Read cisena KUBULUKA 11 Bible Online

KUBULUKA 11 - cisena bible

KUBULUKA 11

¹Tenepo MBUYA adalonga kuna Mose mbati, “Pasala muliri ubodzi kuti nditchunyuse mfumu na anthu ache. Kubuluka penepo iye anakutawirisani kwenda. Ndimomwene kuti iye anakuthamangisani monsenene.

²Tenepo panga Aisraele kuti onsenewo apemphe pinthu pyakupithemesera napyo pyagolidi na pyasiliva kuna atsanthembawo.”

³MBUYA adachitisa anthu a ku Iguputo kulemedza Aisraele. Ndimomwene kuti mathubu na anthu onsene adamuyesa Mose munthu wamkulu pyakwanga.

⁴Mose adalonga kuna mfumu mbati, “MBUYA akulonga kuti, ‘Pachiti-chiti ndinati ndiende mu Iguputo monsene,

⁵tenepo ana onsene achimuna autombo a mu Iguputo anati afe, kutomera mwana mfumu makayo, ule anafuna kupita ufumuwo, kufikirana ana a mabitchu achikazi ambapeya tirigu ale, pontho ana ng'ombe autombo anafambo basi.

⁶Kunakhala chiliro chikulu mu Iguputo, chile chipo chidaonekepo tayu, penu kuchitika pontho tayu.

⁷Mbwenye nkhabe na mwanambwa ene anauta Aisraele penu pifuyo pyawo tayu. Penepo imwe munadziwa kuti ine, MBUYA, ndimbasiyanisa pakati pa anthu a ku Iguputo na Aisraele.’ ”

⁸Mose adamalisa na kulonga mbati, “Mathubu anu onsene anabwera kuna ine mbandibulumundira kundipempha kuti ndikwate anthu anga onsene kuti tiende. Kubuluka penepo ndinati ndiende.” Tenepo na kuzhangali kukulu Mose adabuluka pakhali mfumupo mbaenda pyache.

⁹MBUYA adalonga kuna Mose mbati, “Mfumu anathimiza kukhonda kukuvesera, towera ndichite pyakudodomesa pyanga pinango pizinji mu Iguputo.”

¹⁰Mose na Aroni adachita pyakudodomesa pyonsenepi pamaso pa mfumu, mbwenye MBUYA adaumisa mtima wa mfumu, iyembo mbakhonda tawirisa kuti Aisraele abuluke m'dziko mwache.