Read cisena KUBULUKA 10 Bible Online

KUBULUKA 10 - cisena bible

KUBULUKA 10

¹Tenepo MBUYA adalonga kuna Mose mbati, “Ndoko ukaonane na mfumu. Ine ndachitisa iye na mathubu ache kuumisa mtima, towera ndichite pyakudodomesa pyangapi pakati pawo,

²pontho kuti imwe mukwanise kupanga ananu na pidzukulu pyanu, mudapupwisira ine anthu a ku Iguputo ndzidzi udachita ine pyakudodomesa ule. Monsenene munapidziwa kuti ine ndine MBUYA.”

³Tenepo Mose na Aroni adenda kuna mfumu mbakalonga mbati, “MBUYA, Mulungu wa Aheberi, akulonga kuti, ‘Unafikira lini kukhonda kundivera? Tawirisa anthu anga kwenda, towera akwanise kandipembedza.

⁴Ngakhala unathimiza kukhonda, ine ndinadzesa nyadzombe m'dziko mwako muno mangwana.

⁵Anainjipa pyakwanga mwakuti anaphopha pansi ponsene. Anadya pyonsene pidakhonda vungwa na matalala; podi na miti ene yasalirayi.

⁶Nyadzombe anadzala m'nyumba mwako, nyumba za mathubu ako na za anthu ako onsene. Ananyanya pyakwanga mwakuti chipo nee makolo anu, penu makolo awombo adzati kumuona tayu kutomera ndzidzi udakhazikika iwo m'dziko muno.’ ” Tenepo Mose adazungunuka mbaenda pyache kubuluka pamaso pa mfumu.

⁷Mathubu a mfumu adalonga kuna mfumuyo mbati, “Munthu weneyu analeka lini kutinensa? Atawiriseni Aisraele kwenda pyawo, towera akwanise kapembedza MBUYA, Mulungu wawo. Kadi imwe nkhabe kuona kuti dziko ya Iguputo ikuvungika tayu?”

⁸Tenepo Mose na Aroni adachemereswa pontho kuna mfumu, ule adalonga kuna iwo mbati, “Munakwanisa kwenda kapembedza MBUYA, Mulungu wanu, kwache mbani maka-maka anafuna kwenda?”

⁹Mose adatawira mbati, “Tinaenda tonsene, kuthimizapo ana na nkhalamba zathu zene. Tinakwata anathu achimuna na achikazi ene, mabirathu, mbuzi na ng'ombe zathu, thangwi tathema kachita phwando yakulemedza nayo MBUYA.”

¹⁰Mfumu adalonga mbati, “Ndinadumbira na dzina ya MBUYA kuti sinakutawirisani kukwata akazanu na ananu ene tayu. Penepa mukuonesa pakwecha kuti imwe munafuna pyakupandukira.

¹¹Nkhabe! Amuna okha aende kapembedza MBUYA, thangwi pikhapempha imwe mphenepi.” Na mafala enewa Mose na Aroni adabuluswa pamaso pa mfumu.

¹²Tenepo MBUYA adalonga kuna Mose mbati, “Thonya na dzanjako uku na uku m'dziko ya Iguputo kudzesa nyadzombe. Nyadzombe anabwera mbadya pyakumera pyonsene, pile pikhadasalira khonda vungwa na matalala.”

¹³Mose adathonyeza ndodo yache kudzulu, tenepo MBUYA adachitisa mphepo yakumabulukiro dzuwa kugundika mbikhala m'dziko monsenemo kubulukira masikati mpakana mosiku onsene. Na machibese mphepo ile idadzesa nyadzombe.

¹⁴Adadza m'mikumbi-mikumbi mbakhazikika m'dziko monsene. Ukhali mkumbi ukulu wa nyadzombe mwakuti chipo iwo hadatome kumuona, penu dzamuonave tayu.

¹⁵Ponsene padaphopha na nyadzombe kufikirana pansi padaswipa bii mbadya pyonsene pikhadasiyiwa kukhonda vungwa na matalala, kuthimiza nsapo zonsene m'miti. Nkhabe chinthu chiwisi chidasalira pamuti na ubodzi ene penu chakumera m'dziko yonsene ya Iguputo tayu.

¹⁶Tenepo mfumu kabodzi kene adachemeresa Mose na Aroni mbalonga mbati, “Ine ndadawira MBUYA, Mulungu wanu, pontho na imwe ene.

¹⁷Kano ndilekereni kudawa kwanga mbamupemphere kuna MBUYA, Mulungu wanu kuti andibulusire muliri wakuphawu.”

¹⁸Mose adabuluka pana mfumupo mbakapemphera kuna MBUYA.

¹⁹Tenepo MBUYA adasanduza mphepo yakumabulukiro dzuwa ile kukhala mphepo yakugoswa yakumadokero dzuwa mbitswaira nyadzombe onsene mbakamtaya ku Nyanza Yakufira. Nkhabe nyadzombe na mbodzi ene adasalira mu Iguputo monsenemo tayu.

²⁰Mbwenye MBUYA adaumisa mtima wa mfumu mbakhonda tawirisa Aisraele kwenda.

²¹MBUYA adalonga kuna Mose mbati, “Kwiza dzanjako m'dzulu, tenepo mdima wa ndiwe ani unagwa m'dziko yonsene ya Iguputo.”

²²Mose adakwiza dzanjache m'dzulu, tenepo padagwa mdima wakugoswa mu Iguputo monsene mbukhala nsiku zitatu.

²³Anthu a ku Iguputo hadakwanise kuonana tayu, pontho nkhabe munthu na mbodzi ene adabuluka pamsuwo pache tayu ndzidzi wenewo. Mbwenye kukhakhala Aisraele kukhali cheza.

²⁴Mfumu adachemeresa Mose mbalonga mbati, “Munakwanisa kwenda kapembedza MBUYA; podi akazanu na ananu ene anakwanisa kwenda namwe. Mbwenye mabiranu, mbuzi na ng'ombe zanu pyathema kusala kuno.”

²⁵Mose adatawira mbati, “Apo imwe mwathema kutipasa nyama zakupereka nsembe, pontho na nsembe zinango zakupyerera kuti tikazipereke kuna MBUYA, Mulungu wathu.

²⁶Nkhabe, ife tinati tikwate pifuyo pyathu; nkhabe na chibodzi chene chinafuna siya ife m'nduli tayu. Ife tathema sankhula nyama zakupembedza nazo MBUYA, Mulungu wathu. Ife nkhabe dziwa nyama zakuti tipereke nsembe kuna MBUYA kufikirana tifike kweneko.”

²⁷Mbwenye MBUYA adaumisa mtima wa mfumu, iyembo mbakhonda kuatawirisa kwenda.

²⁸Iye adalonga kuna Mose mbati, “Buluka pamaso panga! Sinafuna kukuonave tayu! Nsiku inakuona ineyo, unaphiwa!”

²⁹Mose adatawira mbati, “Ndimomwene imwe nee munandionave tayu.”