Read cisena KUBULUKA 13 Bible Online

KUBULUKA 13 - cisena bible

KUBULUKA 13

¹MBUYA adalonga kuna Mose mbati,

²“Ndipambulireni ana onsene achimuna autombo, thangwi mwana onsene wachimuna wautombo wa Aisraele, pontho mwana onsene wachimuna wautombo wa pifuyo pyanu nganga.”

³Mose adalonga kuna anthu mbati, “Kumbukani nsiku yeneyi, nsiku idabuluka imwe mu Iguputo, kumbuto kukhali imwe mabitchu kule. Yeneyi ndi nsiku idakubulusani MBUYA mu Iguputo na mphamvu zache zikulu. Paleke kudyiwa mikate yakukhala na pyakufufumisira.

⁴Imwe mukubuluka mu Iguputo pansiku yeneyi mwezi wakutoma, mwezi wa Abibu.

⁵MBUYA adadumbira pikulu pene kuna makolo anu kukupasani dziko ya Akanani, Ahiti, Aamori, Ahivi na Ayebusi. Iye angakudzesani m'dziko yamphonje, imwe mwathema kusekera phwando yeneyi mwezi wakutoma chaka na chaka.

⁶Nsiku zinomwe imwe mwathema kudya mikate yakusowa chakufufumisira, pontho pansiku yachinomwe pachitike phwando yakulemedza nayo MBUYA.

⁷Nsiku zinomwe imwe mwathema nee kudya mikate yakukhala na chakufufumisira, pontho paleke khala mkate wakukhala na chakufufumisira penu chakufufumisira chinango chonsene m'dziko mwanu monsene.

⁸Phwando ingatoma, apangeni ananu onsene achimuna kuti mukuchita pyonsenepi, thangwi ya pinthu pidakuchitirani MBUYA ndzidzi udabuluka imwe mu Iguputo.

⁹Chenechi chinakhala chikumbuso, ninga chinthu chinango chakumangirirwa pamkono panu, penu pachipumu panu; chenechi chinakukumbusani kuthimiza kulonga, pontho kufunza Mwambo wa MBUYA, thangwi MBUYA adakubulusani mu Iguputo na mphamvu zache zikulu.

¹⁰Tenepo sekerani phwando yeneyi chaka na chaka pandzidzi udaikhwa iyo.

¹¹“MBUYA angakudzesani m'dziko ya Kanani, ile adadumbira iye kuna imwe na kuna makolo anu,

¹²imwe mwathema kupereka ana autombo achimuna onsene kuna MBUYA. Nyama yonsene yautombo imuna nja MBUYA,

¹³mbwenye imwe mwathema kuombola ana autombo amuna a mabulu pakupereka kuna MBUYA nsembe mwanabira m'mbuto mwache. Ngakhala imwe nkhabe funa kuombola bulu, buluyo mumkhumule khosi yache. Imwe mwathema kuombola ananu achimuna autombo.

¹⁴M'tsogolo muno, mwanako wamamuna angavunza kuti penepi pikulonganji, unamtawira kuti, ‘MBUYA adatibulusa mu Iguputo na mphamvu zache zikulu, kumbuto kukhali ife mabitchu kule.

¹⁵Ndzidzi udaumisa mtima mfumu wa ku Iguputo mbakhonda kutitawirisa kwenda, MBUYA adapha ana onsene achimuna autombo m'dziko ya Iguputo, anthu na pifuyo pene pabodzi. Ndi thangwi yache tikupereka nsembe ana achimuna autombo a pifuyo kuna MBUYA, mbwenye mbatiombola anathu onsene achimuna autombo.

¹⁶Chenechi chinakhala chikumbuso ninga chinthu chinango chakumangirirwa pamkono pathu penu pachipumu pathu, pinatikumbusa kuti MBUYA adatibulusa mu Iguputo na mphamvu zache zikulu.’ ”

¹⁷Pidatawira mfumu wa ku Iguputo kuti anthu aende, Mulungu hadaaendese na njira yakugwanda na kudziko ya Afilisti tayu, podi kwene kuti ikhali njira yachigwandira. Mulungu adalonga mbati, “Ine nkhabe funa kuti anthu asanduze manyerezero awo mbabwerera ku Iguputo, ngakhala iwo anaona kuti akwenda kamenya nkhondo.”

¹⁸M'mbuto mwache iye adaadzesa na njira yakuzungulira kudzera m'thando yatchetcha kuyang'ana ku Nyanza Yakufira. Aisraele akhali na pida kamenya nkhondo.

¹⁹Mose adakwata mtembo wa Yosefe ninga mukhadapichitira Yosefe kuti Aisraele adumbire. Yosefe adalonga mbati, “Ndzidzi unakupulumusani Mulungu, imwe mwathema kuthukula magogodo anga kubulukira pa mbuto ino.”

²⁰Aisraele adabuluka ku Sukoti mbamanga msasa pa Etamu, kunkhomo kwa thando yatchetcha.

²¹Na masikati MBUYA akhaenda patsogolo pawo m'makole akuoneka ninga mzati kuonesa njira, na mosiku akhaenda patsogolo pawo m'moto wakuoneka ninga mzati kuapasa cheza, towera akwanise kufamba mosiku na masikati.

²²Makole akuoneka ninga mzati ndzidzi onsene ukhaenda patsogolo pa anthu na masikati, pontho moto wakuoneka ninga mzati ukhaenda patsogolo pa anthu na mosiku.