita naye chiverano. Imwe mudadumbira kumpasa dziko ya Akanani, dziko ya Ahiti, ya Aamori, dziko ya Aperizi, Ayebusi, na Agirigashi kukhala dziko ile ikhafuna kukhalamo pidzukulu pyache. Imwe mudachita pinthu pidadumbira imwe thangwi imwe ndimwe wakukhulupirika.

⁹Imwe mudaona mule mudasanyikira makolo athu kudziko ya Iguputo, Imwe mudava kuchemera kwawo kuti muaphedze pa Nyanza Yakufira.

¹⁰Imwe mudachita pyakudodomesa kuna mfumu, kuna mathubu ache pontho na kuna anthu a dziko yache, thangwi imwe mudadziwa kupondereza anthu anu kukhachita iwo. Tenepo imwe mudapichitisa mwekha ene kuveka ninga muna ipyo lero.

¹¹Panyanza imwe mudasasanyira njira anthu anu mbamuawambusa na pakuuma, Anyakuathamangisa adabira m'madzi akuzwika ninga mwala wakubira m'mabimbi akuzhangali.

¹²Na masikati imwe mudaatsogolera na makole, pontho na mosiku mudaamwinikira njirawo na moto.

¹³Imwe mudatchitha paphiri ya Sinai kubulukira kudzulu. Imwe mudalonga kuna anthu anu mbamuapasa matongero adidi pontho pifunziso pyakuveka.

¹⁴Imwe mudaapanga kukoya Nsiku yanu Yakupuma, pontho kudzera muna nyabasanu Mose, imwe mudaafunzisa matongero anu.

¹⁵“Ndzidzi udava iwo njala imwe mudaapasa pyakudya kubulukira kudzulu, pontho mudaapasa madzi kubulukira m'mwala ndzidzi udava iwo nyota. Imwe mudaapanga kuti apokosere dziko, idadumbira imwe kuna iwo ile.

¹⁶Mbwenye makolo athu adadungudza na kuumisa mtima, mbakhonda kuvera matongero anu.

¹⁷Iwo adakhonda kuvera; iwo adaduwalira pinthu pyonsene pidaachitira imwe. Iwo adaduwalira pyakudodomesa pikhadaachitira imwe. Na kulunkuma kwawo iwo adasankhula mkadamu kuti abwerere naye kudziko ya ubitchu ku Iguputo. Kwache imwe ndimwe Mulungu wakulekerera pyakudawa. Imwe ndimwe nyakukoma mtima, nyakutifuna kokhonda mala pontho nyakusowa chitswu. Imwe ndimwe nyansisi pikulu pontho imwe nee mwaasiya okha tayu.

¹⁸Iwo adasasanya mfanikizo wa mwanamphulu mbalonga kuti yeneyi ikhali milungu idaabulusa ku Iguputo ile. Penepa iwo adakusholani pikulu pene MBUYA.

¹⁹Kwache imwe nee mudaasiye okha tayu m'thando yatchetcha, thangwi imwe muna nsisi pikulu. Imwe nee mudaabulusire tayu makole penu moto, pinthu pikhaaonesa njira na mosiku pontho na masikati pile.

²⁰Na udidi wanu, imwe mudaapangiza pyakuti achite. Imwe mudaadyesa mana, mbamuapasa madzi kuti amwe.

²¹Pyaka makumanayi m'thando yatchetcha imwe mudaapasa pyonsene pikhasowa iwo. Nguwo zawo nee zidasakale tayu, pontho manyalo awo hadabzimbe tayu.

²²“Imwe mudaachitisa kukunda madziko na mafumu, madziko adachita na iwo madire ale. Iwo adakunda dziko ya Heshiboni kukhatonga Sihoni kule, pontho na dziko ya Bashani kukhatonga Ogi kule.

²³Imwe mudaapasa ana azinji ninga nyenyezi za kuthambo, mbamuatawirisa kukunda na kukhala m'dziko idadumbira imwe kuna makolo awo ile.

²⁴Iwo adapokosera dziko ya Akanani. Imwe mudakunda anthu a mwenemo pamaso pawo. Imwe mudaapasa anthu anu mphamvu zakuchita nazo pinthu pyakuakomera kuna anthu pontho na mafumu a ku Kanani.

²⁵Anthu anu adakunda mizinda yakutchingwa na mpanda, madziko akukhala na mataka akubalisa pinthu, nyumba zakudzala na mfuma, michera yakukumbwa kale, miti yaolivi, miti ya nsapo, na minda yamfesa. Iwo adadya pyonsene ninga mukhafunira iwo mbakula manungo; iwo adakomerwa na pinthu pyonsene pyadidi pidaapasa imwe pile.

²⁶“Mbwenye anthu anu adakupandukirani mbakhonda kukuverani. Iwo adapasa nkhodolo mwambo wanu. Iwo adapha maprofeti anu akhaacheuza pya kubwerera kuna imwe ale. Iwo adakusholani kazinji kene.

²⁷Natenepo imwe mudaapereka m'manja mwa anyamalwawo, adaapondereza ale. Na nyatwa zawo zene iwo adakuchemerani kuti muaphedze. Tenepo imwe mudaava kubulukira kudzulu. Na thangwi ya nsisi zanu zikulu, imwe mudaapasa dombo, ale adaaombola m'manja mwa anyamalwawo.

²⁸Sindzidzi mtendere nkhubwerera, iwo adadawa pontho. Imwembo mudaaponya m'manja mwa anyamalwawo kuti aatonge. Kwache pidaleka iwo pyakudawa pyawo mbakupemphani kuti muapulumuse, imwe mudaava kubulukira kudzulu, pontho ndzidzi uzinji ene mudaapulumusa thangwi ya nsisi zanu zikulu.

²⁹Imwe mudaacheuza kuti avere pifunziso pyanu, mbwenye iwo na kulunkuma kwawo adakhonda matongero anu, podi kwene kuti kukoya mwambo wanu ndi njira ibodzi ene basi yakukhala na moyo. Anthu akunensa pontho akuuma mtimawa adakhonda kuvera matongero anu.

³⁰Pyaka pizinji pene imwe mudapirira nawo. Na Mzimu wanu, imwe mudaacheuza kudzera muna maprofeti, kwache iwo hadapiikhe konta tayu. Natenepo imwe mudaaleka pyanu kuti akundwe na madzinza anango.

³¹Mbwenye na thangwi ya nsisi zanu zikulu imwe, nee mudaakhonde penu kuavunga tayu. Imwe ndimwe nyakukoma mtima pontho nyansisi.

³²“Mulungu, Mulungu wathu ndimwe wamkulu pyakwanga! Ndimwe nyakugopeka pontho nyamphamvu zikulu! Imwe mwakoya chiverano chanu mbamutionesa kutifuna kwanu kokhonda mala. Kubulukira pa ndzidzi udatipondereza mafumu a ku Asiria podi na lero ene ife taona nyatwa zikulu! Mafumu athu, akadamu athu, anyansembe athu, maprofeti athu, makolo athu na anthu athu onsene taona nyatwa pikulu pene. Kumbukani pyonsene pyachita ife!

³³Imwe mwachita pyadidi kutitchunyusa. Imwe ndimwe wakukhulupirika podi kwene kuti ife tadawa.

³⁴Makolo athu, mafumu athu na anyansembe anthu, nee takoya mwambo wanu tayu. Iwo hadavere matongero anu pontho na kucheuza kukhachita imwe kule tayu

³⁵Na udidi wanu imwe mudapasa anthu anu ufumu, kwache pikhali iwo m'dziko ikulu pontho ya mataka akubalisa pinthu idaapasa imwe ile, iwo hadakutumikireni tayu, pontho hadaleke pyakudawa pyawo tayu.

³⁶Apo lero ndife mabitchu m'dziko idapasa imwe makolo athu ile, towera iwo akomerwe na nsapo zache pontho pinthu pyache pinango pyadidi pile.

³⁷Pinthu pimbavuna ife pile pimbaenda kuna mafumu adaikha imwe ale, kuti tikhale pansi pa utongi awo, thangwi ife tadawa. Iwo adachita pyonsene pene pinafuna iwo kuna manungo athu na kuna ng'ombe zathu zene. Ife tasanyika pikulu pene.”

³⁸Na thangwi ya pyonsene pidachitika pile, ife anthu a ku Israele tikuchita chiverano chokhonda fudzika pakuchita kulemba, pontho akadamu athu, Alevi athu, na anyansembe athu, akuikha pidindo pyawo penepo.