Read cisena ESTERE 8 Bible Online

ESTERE 8 - cisena bible

ESTERE 8

¹Nsiku yonthoyo Mfumu Ahasuwero adapereka kuna Matsano Estere pinthu pyonsene pya Hamani, nyamalwa wa Ayuda. Estere adapanga mfumu kuti Moredekai akhali mbaleache, tenepo Moredekai adadzeswa pamaso pa mfumu.

²Mfumu adadula mphete ya kuchala chache yakukhala na chidindo chache, ile ikhadapokosera iye Hamani, mbaipereka kuna Moredekai. Estere adaikha Moredekai kukhala nyakuyang'anira mfuma ya Hamani.

³Kubuluka penepo Estere adalonga pontho kuna mfumu mwakupiponya pamanyalo a mfumu mbalira. Iye adapempha mfumu kuti achitepo pinthu kukhondesa upandu udasasanya Hamani, chidzukulu cha Agagi, kusasanyira Ayuda.

⁴Mfumu adamthonya na ndodo yache yagolidi, tenepo iye adalamuka mbalonga mbati,

⁵“Ngakhala pinakukomerani mfumu pontho ngakhala mumbatsalakana pya ine, pontho ngakhala penepi mphyakuthema pamaso panu, ndaphata miyendo tongani kuti pinthu pidatonga Hamani pileke chitika, matongero ale adapereka Hamani mwana Hamedata, chidzukulu cha Agagi, kuti Ayuda onsene amale vungwa m'nthemba zonsene za ufumu wanu.

⁶Ayi ine ndinakwanisa tani kupirira ngakhala kuvungika kweneku kunadza pana anthu a mtundu wanga, pontho kuti abale anga ene amale phiwa?”

⁷Mfumu Ahasuwero adalonga kuna Matsano Estere na Moredekai Myuda ule mbati, “Ngayang'anani ine ndamanika Hamani thangwi ya upandu ukhadasasanyira iye Ayuda, pontho ndapereka mfuma ya Hamani kuna Estere.

⁸Mbwenye kulonga pya utongi ule udaperekwa na dzina ya mfumu mbudindwa na chidindo cha mfumu nkhabe sanduzika tayu. Kwache munakwanisa kulembera Ayuda onsene konsene kwene kunakhala iwo pyonsene pinafuna imwe; pontho munakwanisa kuilemba na dzinanga mbamudinda na chidindo changa chachifumu.”

⁹Penepi pidachitika pansiku yamakumawiri na chitatu ya mwezi wachitatu wa Sivani. Moredekai adachemeresa anyakulemba onsene a mfumu mbaalembesa makalata akwenda kuna Ayuda, akulu aboma, anyakufambisa boma na kuna mathubu onsene kunthemba zonsene dzana na makumawiri na zinomwe; kutomera ku India mpakana ku Sudani makalata akwenda kunthemba zonsene malingana na chilongero pontho malembero awo, pontho na kuna Ayuda na chilongero pontho malembero awo.

¹⁰Moredekai adalembesa makalata ale na dzina ya Mfumu Ahasuwero mbaadinda na chidindo chachifumu. Makalata ale adatumizwa pakuphatisa basa anyakupakira akavalo akuthamanga pyakwanga a kunyumba yachifumu.

¹¹Makalata enewa akhalonga kuti: “Mfumu atawirisa Ayuda a m'mizinda yonsene kuti apisasanyikire okha ene kupitchinjiriza. Ngakhala anyankhondo a dzinza inango m'nthemba zonsene anasosa amuna a Chiyuda na anawo, pontho na akazawo, Ayuda anakwanisa kubwezera na kuvunga anyakuasosa. Iwo anakwanisa kuapha onsenewo mbakwata pinthu pyawo.

¹²Matongero enewa athema kuphata basa muufumu onsene wa Peresia kutomera pansiku idasasanyirwa kuphiwa kwa Ayuda, nsiku yakhumi na chitatu ya mwezi wa Adara, mwezi wakhumi na chiwiri.

¹³Penepi pyathema kulalikwa ninga mwambo mbuvekeswa kuna munthu onsene m'nthemba zonsene, towera Ayuda asasanyike kubwezera anyamalwawo, nsiku yeneyo ingafika.”

¹⁴Na kutongwa na mfumu, anyakupakira akavalo akuthamanga pyakwanga ale, adautoma ulendo. Utongi ule udavekeswa, pontho mu Susa mumzinda ukulu ule.

¹⁵Moredekai adabuluka kunyumba yachifumu uku avala mkhanjo wachifumu wamsuzi wanyemba pontho wakuchena, chakufinika cha thonje yadidi yakufira, pontho na chipewu chachifumu chagolidi chakuyetimira. Natenepo mzinda onsene wa Susa udadzala na mkhuwo wakusekera na kukomerwa.

¹⁶Pakati pa Ayuda pakhali kukomerwa pontho kutsanzaya, kusekera, pontho na chilemedzo.

¹⁷Konsene kwene kudawerengwa matongero a mfumu ale, mumzinda na m'nthemba, Ayuda adakomerwa, adasekera, adachita phwando mbapuma pa basawo. Na thangwi ya penepi anthu azinji adasanduka Ayuda thangwi ndzidzi wenewo akhachita nawo mantha.