Read cisena ESTERE 6 Bible Online

ESTERE 6 - cisena bible

ESTERE 6

¹Mosiku onthowo mfumu hadachione chitulo tayu, natenepo adachemeresa mabukhu a mbiri mule mudalembwa pya ufumu wache kuti awerengwe pamaso pache.

²Khundu idawerenga iwo ikhathimizapo mbiri yakulonga pya mule mudatchululira Moredekai pya upandu ukhafuna chitirwa mfumu, ule udasasanya mathubu ache awiri, Bigitana na Tereshi, anyakukapalwi akhalondali masubi a mfumu ale.

³Mfumu adavunza mbati, “Apo Moredekai tamulemedza tani thangwi ya kuchita penepi?” Anyabasache ale adatawira mbati, “Nkhabe na chibodzi chene tayu chachitirwa iye.”

⁴Mfumu adavunza mbati, “Ayi alipo m'nyumba muno mbodzi wa mathubu anga?” Pandzidzi wenewo Hamani akhapita kwene muchintalo cha nyumba ile; iye akhadza dzapempha mfumu kuti Moredekai amanikwe pamuti ukhadasasanya iye kale ule.

⁵Natenepo anyabasache ale adatawira mbati, “Hamani ali muno akudikhira kuonana namwe.” Mfumu adatawira mbati, “Mpitiseni muno.”

⁶Natenepo Hamani adapita, tenepo mfumu adalonga mbati, “Pana munthu unango anafuna ine kuti ndimulemedze pyakwanga. Apo munthu weneyu ndimchitirenji?” Hamani adalonga yekha ene mumtima mwache mbati, “Mbani pontho wakuthema kulemedzwa pyakwanga na mfumu? Ndine ene pano basi.”

⁷Natenepo iye adatawira mfumu mbati, “Tongani kuti mikhanjo yachifumu idzeswe pano kuti munthu weneyu avale, mikhanjo imbavala imwe makayo, pontho apakire kavalo ambapakira imwe wakukhala na chidzindikiro chachifumu mumsolo mwache.

⁹Kubuluka penepo pangani thubu wamkululetu kuti amvazike munthu weneyu mikhanjoyo, pontho amfambise uku apakira pakavalo kugwanda na pachintalo cha mumzinda. Thubu wamkululetuyo mbalonge mwakugaluza fala pinafamba iwo kuti, ‘Ngayang'anani mule mumbafupira mfumu munthu anafuna iye kumulemedzayo!’ ”

¹⁰Mfumu adalonga kuna Hamani mbati, “Chimbiza ukwate mikhanjo na kavalo mbupereke chilemedzo chenechi kuna Moredekai Myuda. Mchitire pyonsene pyanyerezera iwe panopi. Iwe unamgumana ali pabasache m'nyumba yachifumu ino.”

¹¹Natenepo Hamani adakwata mikhanjo na kavalo ule mbavazika Moredekai. Moredekai adapakira kavalo ule, Hamani adamfambisa kugwanda na pachintalo cha mumzinda uku akhalonga mwakugaluza fala pikhafamba iwo mbati, “Ngayang'anani mule mumbafupira mfumu munthu anafuna iye kumulemedzayo!”

¹²Kubuluka penepo Moredekai adenda kubasache m'nyumba yachifumu, mwenemo Hamani adachimbiza kwenda kumusa kwache uku nkhope yache yamala tota na manyadzo.

¹³Iye adapanga Zeresi mkazache na ashamwali ache onsene pyonsene pikhadamchitikira pile. Natenepo mkazi ule pabodzi pene na ashamwali ache a nzeru ale, adalonga kuna iye mbati, “Iwe watoma kuchepa mphamvu kuna Moredekai. Iye ndi Myuda, tenepo hunamkwanisave kumkwira pamsolo tayu. Iwe unati umgodamire basi.”

¹⁴Anthu ale mbali m'kati kulonga na Hamani, mathubu awiri akukapalwi a mfumu, adafika mbakwata Hamani mwakuchimbiza kwenda naye kuphwando idasasanya Estere ile.