Read cisena ESTERE 3 Bible Online

ESTERE 3 - cisena bible

ESTERE 3

¹Pidagwanda ndzidzi pang'ono Mfumu Ahasuwero adakwiza Hamani pachidzo mbakhala thubu wamkululetu kupiringana anzache onsene. Hamani akhali mwana Hamedata, chidzukulu cha Agagi.[4]

²Mfumu adatonga kuti mathubu ache onsene muufumu wache alemedze Hamani pakumgodamira na kulamba pamaso pache. Onsene adachitadi penepyo kupambula Moredekai, ule adakhonda kuchita tenepo.

³Mathubu anango a muufumu ule adamvunza thangwi idamkhondesa kuvera matongero a mfumu;

⁴nsiku na nsiku iwo adamdembetera kuchita pidatonga mfumu pile, mbwenye iye hadaavere tayu. Iye adalonga mbati, “Ine ndine Myuda, pontho ine nkhabe kwanisa kulambira Hamani tayu.” Natenepo iwo adampanga Hamani pya penepi na manyerezero akuti mwinango iye apirire na makhaliro a Moredekai.

⁵Hamani adazhangali pyakwanga pidadzindikira iye kuti Moredekai hakhamgodamira pontho kumulambira tayu,

⁶pontho pidadziwa iye kuti Moredekai akhali Myuda, iye adanyerezera kuchita pikulu pene kusiyana na kupha Moredekai yekha basi. Iye adanyerezera pyakupha Myuda onsene muufumu wa Aperesi.

⁷Chaka chakhumi na chiwiri cha ufumu wa Ahasuwero, mwezi wakutoma wa Nisani, Hamani adatonga kuti ntsango ichitike (iwo akhauthula Purimu) kuti agumane nsiku na mwezi wakuthema kuchita pinthu pikhadasasanya iye pile. Nsiku yakhumi na chitatu ya mwezi wakhumi na chiwiri, mwezi wa Adara, ndiye udasankhulwa.

⁸Natenepo Hamani adapanga mfumu mbati, “Pana mtundu unango wa anthu, ule wafalikira konsene kwene muufumu wanuwu. Iwo akukhala m'nthemba zonsene mbakoya mitemo yawo yakusiyana na anango onsene. Padzulu pa penepo iwo nkhabe vera matongero a muufumuwu tayu, natenepo penepi si pyadidi tayu kuna imwe kuti mulile kupiyang'ana kwene.

⁹Ngakhala pinakukomerani mfumu, tongani kuti anthu enewa aphiwe. Ngakhala munachita tenepo, ine ndinadumbira kuti ndinaikha siliva wakulemera makilogramu pikwi madzana matatu na makumanayi kuthumba ya mfumu kuti ziphatiswe basa kufambisira ufumuwu.”

¹⁰Mfumu adadula mphete ya m'chala mwache, ile ikhaphatiswa basa ninga chidindo cha mfumu mbaipereka kuna nyamalwa wa Ayuda, Hamani mwana Hamedata chidzukulu cha Agagi.

¹¹Mfumu adampanga mbati, “Anthu na kobiri zawo zene nsako. Chita kuna iwo pyonsene pinafuna iwepyo.”

¹²Natenepo pansiku yakhumi na chitatu ya mwezi wakutoma, Hamani adachemeresa anyakulembera onsene a mfumu mbaapanga kuti athumbusule pidatonga mfumu pile na chilongero chonsene pontho na malembero onsene akhaphatiswa basa muufumuwo na kutumizwa kuna atongi onsene, akulu aboma na kuna mathubu onsene. Penepi pidalembwa na dzina ya Mfumu Ahasuwero mbadindapo mphete yache.

¹³Anyakutumikira adakwata makalata ale kwenda nawo kunthemba zonsene za muufumuwo. M'makalatamo mudalembwa kuti pansiku ibodzi, pansiku yakhumi na chitatu ya mwezi wa Adara, Ayuda onsene, mwana penu mkulu, mkazi penu mamuna athema kuvungwa, kuphiwa na kupuluzwa, pontho pinthu pyawo pikwatwe.

¹⁴Makalatawa adathema kuwerengwa pakwecha m'nthemba zonsene, towera munthu onsene asasanyike nsiku yeneyo ingafika.

¹⁵Na utongi wa mfumu, pidalembwa pile pidalalikwa mumzinda ukulu wa Susa, pontho anyakutumikira adakwata mphangwa zile mbathamanga nazo kunthemba zonsene. Mfumu na Hamani adakhala pansi kumwa uku mzinda onsene wa Susa wamala zunguzika.