Read cisena ESTERE 4 Bible Online

ESTERE 4 - cisena bible

ESTERE 4

¹Pidapidziwa Moredekai pyonsene pidachitika pile, adang'amba nguwo zache mwakuzhangali. Natenepo iye adavala masakha mbawaza dotha mumsolo mwache kuonesa kutsukwala, tenepo adagwanda na pakati pa mzinda ule uku akukalala na kulira pikulu pene

²mpakana adafika pamsuwo wa mpanda wa nyumba yachifumu. Iye hadapite m'bwalomo tayu, thangwi munthu wakuvala masakha hakhatawiriswa kupita m'bwalo tayu.

³M'nthemba zonsene konsene kwene kudenda utongi wa mfumu kule, kukhali chiliro chikulu pakati pa Ayuda. Iwo adapimana kudya, adalira na kukalala, pontho azinji a iwo adavala masakha mbagona padotha.

⁴Pidapangwa Estere na anyabasache achikazi, pontho na anyakukapalwi akhamtumikira ale pya pinthu pidachita Moredekai, iye adasanyika napyo mtima pyakwanga. Natenepo adatumiza nguwo kuti Moredekai akavale m'mbuto mwa kuvala masakha, kwache iye adapikhonda.

⁵Kubuluka penepo Estere adachemeresa Hataki mbodzi wa anyakukapalwi a mfumu, ule adasankhulwa kutumikira Estere mbampanga kuti aende kuna Moredekai kuti akave pyachitikapyo, pontho thangwi yache njanji.

⁶Hataki adenda kuna Moredekai pachintalo cha mumzinda chifupi na msuwo wa mpanda wa nyumba yachifumu.

⁷Moredekai adampanga pyonsene pikhachitika kuna iye pile na konta ya kobiri yadumbira Hamani kuipereka kuufumu ngakhala Ayuda onsene anaphiwa.

⁸Iye adapereka kuna Hataki kalata ibodzi, ile idawerengwa mu Susa kutonga kuti Ayuda onsene aphiwe. Moredekai adampempha kuti aende nayo kuna Estere mbalonga mwadidi mwene pyonsenepi kuna iye, pontho kumpempha kuti aende kabulumunda pamaso pa mfumu na kumpempha mfumu kuti avere nsisi anthu a mtundu wache.

⁹Hataki adachitadi penepi,

¹⁰tenepo Estere adatumizirambo Hataki kubwerera kuna Moredekai na mphangwa izi:

¹¹“Ngakhala mkazi penu mamuna anapita m'nyumbamo kaonana na mfumu mwakukhonda chemerwa, munthu weneyo athema kufa. Wenewo ndiye mwambo wache; munthu onsene kutomera mathubu a mfumu mpakana anthu a nthemba zonsene akupidziwa penepi. Kwache pana njira ibodzi ene basi yakupulumuka nayo pa mwambo wenewu: Ngakhala mfumu anathonya munthu na ndodo yache yagolidi, munthu weneyo hanaphiwa tayu. Mbwenye kulonga pya ine pagwanda mwezi ubodzi kubulukira pa ndzidzi udandichemera mfumu.”

¹²Pidatambira Moredekai mphangwa za Estere zile,

¹³adatumizirambo mafala akumcheuza nawo mbati, “Leka nyerezera kuti uli pakupata kupiringana Ayuda onsene, thangwi ya kukhala m'nyumba yachifumu.

¹⁴Pandzidzi wenewu, ungakhala kwene pyako mulomo phoo, chiphedzo chinati chidze kuna Ayuda kubulukira kudzulu, pontho iwo anati apulumuke, mbwenye iwe unati ufe, pontho banjako yonsene inati imaliletu. Kwache mbani anapidziwa kuti mwinango ukhali ndzidzi ninga wenewu udakuchitisa kukhala matsano!”

¹⁵Estere adamtawirambo Moredekai mbati,

¹⁶“Ndoko ukagumanyise Ayuda onsene mu Susa; pimaneni kudya mbamundipempherere. Lekani kudya penu kumwa na chinthu chene nsiku zitatu mosiku na masikati. Anyabasanga achikazi na ine enembo tinachita chibodzi-bodzi. Kubuluka penepo ine ndinati ndiende pamaso pa mfumu, podi kwene kuti nkhudawira mwambo. Ngakhala ndathema kufa thangwi ya kuchita tenepo, ndinati ndife pyanga.”

¹⁷Moredekai adalamuka kwenda mbakachita pyonsene pidampanga Estere pile.