Read cisena KUBULUKA 15 Bible Online

KUBULUKA 15 - cisena bible

KUBULUKA 15

¹Tenepo Mose na Aisraele adaimba nyimbo ishi kuna MBUYA: “Ndinaimbira MBUYA, thangwi ya kukunda kwache kwa demelero; iye aponya m'nyanza akavalo na anyakuapakira.

²MBUYA ndi nyakutchinjirizanga wamphamvu; iye ndiye ene andipulumusa. Iye ndi Mulungu wanga, tenepo ndinamkuza, iye ndi Mulungu wa babanga, tenepo ndinaimba pya ukulu wache.

³MBUYA ndi nyankhondo; MBUYA ndiye dzinache.

⁴“Iye adaponya m'nyanza anyankhondo a ku Iguputo na pingolo pyawo pene; akadamu ache akufunika adabizwa m' Nyanza Yakufira.

⁵Nyanza yakuzwika idaabisa; iwo adalilima ninga mwala.

⁶“Dzanjanu yamadyo, MBUYA, njakudemelera, thangwi ya mphamvu zache; imbagwanda-gwanda anyamalwa m'mapindi.

⁷Na ukulu wanu wamphamvu imwe mudagwisa anyamalwanu; kuzhangali kwanu kudaapisa ninga moto kupisa maudzu.

⁸Imwe mudamenya na muyanu panyanza, madzi mbagawikana; mbaimira ninga fufu; pambuto pakuzwika pyakwanga pale padasanduka pakuuma.

⁹Nyamalwa adalonga mbati, ‘Ndinati ndiathamangise mbandiaphata; ndinati ndigawe mfumawo mbandikwata pyonsene pinafuna ine; ndinati ndikwate talasadanga mbandiapokosera pinthu pyawo na dzanjanga.’

¹⁰Mbwenye muya udapepesa imwe ule, MBUYA, udabiza Aiguputo onsene m'nyanza; iwo adalilima m'madzi akugoswa ninga simbi.

¹¹“MBUYA, mbani unango pakati pa milungu akhala ninga imwe? Mbani akhala ninga imwe, wakuchena pontho wakudodomesa? Mbani anakwanisa kuchita pyakudodomesa pontho pyamphamvu ninga pimbachita imwe?

¹²Imwe mudafuthula dzanjanu yamadyo, tenepo dziko yapansi idakhudyula anyamalwathu.

¹³Mudatsogolera anthu akhadapulumusa imwe ale, kuonesa kuafuna kwanu kokhonda mala; na mphamvu zanu imwe mudaaphata nsenji mpakana kudziko yanu yakupambulika.

¹⁴Madzinza apiva penepi, tenepo atetemera na mantha; Afilisti aphatwa na mantha.

¹⁵Mafumu a ku Edomu aswipa mtima; amuna amphamvu a ku Moabu ana mantha; anthu a ku Kanani ali pampani-pani.

¹⁶Mantha akulu na dzedze pyaagwera. Na kuona mphamvu zanu, MBUYA, iwo aimira dzololo ninga chakusemwa kufikirana anthu anu agwande, anthu adabulusa imwe paubitchu ale.

¹⁷Imwe mudaadzesa kuno mbamuabzala paphiri panu, mbuto ile imwe, MBUYA, mwaisankhula kukhala mudzi wanu, Nyumba ya Mulungu, ile idamanga imwe mwekha ene.

¹⁸Imwe, MBUYA, munakhala mfumu kwenda na kwenda.”

¹⁹Aisraele adawambuka nyanza na pakuuma. Mbwenye pidafuna wambukambo pingolo pya Aiguputo pabodzi na akavalo awo na anyakupitekenya, MBUYA adabwezera madzi mbaabiza onsene.

²⁰Mprofeti Miriamu, nyamaingache Aroni, adakwata chisekese, tenepo akazi onsene adamtsanzira kuimbambo pisekese na kuvina.

²¹Miriamu adaaimbira nyimbo yakuti: “Imbirani MBUYA, thangwi ya kukunda kwache kwa demelero; iye aponya m'nyanza akavalo na anyakuapakira.”

²²Tenepo Mose adatsogolera Aisraele kubuluka nawo pa Nyanza Yakufira mbaenda kuthando yatchetcha ya Shuri. Nsiku zitatu iwo adafamba na m'thando yatchetchamo, kwache hadagumane madzi tayu.

²³Tenepo adafika pambuto panango pakuchemerwa Mara, kwache madzi a penepo akhali akuwawa pyakwanga mwakuti hadakwanise kumwa tayu. Ndi thangwi yache padathulwa Mara.[12]

²⁴Anthu adadungunya kuna Mose mbamvunza mbati, “Tinamwanji?”

²⁵Mose adalira kuna MBUYA, tenepo MBUYA adamuonesa kaphindi kamuti. Iye adaponya m'madzi, madzimbo adasanduka akukoma. Penepo MBUYA adaapasa matongero na mwambo, pontho penepo iye adaayesa

²⁶mbalonga mbati, “Ngakhala imwe munandivera monsene mwene pakuchita pinthu pinanyerezera ine kuti mphyakulungama, pontho pakuvera matongero na kukoya mwambo wanga, ine nkhabe kukutchunyusani na utenda wa mtundu onsene tayu, ule udadzesa ine pana anthu a ku Iguputo. Ndine MBUYA, nyakukuwangisani.”

²⁷Kubuluka penepo iwo adafika ku Elimu, kule kukhali mphuno khumi na ziwiri za madzi, pontho miti yamdikhwa makumanomwe; penepo adamanga msasa chifupi na madziwo.