Read cisena KUBULUKA 18 Bible Online

KUBULUKA 18 - cisena bible

KUBULUKA 18

¹Yetero, tebzalache Mose, nyansembe wa ku Midiani, adava pyonsene pikhadachita Mulungu kuna Mose, pontho na kuna Aisraele ndzidzi udaabulusa iye mu Iguputo.

²Tenepo iye pabodzi na Zipora, mkazache Mose, ule akhadasalira, adadza kuna Mose,

³pontho na Gereshomu na Eliezere, ana awiri achimuna a Zipora. Mose akhadalonga mbati, “Ine ndikhali mlendo m'dziko yachilendo”; tenepo akhadathula mbodzi wa anache Gereshomu.[16]

⁴Iye akhadalonga pontho mbati, “Mulungu wa babanga adandiphedza, pontho adandipulumusa kubulukira kuna mfumu wa ku Iguputo akhafuna kundipha ule”; tenepo adathula mwana unango ule Eliezere.[17]

⁵Yetero adadza na mkazache Mose na anache achimuna awiri ale m'thando yatchetcha, kule kukhadamanga Mose msasa paphiri ya Mulungu.

⁶Iye akhadatumiza mphangwa kuna Mose kumpanga kuti iwo akhabwera,

⁷tenepo Mose adenda kagumanikana nawo, adamulambira mbampsompsona. Iwo adapasana mwenyikiro unango na mwanzache mbaenda kukhumbi ya Mose.

⁸Mose adapanga Yetero pyonsene pikhadachita MBUYA kuna mfumu na kuna anthu a ku Iguputo, towera apulumuse Aisraele. Iye adampanga pontho pya nyatwa zikhadaona anthu paulendo wawo, pontho pya mule mudaapulumusira MBUYA.

⁹Pidapiva Yetero pyonsenepi, adakomerwa

¹⁰mbalonga mbati, “Kuzani MBUYA, ule adakupulumusani kuna mfumu, pontho na kuna anthu a ku Iguputo! Kuzani MBUYA, ule adapulumusa anthu ache paubitchu!

¹¹Chinchino ndapidziwa kuti MBUYA ngwamkulu kupiringana milungu yonsene, thangwi iye adachita penepi kuna anthu a ku Iguputo akhavuya Aisraele ale.”

¹²Yetero adadza na nsembe zakupyerera pontho na nsembe zinango kuti ziperekwe kuna Mulungu; tenepo Aroni na akadamu onsene a Aisraele adenda na tebzalache kadya pyakudya pyakupambulika kupembedza Mulungu.

¹³Mangwana mwache Mose akhatonga miseru pakati pa anthu, tenepo akhali pakaliki-liki kutomera machibese mpakana mosiku.

¹⁴Pidaona Yetero basa yonsene ikhaphata Mose ile, iye adavunza mbati, “Pyonsenepi ninji pinachitira iwe anthuwa? Watani unachita pyonsenepi wekha ene, uku anthu akukuimirira kubulukira machibese mpakana mosiku kufuna iwepo?”

¹⁵Mose adatawira mbati, “Ndathema kuchita penepi, thangwi anthu ambadza kuna ine dzavunza nzeru kuna Mulungu.

¹⁶Ngakhala anthu awiri ana mseru unango na mwanzache mbadza kuna ine, inembo ndimbapitonga kuti wadidi mbani pakati pa awiriwo, tenepo ndimbaapanga pya matongero na mwambo wa Mulungu.”

¹⁷Tenepo Yetero adalonga mbati, “Iwe hukupichita m'njira yadidi tayu.

¹⁸Iwe pabodzi pene na anthu ana iwewa munatopa. Penepi mphyakunensa pyakwanga pyakuti iwe upichite wekha ene.

¹⁹Chinchino vesera ndikupangize kupichita kwache mwadidi, tenepo Mulungu anakhala nawe. Mphyadidi kuti iwe uimirire anthu pamaso pa Mulungu mbudza na miseru yawo kuna iye.

²⁰Iwe uafunzise matongero a Mulungu, pontho uapange mule mwathema iwo kuchita.

²¹Mbwenye kuthimiza penepa, iwe usankhule amuna pakati pa anthu onsene akukwanisa kudziwa pyakuchita mbuaikhe kukhala akadamu a Aisraele: akadamu a anthu a magulu pikwi, madzana, makumashanu na khumi. Iwo athema kukhala anthu akugopa Mulungu, ale anakwanisa kunyindirika, pontho nkhabe kwanisa kudyekerwa tayu.

²²Iwo aphate basa ninga anyakutonga miseru ndzidzi onsene kuna anthu. Iwo anakwanisa kudza na miseru yakunensa ya anthu kuna iwe, kwache iwo okha ene anakwanisa kutonga miseru ing'ono-ing'ono. Penepi pinachitisa kuti basa ikhonde nensa kuna iwe, thangwi iwo anakuphedza.

²³Ungachita tenepo, ninga munalongera Mulungu, iwe nkhabe topa tayu, pontho anthu onsenewa anabwerera m'misa mwawo na miseru yakutongwa.”

²⁴Mose adavera pidampanga Yetero pile,

²⁵mbasankhula amuna akukwanisa kudziwa pyakuchita pakati pa Aisraele. Iye adaaikha kukhala akadamu a magulu-magulu a anthu chikwi, dzana, makumashanu na khumi.

²⁶Iwo adaphata basa ninga atongi kuna anthu ndzidzi onsene, mbadza na miseru yakunensa kuna Mose, mbwenye mbakwanisa kupitongera okha ene miseru ing'ono-ing'ono.

²⁷Tenepo Mose adagonekana na Yetero, natenepo Yetero adabwerera pyache kwawo.