Read cisena ESTERE 9 Bible Online

ESTERE 9 - cisena bible

ESTERE 9

¹Nsiku yakhumi na chitatu ya mwezi wa Adara idafika, nsiku idathema kuchitika matongero a mfumu, nsiku ikhanyerezera anyamalwa a Ayuda kuti anaakunda ile. Mbwenye m'mbuto mwache Ayuda ndiye adaakunda.

²M'mbuto zikhakhala Ayuda mumzinda onsene[5] muufumu mule, iwo adagumanyikana kusasanyika kubwezera munthu onsene anayesera pyakuakuwazayo. Nkhabe na mbodzi ene adakwanisa kuimisana nawo tayu, thangwi anthu onsene a madzinza anango akhachita nawo mantha.

³Tenepo mathubu onsene a m'nthemba zonsene, akulu-akulu a boma na anyakufambisa pinthu pya mfumu adaaphedza Ayuda, thangwi akhachita mantha na Moredekai.

⁴Pidadziwika muufumu monsene mule kuti Moredekai akhali munthu wakufunika pyakwanga m'nyumba yachifumu; mbiri yache idafalikira konsene kwene, pontho akhathimiza kukula mphamvu.

⁵Natenepo Ayuda adakwanisa kuchita pinthu pikhafuna iwo kuna anyamalwawo. Iwo adaamenya na matalasadawo mbaavunga, pontho kuchita pyakuakomera kuna anyakuazonda onsene.

⁶Mu Susa, mzinda ukulu, Ayuda adapha amuna madzana mashanu.

⁷Pakati pa anyakufawo pakhali ana khumi a Hamani mwana Hemadata, nyamalwa wa Ayuda: Parashandata, Dalifoni, Asipata, Porata, Adalia, Aridata, Parimashita, Arisai, Aridai na Vaizata. Kwache pakhali nkhabe kupokosera pinthu tayu.

¹¹Nsiku yonthoyo mfumu adapangwa konta ya anthu akhadaphiwa mu Susa ale.

¹²Kubuluka penepo mfumu adalonga kuna Matsano Estere mbati, “Mu Susa mokha muno Ayuda apha amuna madzana mashanu kuthimizapo ana khumi a Hamani. Ninji pontho chathema iwo kuchita m'nthemba? Chinafuna iwe pontho ninji? Unati upaswe. Ngandipange, ninji chinafuna iwe pontho? Unati upaswe.”

¹³Estere adatawira mbati, “Ngakhala pinakukomerani mfumu, tawirisani Ayuda a mu Susa kuti mangwana achite pontho pile pidatawiriswa iwo kuchita lero. Pontho tongani kuti mitembo ya ana khumi a Hamani imanikwe pamiti.”

¹⁴Mfumu adatongadi kuti penepi pichitike, tenepo pidalalikwa mu Susa monsene mule. Mitembo ya ana khumi a Hamani idamanikwa pakwecha.

¹⁵Pansiku yakhumi na chinayi ya mwezi wa Adara, Ayuda a mu Susa adagumanyikana pontho mbapha amuna anango madzana matatu mumzindamo. Kwache pontho pakhali nkhabe kupokosera pinthu tayu.

¹⁶Ayuda a m'nthemba zinango adasasanyikirambo mbapitchinjiriza okha ene. Iwo adatswaira anyamalwawo onsene pakupha pikwi makumanomwe na pishanu akhaazonda ale. Kwache pakhali nkhabe kupokosera pinthu tayu.

¹⁷Yeneyi ikhali nsiku yakhumi na chitatu ya mwezi wa Adara. Pansiku inango yakhumi na chinayi pakhali nkhabe kuphana, tenepo nsiku yeneyo idachitiswa kukhala nsiku yakukomerwa yakuchita phwando.

¹⁸Kwache Ayuda a mu Susa adachitisa nsiku yakhumi na chishanu kukhala nsiku yakupuma pabasa, thangwi iwo akhadapha anyamalwawo pansiku yakhumi na chitatu, pontho na pansiku yakhumi na chinayi mbaleka pansiku yakhumi na chishanu.

¹⁹Ndi thangwi yache Ayuda akukhala m'maluwani ang'ono-ang'ono ambakoya nsiku yeneyo yakhumi na chinayi ya mwezi wa Adara kukhala nsiku yakusekera pontho yakupuma pabasa, ndzidzi wakuchita phwando na kupereka mitukwa kuna unango na mwanzache.

²⁰Moredekai adalemba pikhadachitika pile mbatumiza makalata kuna Ayuda onsene achifupi na akutali ene muufumu onsene wa Aperesi,

²¹kuapanga kuti akoye nsiku yakhumi na chinayi, pontho na nsiku yakhumi na chishanu ya mwezi wa Adara kukhala nsiku yakupuma pabasa chaka na chaka.

²²Zenezi zikhali nsiku zidapuluza Ayuda anyamalwawo; wenewu ndiye ukhali mwezi ule ukhadasanduzika kubuluka ndzidzi wa kulira na kusintili kukhala ndzidzi wakukomerwa na kusekera. Iwo adapangwa kukoya nsiku zenezi pakuchita maphwando, kupereka mitukwa kuna unango na mwanzache, pontho kuna anyakutcherenga.

²³Natenepo Ayuda adateweza pidaapanga Moredekai pile, tenepo phwando ile idasanduka mtemo ene chaka na chaka.

²⁴Hamani mwana Hamedata, ule akhali chidzukulu cha Agagi pontho nyamalwa wa Ayuda onsene, akhachita ntsango (penu Purimu ninga mukhalongera iwo) towera adziwe nsiku ikhafuna iwo kuvunga Ayuda; iye akhadasasanya pyakuapuluziratu.

²⁵Mbwenye pidava mfumu pya upandu wenewu, iye adatonga mwakuchita kulemba m'makalata kuti Hamani ndiye adathema kuona nyatwa ikhadasasanyira iye Ayuda ile. Iye na anache adamanikwa pamiti.

²⁶Ndi thangwi yache nsiku zakupumazi zikhachemerwa Purimu. Na thangwi ya kalata ya Moredekai, pontho na pyonsene pikhadaachitikira pile,

²⁷Ayuda adapisasanyira okha ene mwambo pabodzi pene na pidzukulu pyawo, pontho na ale ene akhafuna kusanduka Ayuda kuti pandzidzi wakuthema chaka na chaka, nsiku ziwirizi zikoyiwe malingana na pidalonga Moredekai pile.

²⁸Nsiku zenezi zidathema kukumbukwa na kukoyiwa na mfendu onsene pontho na banja yonsene m'nthemba zonsene na m'mizinda yonsene. Pontho nsiku zenezi za Purimu mbizileke mbombowa pakati pa Ayuda, penu kuduwalirwa na pidzukulu pyawo na pang'ono pene.

²⁹Natenepo Matsano Estere mwana wamkazi wa Abihaili pabodzi pene na Moredekai Myuda adalemba kalata inango kutsikimizira na utongi wache onsene kalata ikhadalemba Moredekai yakulonga pya Purimu pakutoma ile.

³⁰Makalata akuafunira pyadidi na achitchinjirizo adatumizwa kuna Ayuda onsene a m'nthemba dzana na makumawiri na zinomwe za ufumu wa Ahasuwero

³¹kuti akhazikise nsiku zenezi za Phwando ya Purimu na pandzidzi wache wakuthema, ninga montho mudaatongera Moredekai Myuda na Matsano Estere, pontho ninga montho mukhadakhazikisira iwo okha ene na pidzukulu pyawo ndzidzi wakupimana kudya na kulira.

³²Utongi wa Estere wakutsikimizira matongero akulonga pya Purimu adalembwa mumpukutu.