Read cisena KUBULUKA 1 Bible Online

KUBULUKA 1 - cisena bible

KUBULUKA 1

¹Ana achimuna a Yakobo, ale adenda na iye ku Iguputo pabodzi pene na mabanjawo akhali awa:

²Rubeni, Simioni, Levi, Yuda,

³Isakara, Zebuloni, Benjemani,

⁴Dani, Nafitali, Gadi na Asheri.

⁵Onsene pabodzi pidzukulu pya Yakobo akhali anthu makumanomwe;[1] mwanache Yosefe akhadenda kale ku Iguputo.

⁶Tenepo Yosefe na abale ache, pontho na mfendu wache adafa,

⁷mbwenye pidzukulu pyawo, ale mba Aisraele adabalana pikulu mbakhala anthu akuinjipa pyakwanga mwakuti dziko ya Iguputo mudadzala na anthu enewa.

⁸Pidagwanda ndzidzi ukulu ene, mu Iguputo mudapita mfumu unango kutonga, ule hakhadziwa tayu pya Yosefe.

⁹Tenepo iye adalonga kuna anthu ache mbati, “Aisraelewa ainjipa pontho ngamphamvu pyakwanga mwakuti tikugoswerwa nawo.

¹⁰Mwinango kunabwera nkhondo iwo anaphatizana na anyamalwathu, towera atikunde mbathawa kubuluka[2] m'dziko muno. Tathema kusaka njira yakualekesa kuinjipa pikulu pene.”

¹¹Natenepo anthu a ku Iguputo adaikhira anyakuyang'anira avinga towera aavuye pakuaphatisa basa mwakuakhakhamiza. Aisraele adamanga mizinda ya Pitomu na Ramese yakukoyeramo pinthu pya Mfumu wa Iguputo.

¹²Mbwenye na kuavuya kukulu kukhachita anthu a ku Iguputo, Aisraele ndiye adanyanya kuinjipa mbafalikira m'nthemba yonseneyo. Tenepo anthu a mu Iguputo adatoma kuagopa Aisraele,

¹³mbaavuya pakuaphatisa basa mwavinga ninga mabitchu. Iwo adaakhakhamiza kuawumbira njerwa na kumunya mataka na mabasawo anango onsene a m'minda. Anthu a ku Iguputo adaaphatisa basa mwavinga pontho mwakukhonda kuavera nsisi.

¹⁵Tenepo mfumu wa ku Iguputo adalonga kuna Shifira na Pua, anyakubalisa akazi a Chiheberi mbati,

¹⁶“Mungabalisa mkazi wa Chiheberi, mwanayo angakhala mamuna mpheni, mbwenye angakhala wamkazi mulekeni.”

¹⁷Mbwenye anyakubalisa akazi ale akhali akugopa Mulungu, tenepo iwo hadavere pidalonga mfumu pile tayu mbakhonda kupha ana achimuna ale.

¹⁸Tenepo mfumu adachemeresa akazi ale mbaavunza mbati, “Mwatani munachita tenepa? Munalekeranji kupha ana achimuna?”

¹⁹Iwo adatawira mbati, “Akazi a Chiheberi alekana na akazi a kuno ku Iguputo; iwo nkhabe nenseka na kubala tayu, iwo ambabala mwenemo mbodzi wa ife mbadzati fika kweneko.”

²⁰Na thangwi yakuti anyakubalisa akazi akhali akugopa Mulungu, Mulunguyo adaakomera mtima mbaapasa mabanjawo ene. Tenepo Aisraele adathimiza kuinjipa pontho kukhala amphamvu.

²²Pakumalisira pache mfumu adapereka utongi ukulu kuna anthu ache onsene wakuti: “Ana onsene akachiya achimuna a Chiheberi akaponywe mumkulo wa Nailo, mbwenye ana achikazi mualeke.”