Read cisena KUBULUKA 12 Bible Online

KUBULUKA 12 - cisena bible

KUBULUKA 12

¹Tenepo MBUYA adalonga kuna Mose na Aroni mu Iguputo mbati,

²“Mwezi uno ukhale mwezi wakutoma wa chaka kuna imwe.

³Panga Aisraele onsene kuti pansiku yachikhumi ya mwezi uno mamuna onsene athema kusankhula mwanabira, penu mwanambuzi mbodzi pabanja yonsene, towera aphe pabanja pache.

⁴Ngakhala banjache njing'ono pyakwanga mwakuti hinakwanisa kumala nyama yonsene yamumphuyo tayu, iye na tsanthembache anakwanisa kuigawana, malingana na kuinjipa kwa anthu, pontho phindi inakwanisa kudya munthu onsene.

⁵Munakwanisa kusankhula bira, penu mbuzi, kwache yathema kukhala imuna ya chaka chibodzi basi pontho yakusowa chilema.

⁶Tenepo na mawulo a nsiku yachikhumi na chinayi ya mwezi uno, mabanja onsene a Aisraele anacheka nyama.

⁷Anthu akwate chiropa pang'ono mbakhwaze pafufu padzulu na makhundu onsene awiri a msuwo wa nyumba munafuna dyerwa nyamamo.

⁸Mosiku wenewo nyama yathema otchiwa mbidyiwa na masamba akuwawa, pontho na mkate wakusowa chakufufumisira.

⁹Lekani kuidya iwisi, penu kuchita kuitereka, mbwenye yonseneyo muchite kuiotcha, kuthimizapo msolo, miyendo na pya m'mimba pene.

¹⁰Lekani kusiya na phindi ene mpakana machibese; ngakhala inango yasala, yathema kupyerezwa.

¹¹Chimbizani mudye, thangwi imwe muli paulendo; valani bande m'chuno mwanu, nkhwaira kumanyalo kwanu, pontho ndodo m'manja mwanu. Yeneyi ndi Phwando ya Paska yakulemedza nayo ine, Mbuya.

¹²“Mosiku wenewo ine ndinaenda mu Iguputo monsene kupha ana achimuna autombo, ana a anthu na a pifuyo pene, kutchunyusa milungu yonsene ya mu Iguputo. Ine ndine MBUYA.

¹³Chiropa pamisuwo ya nyumba chinakhala chidzindikiro cha nyumba zinakhala imwe. Ndingaona chiropacho, ndinanthala penepo mbandikhonda kukukuwazani ndzidzi unatchunyusa ine anthu a ku Iguputo.

¹⁴Nsiku yeneyo imwe mwathema kusekera ninga phwando ya chipembedzo kukukumbusani pile pyachita ine, MBUYA. Sekerani phwandoyi mpakana mifendu yonsene inadzayo.”

¹⁵MBUYA adalonga mbati, “Imwe mwathema nsiku zinomwe kuleka kudya mkate wakukhala na chakufufumisira. Idyani kwene mkate wakusowa chakufufumisira basi. Pansiku yakutoma imwe mwathema kutaya pyakufufumisira mkate pyonsene pya m'nyumba mwanu, thangwi ngakhala munthu unango anadya mkate wakukhala na chakufufumisira pansiku zinomwezi, ine sinamuyesave ninga mbodzi wa anthu anga tayu.

¹⁶Pansiku yakutoma, pontho na pansiku yachinomwe, imwe mwathema kugumanyikana pabodzi pene kupembedza. Nkhabe kuphata basa pansiku zenezi tayu, mbwenye munakwanisa kusasanya pyakudya.

¹⁷Chitani phwando yeneyi, thangwi ikhali pansiku yeneyo idabulusa ine madzinzanu mu Iguputo. Mifendu yonsene inadzayo imwe mwathema kusekera phwando yeneyi ninga matongero okhonda mala.

¹⁸Kubulukira mawulo a nsiku yachikhumi na chinayi ya mwezi wakutoma mpakana mawulo a nsiku yamakumawiri na chibodzi, imwe mwathema kuleka kudya na mkate ene wakukhala na chakufufumisira.

¹⁹Nsiku zinomwezi m'nyumba mwanu muleke khala pyakufufumisira mikate, thangwi ngakhala munthu unango, mzika penu mlendo, anadya mkate wakukhala na chakufufumisira, ine sinamuyesave ninga mbodzi wa anthu anga tayu.”

²⁰

²¹Mose adachemeresa akadamu onsene a Aisraele mbalonga mbati, “Monsenene mwathema kusankhula mwanabira penu mwanambuzi, mumcheke, towera mabanjanu akwanise kusekera Phwando ya Paska.

²²Mukwate chikhwasa-khwasa, muchivike m'ndilo yakudzala na[10] chiropa mbamuchikhwaze padzulu na makhundu onsene awiri a misuwo ya nyumba zanu. Nkhabe munthu na mbodzi ene athema kubuluka m'nyumba mwache kufikirana machibese.

²³Ndzidzi unaenda MBUYA mu Iguputo monsene kupha anthu a ku Iguputo, anaona chiropa padzulu na makhundu onsene awiri a misuwo yanu, tenepo hanatawirisa nyakuvunga kupita m'nyumba zanu kukuphani tayu.

²⁴Imwe na ananu mwathema kuvera matongero enewa kwenda na kwenda.

²⁵Mungapita m'dziko idadumbira MBUYA kuna imwe ile, imwe mwathema kuchita mtemo wenewu.

²⁶Ananu angakuvunzani kuti, ‘Mtemo wenewu nkhulonga kuti tani?’

²⁷Imwe munatawira kuti, ‘Ndi nsembe ya Paska yakulemedza nayo MBUYA, thangwi iye anthala nyumba za Aisraele mu Iguputo mbakhonda kuakuwaza mbapha anthu a ku Iguputo.’ ” Aisraele adalamba pansi mbapembedza.

²⁸Tenepo Aisraele adenda kachita pikhadatonga MBUYA kuti Mose na Aroni apichite pile.

²⁹Pachiti-chiti MBUYA adapha ana achimuna autombo onsene a mu Iguputo. Kutomera mwana wamamuna wa mfumu ule akhafuna kupita ufumuwo mpakana ana achimuna a anyaperezo; ana onsene autombo a pifuyo pidaphiwambo basi.

³⁰Mosiku wenewo, mfumu, mathubu ache na anthu onsene anango mu Iguputo adalamuka. Mukhali chiliro chikulu mu Iguputo monsene, thangwi nkhabe panyumba na pabodzi pene tayu padakhonda kufa mwana wamamuna.

³¹Mosiku onthowo mfumu adachemeresa Mose na Aroni mbalonga mbati, “Bulukani muno, iwe na Aisraele ako! Bulukani m'dziko mwanga muno. Ndokoni mukapembedze MBUYA ninga mudapemphera imwe.

³²Kwatani mabiranu, mbuzi na ng'ombe zanu mbamuende. Pontho pempherani kuti ndikhale na mtsanzayiso.”

³³Aiguputo adadembetera anthu kuti achimbize kubuluka m'dzikomo mbalonga mbati, “Mungakhonda kubuluka m'dziko muno, tonsene tinati tife.”

³⁴Tenepo anthu adadzaza mwakumunyira mikate na mpambo wakusowa pyakufufumisira mbapimpsampsira na nguwo mbapithukula pamapewa pawo.

³⁵Aisraele akhadachita ninga montho mukhadalongera Mose, tenepo akhadapempha pyakupithemesera napyo pyagolidi na pyasiliva, pontho na nguwo kubulukira kuna anthu a ku Iguputo.

³⁶MBUYA adachitisa kuti Aiguputo alemedze Aisraele mbaapasa pinthu pikhadapempha iwo. Penepa Aisraele adakwata mfuma ya Aiguputo.

³⁷Tenepo Aisraele adatoma ulendo wa miyendo kubulukira ku Ramese kwenda ku Sukoti. Pakhali amuna ninga pikwi madzana matanthatu, nee kulengesa akazi na ana tayu.

³⁸Mwinji ukulu wa anthu anango na mabira azinji, mbuzi na ng'ombe pidendambo na anthu.

³⁹Iwo adaphika mikate yakusowa chakufufumisira na mpambo ukhadakwata iwo ku Iguputo ule, thangwi akhadabuluswa mu Iguputo mwakututumusa mwakuti adasowa ndzidzi wakusasanyiratu pyakudya pyawo, penu kusasanya mpambo wakusowa pyakufufumisira.

⁴⁰Aisraele akhadakhala mu Iguputo pyaka madzana manayi na makumatatu.

⁴¹Pansiku yakumala kwa pyaka madzana manayi na makumatatu madzinza onsene a anthu a MBUYA adabuluka mu Iguputo.

⁴²Ukhali mosiku udasankhula MBUYA kuabulusa mu Iguputo mwakuayang'anira mwadidi. Mosiku wenewu Aisraele onsene athema kukhala m'maso chaka na chaka mifendu yonsene inadzayo thangwi ngwakupambulika kuna MBUYA.

⁴³MBUYA adalonga kuna Mose na Aroni mbati, “Matongero a Phwando ya Paska mbawa: Nkhabe mlendo athema kudya Phwando ya Paska tayu,

⁴⁴mbwenye mabitchu onsene adagula imwe athema kudya, ngakhala chakutoma iwo anagwandwa nsonga yachimuna.

⁴⁵Nkhabe mlendo penu nyaganyo athema kudya tayu.

⁴⁶Nyama yonsene yathema kudyerwa m'nyumba mudaphikwa iyo; mbileke buluswa panja, pontho lekani kuswa magogodo a nyamazo.

⁴⁷Anthu onsene a dzinza ya Aisraele athema kusekera phwando yeneyi;

⁴⁸kwache nee mamuna okhonda gwandwa nsonga yachimuna athema kudya tayu. Ngakhala mlendo akhazikika pakati panu, tenepo anafunambo kudya Phwando ya Paska kulemedza MBUYA, imwe mwathema chakutoma kugwanda amuna onsene nsonga yachimuna m'banja mwache. Tenepo athema kuyeswa ninga mzika ya Israele mbakwanisa kusekera nawo phwandoyi.

⁴⁹Matongero onthowa akulonga kuna mzika ya Israele na kuna alendo ene, ale akhazikika pakati panu.”

⁵⁰Aisraele onsene adavera mbachita pikhadatonga MBUYA kuna Mose na Aroni pile.

⁵¹Pansiku yeneyo MBUYA adabulusa madzinza a Israele mu Iguputo.