Read cisena ESTERE 5 Bible Online

ESTERE 5 - cisena bible

ESTERE 5

¹Pansiku yachitatu yakupimana kudya, Estere adavala mkhanjo wache wachifumu, mbakaimira pachintalo cha m'bwalo mwa nyumba yachifumu kuyang'ana kusubi kukhali mpando wachifumu kule. Mfumu akhali m'bwalomo, uku akhala pampando wachifumu kuyang'ana kumsuwo.

²Pidaona mfumu kuti Matsano Estere aimira pamsuwo, adamkomera mtima mbamthonya na ndodo yache yagolidi. Natenepo Estere adadza chifupi mbakhuya nsonga ya ndodo ile.

³Mfumu adavunza mbati, “Nkhwadidi kwene Matsano Estere? Ngandipange chinafuna iwe; podi kwene ikhale pyayo theka ya ufumu wanga, unati upaswe.”

⁴Estere adatawira mbati, “Ngakhala pinakukomerani, Mfumu, ndikhafuna kuti lero imwe na Hamani mudze kuphwando yakusasanyirani ine.”

⁵Natenepo mfumu adachemeresa Hamani kuti adze kabodzi kene, towera iwo achite pidapempha Estere. Tenepo mfumu na Hamani adenda kuphwando idasasanya Estere ile.

⁶Pikhamwa iwo vinyu, mfumu adavunza Estere mbati, “Ngandipange chinafuna iwe, tenepo unati upaswe. Chonsene chinapempha iwe podi kwene chikhale theka ya ufumu wanga, unati upaswe.”

⁷Estere adatawira mbati,

⁸“Ngakhala mfumu munandikomera mtima kundipasa chonsene chinapempha ine, ndikhafuna kuti mangwana imwe na Hamani mudze pontho kuphwando inango inafuna ine kukusasanyirani. Penepo ine ndinakupangani chinafuna ine.”

⁹Pikhabuluka Hamani kuphwando kule akhasekera pyakwanga na kukomerwa mumtima mwache. Mbwenye kubuluka penepo adaona Moredekai m'nyumba yachifumu; Moredekai hadaimire tayu kuonesa chilemedzo kuna iye pikhagwanda iye. Natenepo Hamani adazhangali naye pyakwanga.

¹⁰Kwache adauphata mtima mbaenda kumusa kwache. Kubuluka penepo iye adachemeresa ashamwali ache kudza kumusa kwache mbapanga pontho mkazache Zeresi kukhala nawo pabodzi penepo.

¹¹Iye adagaya pyakwanga kuna iwo pya mfuma ikhali na iye, ana achimuna akhali na iye, chidzo chikulu chidampasa mfumu, pontho na kufunika kukulu kukhali na iye kupiringana anthu anango onsene a mfumu.

¹²Hamani adathimiza kugaya mbati, “Chinango ninji? Matsano Estere adachita phwandombachemera mfumu na ine ene basi nee unango tayu, pontho mangwana tachemerwa pontho kontho-konthoko.

¹³Kwache pyonsenepi nee pikundikwana tayu sindzidzi nkhuona kwene Moredekai Myuda, thubu wa kunyumba yachifumu.”

¹⁴Mkazache na ashamwali ache adalonga kuna iye mbati, “Sasanyisani chimuti chakulapha, makhono makumawiri na awiri mbamupemphe mfumu mangwana na machibese kuti Moredekai amanikwe penepo. Mungamala penepo imwe na mfumu munakwanisa kwenda pyanu kuphwando mwakukomerwa.” Manyerezero enewa adamkomera Hamani, tenepo adasasanyisa chimuti chile.