Read cisena KUBULUKA 16 Bible Online

KUBULUKA 16 - cisena bible

KUBULUKA 16

¹Anthu a dzinza ya Israele adabuluka ku Elimu, tenepo pansiku yakhumi na chishanu ya mwezi wachiwiri, pikhadabuluka iwo mu Iguputo, adafika kuthando yatchetcha ya Sini, pakati pa Elimu na phiri ya Sinai.

²M'thandomo anthu onsene adadungunya kuna Mose na Aroni

³mbati, “Tikupikhumba kuti MBUYA mbadatipha pyache mu Iguputo. Kweneko tikhakwanisa kukhalambo pansi kuzungulira pikalango pya nyama, pontho na pyakudya pywa mtundu unango pizinji ninga mukhapifunira ife. Mbwenye iwe watidzesa m'thando muno kufuna kwene kutiphesa na njala.”

⁴MBUYA adalonga kuna Mose mbati, “Chinchino ndinafuna kuvumbisa pyakudya kubulukira kuthando pyakukwanira monsenene. Anthu athema kubuluka panja nsiku zonsene mbagumanya pyakudya pyakukwanira nsiku yeneyo. Penepa ndinakwanisa kuayesa, ngakhala iwo anakoya matongero anga.

⁵Pansiku yachitanthatu iwo athema kugumanya pyakudya pyakukwanira nsiku ziwiri mbapisasanya.”

⁶Tenepo Mose na Aroni adalonga kuna Aisraele onsene mbati, “Mawulo ano munati mupidziwe kuti MBUYA ndiye adakubulusani mu Iguputo.

⁷Na machibese munaona demelero ya MBUYA. Iye ava kudungunya kwanu kuna iye. Ndife animbo ife kuti mudungunye kuna ife.”

⁸Tenepo Mose adalonga mbati, “Ndi MBUYA anakupasani nyama yakuti mudye na mawulo, pontho na machibese mikate mizinji ninga munapifunira imwe, thangwi iye ava kudungunya kudachita imwe kuna iye. Ndife animbo ife. Ndzidzi unadungunya imwe kuna ife, penepo mukudungunya kuna MBUYA.”

⁹Mose adalonga kuna Aroni mbati, “Panga anthu onsene a dzinza ya Israele kudza dzaimira pamaso pa MBUYA, thangwi iye ava kudungunya kwawo.”

¹⁰Mukhalonga Aroni kuna Aisraele onsene, iwo adazungunuka mbayang'ana kuthando yatchetcha, vumbu-vumbu demelero ya MBUYA idaoneka m'makole.

¹¹MBUYA adalonga kuna Mose mbati,

¹²“Ndava kudungunya kwa Aisraele. Apange kuti pakuthobila dzuwa, iwo anakhala na nyama zakuti adye, pontho na machibese onsene anati akhale na mikate inafuna iwo. Tenepo anapidziwa kuti ine, MBUYA, ndine Mulungu wawo.”

¹³Na mawulo mkumbi ukulu wa akambuma udambuluka-mbuluka mwenemo mbadzaza msasa onsene ule, pontho na machibese pansi pakhali bume kuzungulira msasa onsene ule.

¹⁴Pikhakungunuka bume ile pansi m'thando mule padasala pinthu pinango ping'ono-ping'ono pyakufinuka ninga mataka a munyu.

¹⁵Pidapiona Aisraele, hadapidziwe kuti pikhalinji tayu mbavunzana unango na mwanzache mbati, “Ninji penepi?” Mose adalonga kuna iwo mbati, “Kweneku nkhudya kudalonga MBUYA kuti anakupasani kuti mudye kule.

¹⁶MBUYA alonga kuti munthu onsene athema kugumanya ninga munapifunira iye, konta yachikhumi ya ndowa[13] kada munthu m'khumbi mwache.”

¹⁷Aisraele adachita penepi, anango adagumanya pizinji, anango pang'ono.

¹⁸Pidapiyeza iwo, ale adagumanya pizinji hakhali na pizinjiletu tayu, alembo adagumanya pyakuchepa hakhali na pyakuchepaletu tayu. Munthu onsene akhadagumanya ninga mukhapifunira iye.

¹⁹Mose adalonga kuna iwo mbati, “Nee mbodzi athema kukoya pyakuti adye mangwana tayu.”

²⁰Mbwenye anango a iwo hadaikhe konta pidalonga Mose pile tayu mbakoya pyawo pinango. Mangwana mwache pidadzala na mfunye mbapinunkha, tenepo Mose adazhangali nawo.

²¹Machibese onsene munthu onsene akhagumanya ninga mukhapifunira iye, tenepo pikhapisa dzuwa, pyonsene pidasalira pansi pile pikhanyunguluka.

²²Pansiku yachitanthatu adagumanya pyakudya pyakukwanira nsiku ziwiri, konta yachishanu ya ndowa kada munthu. Akadamu onsene a Aisraele adadza dzapanga Mose pya pinthu penepi,

²³tenepo iye adalonga kuna iwo mbati, “MBUYA atonga kuti mangwana ndi Nsiku Yakupuma, yakupambulika kuna MBUYA. Phikani lero pinthu pinafuna imwe kuphika, pontho terekani pinthu pinafuna imwe kutereka. Pyonsene pyakusalira pikoyerwe mangwana.”

²⁴Ninga mudaatongera Mose, iwo adakoya pyonsene pidasalira pile mpakana mangwana mwache; ipyo hapidavungike, penu kuphatwa na mfunye tayu.

²⁵Mose adalonga mbati, “Idyani penepi lero, thangwi lero ndi Nsiku Yakupuma, nsiku yakupambulika kuna MBUYA; imwe nkhabe gumana pyakudya panja tayu.

²⁶Imwe mwathema kugumanya pyakudya nsiku zitanthatu, mbwenye pansiku yachinomwe, Nsiku Yakupuma, panakhala nkhabe na chinthu chene tayu.”

²⁷Pansiku yachinomwe anango a iwo adenda kagumanya kudya, kwache hadakugumane na pang'ono pene tayu.

²⁸Tenepo MBUYA adalonga kuna Mose mbati, “Anthumwe, munaleka lini kukhonda vera matongero anga?

²⁹Kumbukani kuti, ine MBUYA, ndakupasani nsiku yakuti mupume; ndi thangwi yache pansiku yachitanthatu ndzidzi onsene ndinakupasani pyakudya pyakukwanira nsiku ziwiri. Pansiku yachinomwe munthu onsene athema kukhala panyumba pache, nee kubuluka tayu.”

³⁰Natenepo anthu hakhaphata basa tayu pansiku yachinomwe.

³¹Aisraele adathula pyakudya penepi mana.[14] Pikhakhala ninga mbewu zing'ono-zing'ono zakuchena mbapitapira ninga pimikate pyakuikhwa uchi.

³²Mose adalonga mbati, “MBUYA atipanga kuti tikoye mana anango, kukoyera pidzukulu pyathu, towera pikwanise kuona pyakudya pidatipasa MBUYA m'thando yatchetcha, ndzidzi udatibulusa iye mu Iguputo.”

³³Mose adalonga kuna Aroni mbati, “Kwata chitomba, uikhemo mana akukwana konta yachikhumi ya ndowa, mbuchiikhe pamaso pa MBUYA, kukoyerwa pidzukulu pyathu.”

³⁴Ninga mudaapangira MBUYA, Mose na Aroni adachiikha kutsogolo kwa Bokosi ya Chiverano, towera chikwanise kukoyeka.

³⁵Aisraele adadya pyaka makumanayi, mpakana adafika kudziko ya Kanani, kudakhazikika iwo kule.

³⁶(Ndowa ikhali mdida ukhaphatiswa basa ndzidzi wenewo kuyeza nawo pinthu pyakuuma.)