Read cisena KUBULUKA 19 Bible Online

KUBULUKA 19 - cisena bible

KUBULUKA 19

¹Aisraele adabuluka ku Refidimu, tenepo pansiku yakutoma ya mwezi wachitatu pidabuluka iwo mu Iguputo, adafika kuthando yatchetcha ya Sinai. Kweneko adamanga msasawo m'tchinde mwa phiri ya Sinai,

³tenepo Mose adakwira paphiripo kagumanikana na Mulungu. MBUYA adamchemera paphiripo mbampanga pyakuti akalonge kuna Aisraele, pidzukulu pya Yakobo pile, kuti:

⁴“Imwe mudaona pile pidachita ine, MBUYA, kuna anthu a ku Iguputo, pontho mudakuyang'anirani ine mwadidi ninga mumbachitira mphamba kuthukula anache pamaphaphido ache, mbandikudzesani kuna ine kuno.

⁵Chinchino imwe mungandivera mbamukoya chiverano changa, munati mukhale anthu anga ene. Dziko yonsene yapansi njanga, mbwenye imwe munakhala anthu anga akusankhulika,

⁶anthu akupambulika kuna ine ndekha basi, tenepo imwe munanditumikira ninga anyansembe.”

⁷Mose adatchitha paphiripo mbakagumanyisa akadamu onsene a anthu pabodzi mbaapanga pyonsene pikhadampanga MBUYA.

⁸Tenepo anthu onsene ale adatawira pabodzi mbati, “Tinati tichite pyonsene pyalonga MBUYA.” Mose adenda kalonga penepi kuna MBUYA.

⁹MBUYA adalonga kuna Mose mbati, “Ndinabwera kuna iwe m'makole akuswipa, towera anthu andive ndikulonga nawe, tenepo iwo anakukhulupira kubulukira chinchino kwenda m'tsogolo.” Mose adapanga MBUYA mafala akhadatawira anthu ale,

¹⁰tenepo MBUYA adalonga kuna iye mbati, “Ndoko kuna anthu kaapange kuti akapichitise okha ene kukhala akupambulika kuna ine lero na mangwana kusasanyika kuti apembedze. Iwo athema kufula nguwo zawo,

¹¹pontho kuti nkuchono mwache asasanyike, thangwi pansiku yeneyo ndinatchithira paphiri ya Sinai, pale anthu onsene anakwanisa kundiona.

¹²Gwanda madire kuzungulira phiri kuti anthu aleke numpha madirewo, pontho uapange kuti aleke kwira paphiripo, penu kufendeza chifupi na phiriyo. Ngakhala munthu anaphata phiriyo, iye anati aphiwe;

¹³iye athema kuponyerwa miyala, penu kulaswa na matswimo okhonda munthu na mbodzi ene kumkhuya. Penepi pikulonga pya anthu na pifuyo pene; ipyo pinati piphiwe. Mbwenye ngoma ingaveka, penepo anthu onsene athema kwenda kuphiriko.”

¹⁴Tenepo Mose adatchitha paphiripo mbachitisa anthu kukhala akupambulika, tenepo iwo adafula nguwo zawo,

¹⁵Mose adalonga kuna iwo mbati, “Nkuchono na masikati sasanyikani, pontho lekani pita m'bonde ndzidzi wenewo.”

¹⁶Na machibese a nsiku yachitatuyo kukhali chiphaliwali na njazi, makole akuswipa adaoneka paphiripo, tenepo kulira kukulu kwa ngoma kudaveka. Anthu onsene pamsasa pale adatetemera na mantha.

¹⁷Mose adatsogolera anthu ale kubuluka kumsasako mbaenda nawo kagumana na Mulungu, tenepo iwo adaimira m'tchinde mwa phiriyo.

¹⁸Phiri yonsene idagudumirwa na utsi, thangwi MBUYA akhadatchithira penepo m'moto. Utsi udakwira m'dzulu ninga utsi wa m'dzenje ya moto, tenepo anthu onsene adatetemera pikulu.

¹⁹Dungu ya ngoma ikhathimiza kulira pikulu pene. Mose adalonga, tenepo Mulungu adamtawira na chiphaliwali.

²⁰MBUYA adatchithira paphiri ya Sinai mbachemera Mose kukwira pansonga paphiripo. Mose adakwira,

²¹tenepo MBUYA adalonga kuna iye mbati, “Tchitha ukacheuze anthu kuti aleke numpha madire kudza kuna ine dzandiona; angachita kwene tenepo, azinji a iwo anati afe.

²²Podi kwene anyansembe akudza chifupi athema kupichenesa okha ene, gopesera ndinaatchunyusa.”

²³Mose adalonga kuna MBUYA mbati, “Anthu nkhabe kwanisa kukwira pano tayu, thangwi imwe mudatitonga kuyesa phiriyi yakupambulika, pontho kugwanda madire kuizungulira.”

²⁴MBUYA adatawira mbati, “Tchitha ukakwate Aroni, udze naye kuno. Mbwenye anyansembe na anthu athema nee numpha madire kudza kuna ine tayu, gopesera ndinaatchunyusa.”

²⁵Mose adatchitha kuna anthu mbaapanga pinthu pikhadalonga MBUYA pile.