Read cisena KUBULUKA 14 Bible Online

KUBULUKA 14 - cisena bible

KUBULUKA 14

¹Tenepo MBUYA adalonga kuna Mose mbati,

²“Panga Aisraele kubwerera m'nduli kuti akamange msasa patsogolo pa Pihahiroti; pakati pa Migidoli na Nyanza Yakufira, chifupi na Baala-Zefoni.

³Mfumu ananyerezera kuti Aisraele akwenda mbatsalakatika pyawo m'dzikomo mbachimwana kuwambuka thando yatchetcha.

⁴Ndinamchitisa kuuma mtima mbakuthamangisani, tenepo kukunda kwanga pa mfumu na anyankhondo ache kunachitisa kuti ndilemedzwe. Penepo Aiguputo anapidziwa kuti ine ndine MBUYA.” Aisraele adachita ninga montho mukhadaapangirwa iwo.

⁵Pidapangwa Mfumu wa ku Iguputo kuti anthu akhadathawa, iye na mathubu ache adasanduza manyerezero awo mbalonga mbati, “Tachitaponji? Ife tatawirisa Aisraele kwenda pyawo, pontho tataya mabitchu athu!”

⁶Mfumu adamanga chingolo chache cha nkhondo mbakwata anyankhondo ache kwenda nawo.

⁷Iye adalamuka pabodzi na pingolo madzana matanthatu pyakusankhulika kuthimizapo pingolo pyache pinango pyonsene pya mu Iguputo pyakutsogolerwa na akadamu awo.

⁸MBUYA adaumisa mtima wa mfumu, tenepo iye adaatewera m'nduli Aisraele, ale akhabuluka mu Iguputo na mulikiti mwakuonesa kukunda.[11]

⁹Anyankhondo a ku Iguputo, na akavalo onsene, pingolo, anyakupitekenya, adaathamangisa mbaafikira chifupi padakhala iwo pale m'khundu mwa Nyanza Yakufira chifupi na Pihahiroti na Baala-Zefoni.

¹⁰Pidaona Aisraele mfumu na anyankhondo ache akulikitika kudza kuna iwo, adagoswerwa pyakwanga mbakhuwa kuna MBUYA.

¹¹Iwo adalonga kuna Mose mbati, “Ayi ku Iguputo kule nkhabeko masiye? Ayi udatidzesa m'thando yatchetcha muno kufuna kuti tiphiwe? Yang'ana pyachita iwe pakutibulusa mu Iguputo!

¹²Ayi ife sidakupange tayu mu Iguputo mule kuti penepi pinachitika? Ife tidakupanga kuti utileke pyathu, pontho kuti tikhale pyathu mabitchu mu Iguputo. Mbapidakhala pyadidi kukhala pyathu mabitchu kweneko, kusiyana na kufa m'thando yatchetcha muno.”

¹³Mose adatawira mbati, “Lekani goswerwa! Imirani dzololo, tenepo munati muone pinafuna chita MBUYA kukupulumusani lero; imwe munaonave pontho Aiguputo tayu.

¹⁴MBUYA anakumenyerani nkhondo, tenepo imwe nkhabeve funika chita na chinthu chene tayu.”

¹⁵MBUYA adalonga kuna Mose mbati, “Mwatani munalira kuti muphedziwe? Panga anthu athimize kwenda m'tsogolo.

¹⁶Kwiza m'dzulu ndodo yako mbumenye panyanzapo. Madzi anagawikana, tenepo Aisraele anakwanisa kuwambuka na pakuuma.

¹⁷Ine ndinaumisa mtima Aiguputo pyakwanga mwakuti anaatewera basi na penepo, tenepo ndinatambira chilemedzo pakukunda mfumu, anyankhondo ache, pingolo pyache na anyakupitekenyache.

¹⁸Ndingaakunda, Aiguputo anapidziwa kuti ine ndine MBUYA.”

¹⁹Mngelo wa Mulungu, ule akhadakhala patsogolo pa anyankhondo Aisraele adabuluka patsogolo mbaenda m'nduli mwawo. Makole akuoneka ninga mzati adafambambo mpakana adakhala

²⁰pakati pa Aiguputo na Aisraele. Makole adachitisa kuti Aiguputo aone mdima, mbwenye adapasa cheza kuna Aisraele, natenepo anyankhondo hadakwanise kufikirana chifupi mosiku onsene ule tayu.

²¹Mose adakwata ndodo yache mbathonya nayo panyanza pale, tenepo MBUYA adabweza nyanza ile m'nduli na mphepo ikulu yakumabulukiro dzuwa. Mphepo idamenya mosiku onsene mbiumisa nyanza. Madzi adagawikana,

²²tenepo Aisraele adawambuka na pakuuma pakati pa mafufu mawiri a madzi.

²³Aiguputo adaathamangisa na pingolo pyawo, akavalo awo na anyakupifambisa kuatewera na m'nyanzamo.

²⁴Makalakwecha mbadzati fika MBUYA adayang'ana pansi kubulukira m'moto na makole pyakuoneka ninga mzati pile pana anyankhondo a ku Iguputo mbaachitisa kuzunguzika pikulu.

²⁵Iye adachitisa magaleta a pingolopyo kutcherera mwakuti adafamba mwanyatwa pyakwanga. Aiguputo adalonga mbati, “MBUYA akumenyera nkhondo Aisraele kumenyana nafe. Tendeni tibulukemo pyathu!”

²⁶MBUYA adalonga kuna Mose mbati, “Futhulira dzanjako panyanzapo, tenepo madzi anabwerera pana Aiguputo, pingolo pyawo na anyakupitekenyache.”

²⁷Tenepo Mose adafuthulira dzanjache panyanza pale, tenepo m'makalakwecha madzi adabwerera m'mbuto mwache ninga montho mwakale. Aiguputo adayesa kuthawa m'madzi mule, mbwenye MBUYA adaaponyera m'nyanza monthomo.

²⁸Madzi adabwerera mbabiza pingolo, anyakupitekenya na anyankhondo onsene a ku Iguputo akhadatewera Aisraele m'nyanza ale; nkhabe na mbodzi ene adasalirapo tayu.

²⁹Mbwenye Aisraele adawambuka nyanza ile na pakuuma, pakati pa mafufu mawiri a madzi.

³⁰Pansiku yeneyo MBUYA adapulumusa Aisraele kuna Aiguputo, tenepo Aisraele adaaona amala kufa m'khundu mwa nyanza.

³¹Pidaona Aisraele mphamvu zikulu zidakundira MBUYA Aiguputo, iwo adagopa MBUYA; tenepo iwo adaikha chikhulupiro chawo pana MBUYA na pana nyabasache Mose.