Read cisena KUBULUKA 2 Bible Online

KUBULUKA 2 - cisena bible

KUBULUKA 2

¹Ndzidzi wenewo mamuna unango wa dzinza ya Levi adasemba mkazi wa dzinza mwache monthomo,

²mbabala naye mwana wamamuna. Pidaona mkaziyo kuti mwanayo akhali wakubalika pyakwanga, iye adambisa miyezi mitatu.

³Mbwenye pikhali pyakuchimwanika kuthimiza kumbisa, iye adakwata chitundu chakusasanywa na mitete mbachikwalangula na upula kuti chileke pita madzi. Iye adaikha mwanayo mwenemo mbachisiya pakati pa mitete yakulapha pankhomole ya mkulo wa Nailo.

⁴Nyamaingache mwanayo adaimira patali pang'ono kuona chikhafuna kumchitikira mwanayo.

⁵Mwana wamkazi wa mfumu adadza kumkuloko kasamba, mwenemo anyabasache akhafamba-famba pyawo pankhomole ya mkulo. Kabodzi kene iye adaona chitundu pakati pa mitete yakulapha, tenepo adatuma bitchu wachikazi kachikwatapo.

⁶Mwana mfumu ule adachifungula mbaonamo mwana wamamuna. Mwanayo akhalira, tenepo iye adava naye nsisi. Iye adalonga mbati, “Weneyu ndi mbodzi wa ana a Chiheberi.”

⁷Nyamaingache mwana ule adamvunza mbati, “Munafuna ndikachemere mkazi wa Chiheberi kuti amuyamwise kukulererani?”

⁸Iye adatawira mbati, “Ndaphata miyendo ndoko.” Natenepo mtsikana ule adenda kachemera mache eneletu mwanayo.

⁹Mwana mfumu ule adapanga mkazi ule mbati, “Kwata mwanayo ukamuyamwise kundilerera, tenepo ine ndinakupagali.” Natenepo iye adakwata mwana ule mbaenda naye kamuyamwisa.

¹⁰Pidakula mwanayo, iye adenda naye kuna mwana mfumu, ule adamkwata mbasanduka mwanache ene. Iye adalonga yekha ene mbati, “Mwanayu ndidachita kumnula madzi, tenepo ndinamthula Mose.”[3]

¹¹Nsiku inango, pikhadakula Mose, adenda kafambira anthu ache a Chiheberi mbaona mukhakhakhamizirwa iwo kuphata mabasa akupha. Iye adaona pontho munthu wa ku Iguputo akupha Mheberi, mbodzi wa anthu ache.

¹²Mose adayang'ana-yang'ana, tenepo pidaona iye kuti pakhali nkhabe munthu unango chifupi, iye adapha munthu wa ku Iguputo ule mbafikhira mtembo wache m'tchetcha.

¹³Mangwana mwache iye adenda pontho kweneko mbaona Aheberi okhokha awiri akumenyana. Iye adalonga kuna ule akhaboneresa mwanzache mbati, “Watani unamenya Mheberi mnzako tenepa?”

¹⁴Munthu ule adatawira mbati, “Mbani adakuikha kukhala mfumu, pontho nyakutonga mseru pakati pathu? Ayi ukufuna kundipha ninga mudaphera iwe munthu wa ku Iguputo ule?” Tenepo Mose adachita mantha mbalonga yekha ene mbati, “Anthu adziwa pinthu pyachita ine.”

¹⁵Pidava mfumu pidachitikapyo, adayesa-yesa kuti aphe Mose, mbwenye Mose adathawa mbaenda kakhala kudziko ya Midiani. Nsiku inango pikhakhala Mose chifupi na mchera, ana anomwe achikazi a nyansembe wa dziko ya Midiani adadza dzatunga madzi mbadzaza pyakumweseramo mbamwesa mabira na mbuzi za babawo.

¹⁷Mbwenye amakabuswa anango akhathamangisa ana a Yetero. Tenepo Mose adenda kaavunulira mbaatungira madzi akumwesa pifuyo pyawopyo.

¹⁸Pidabwerera ana ale kuna babawo adaavunza mbati, “Mwatani mwachimbiza kudza lero?”

¹⁹Iwo adatawira mbati, “Munthu unango wa ku Iguputo adativunulira kuna amakabuswa, pontho atitungira madzi mbamwesa pifuyo pyathu.”

²⁰Iye adavunza anache ale mbati, “Munthu weneyu ali kupi? Mwatani kudza naye kuno? Ndokoni mukamchemere towera adye nafe pabodzi.”

²¹Natenepo Mose adatawira kukhala kweneko. Yetero adampasa Zipora mwanache wamkazi kuti akhale mkazache,

²²mbabala naye mwana wamamuna. Mose adalonga yekha ene mbati, “Ndine mlendo m'dziko muno, tenepo ndinamthula mwanayu Gereshomu.”[4]

²³Pidapita ndzidzi ukulu mfumu wa ku Iguputo adafa, mbwenye Aisraele akhabulira basi na ubitchu mbalira kuti aphedzwe. Kulira kwawo kudafika kuna Mulungu,

²⁴ule adava kubulira kwawo mbakumbuka chiverano chache na Abrahamu, Isake na Yakobo.

²⁵Iye adaona ubitchu wa Aisraele mbadziwa pikhachitika pile.[5]