Read cisena KUBULUKA 17 Bible Online

KUBULUKA 17 - cisena bible

KUBULUKA 17

¹Anthu onsene a dzinza ya Israele adabuluka kuthando yatchetcha ya Sini mbaenda mbuto na mbuto ninga mukhaatongera MBUYA. Iwo adamanga msasa pa Refidimu, mbwenye kweneko kudasowa madzi akumwa.

²Iwo adadungunya kuna Mose mbati, “Ngatipase madzi akumwa.” Mose adatawira mbati, “Mwatani munadungunya? Mwatani munayesa MBUYA?”

³Mbwenye anthu akhali na nyota pyakwanga mbathimiza kudungunya kuna Mose mbati, “Udatibulusiranji ku Iguputo? Kadi ukufuna ife, anathu, pabodzi pene na pifuyo pyathu kuti tife na nyota?”

⁴Mose adalira kuna MBUYA mbati, “Ndinachita tani na anthuwa? Iwo ali chifupi kundiponyera miyala.”

⁵MBUYA adalonga kuna Mose mbati, “Kwata akadamu anango a Aisraele, uende nawo patsogolo pang'ono pa anthu. Kwata ndodo idamenya na iwe madzi mumkulo wa Nailo ku Iguputo ile.

⁶Ndinaimira pamaso pako pamwala paphiri ya Sinai. Umenye pamwala, tenepo madzi anabuluka m'mwalamo kuti anthu amwe.” Mose adachita tenepo pamaso pa akadamu a Aisraele.

⁷Mbuto yeneyo idathulwa Masa pontho Meriba,[15] thangwi Aisraele adadungunya mbayesa MBUYA na pidavunza iwo kuti, “Ayi MBUYA ali nafe penu tayu?”

⁸Aamaleki adadza dzasosa Aisraele pa Refidimu.

⁹Mose adalonga kuna Yoswa mbati, “Sankhula amuna anango kuti mangwana akamenye nkhondo na Aamaleki. Ine ndinaimira pansonga ya phiri kuphatira ndodo idandipanga Mulungu kuti ndikwate ile.”

¹⁰Yoswa adachita ninga mudampangira Mose mbaenda kamenya nkhondo na Aamaleki, uku Mose, Aroni na Huri adenda pansonga ya phiri.

¹¹Ndzidzi ukhaphatira Mose ndodo yache m'dzulu, Aisraele akhakunda anyamalwawo, mbwenye pikhatchithisa iye mikono yache pansi, Aisraele akhakundwa na Aamaleki.

¹²Pidatopa mikono ya Mose, Aroni na Huri adamdzesera mwala kuti iye akhalepo, uku iwo akhaimira m'khundu mwache mbaphatira m'dzulu mikono yache, kuiphatira mpakana kunja kudadoka.

¹³Penepa Yoswa adakundiratu Aamaleki.

¹⁴Tenepo MBUYA adalonga kuna Mose mbati, “Lemba pya kukunda kweneku, towera kukumbukwe. Panga Yoswa kuti ine ndinavungiratu Aamaleki.”

¹⁵Mose adamangapo guwa yansembe mbaithula kuti, “MBUYA ndi Banderanga.”

¹⁶Iye adalonga mbati, “Kwizani m'dzulu bandera ya MBUYA! MBUYA anathimiza kutimenyera nkhondo kuna Aamaleki ndzidzi onsene!”