Read cisena KUBULUKA 21 Bible Online

KUBULUKA 21 - cisena bible

KUBULUKA 21

¹“Pereka mwambo ufu kuna Aisraele:

²Ngakhala imwe munagula bitchu wa Chiheberi, iye akuphatireni basa pyaka pitanthatu. Chaka chachinomwecho iye athema kusudzulwa okhonda pagali na chinthu chene tayu.

³Ngakhala iye hakhadasemba tayu pidasanduka iye bitchu wanu, iye athema nee kukwata mkazi tayu ndzidzi unaenda iye; mbwenye ngakhala akhadasemba ndzidzi udasanduka iye bitchu wanu, iye athema kwenda na mkazache.

⁴Ngakhala mbuyache adampasa mkazi mbabala naye ana achimuna penu achikazi, mkazi na anawo ngambuyache, tenepo mamuna athema kwenda yekha ene.

⁵Mbwenye ngakhala bitchu anatawira kuti iye ambamfuna mbuyache, mkazache, na anache mbakhonda funa kusudzulwa,

⁶tenepo mbuyache aende naye kumbuto yakupembedzera Mulungu. Kweneko amtsamirise kumsuwo, penu kuthabwa ya msuwo mbamphola khutu na tchamfondo. Natenepo iye anakhala bitchu wache mpakana moyo wache onsene.

⁷“Ngakhala mamuna anagulisa mwanache wamkazi ninga bitchu, iye hadatheme kusudzulwa ninga mumbachitirwa mabitchu achimuna tayu.

⁸Ngakhala iye aguliswa kuna munthu unango ule anamsankhula kukhala mkazache, mbwenye munthuyo nkhabe kumfuna tayu, penepo iye athema kuombolwa na babache; mbuyacheyo nkhabe utongi wa kumgulisa kuna alendo tayu, thangwi iye achita pyakukhonda khulupirika.

⁹Ngakhala munthu anagula bitchu wachikazi kuti apase mwanache wamamuna, iye athema kumpasa utongi kukhala mwanache wamkazi.

¹⁰Ngakhala munthu anakwata mkazi wachiwiri, iye athema kuthimiza kupasa mkazache wakutoma phoso na nguwo, pontho utongi wakukhala mkazache sasawa ninga mukhachitira iye pakutoma.

¹¹Ngakhala hanakwanisa kupereka pinthu penepi kuna mkaziyo tayu, iye athema kumsudzula pyache okhonda pagali na chinthu chene.

¹²“Munthu anamenya mwanzache mbampha, iyembo athema kuphiwa.

¹³Kwache ngakhala iye adapichita mwasusudewu, pontho kuti Mulungu adapitawirisa kuti pichitike, iye anakwanisa kuthawa kwenda pyache kumbuto kwinango kunakusankhulirani ine, kweneko iye anakhala pakupata.

¹⁴Mbwenye munthu angazhangali mbapha mwanzache chadala, iyembo athema kuphiwa, podi kwene kuti athawire kuguwa yansembe kuti akakhale pakupata.

¹⁵“Munthu anamenya babache penu mache weneyo athema kuphiwa.

¹⁶“Munthu anaba munthu mnzache, penu kumgulisa, penu kumkoya ninga bitchu weneyo athema kuphiwa.

¹⁷“Munthu anatemberera babache penu mache weneyo athema kuphiwa.

¹⁸“Ngakhala pana nthonga, tenepo mbodzi atema mwanzache na mwala, penu na shoko, kwache mbakhonda kumpha, iye nkhabe thema kutchunyuswa tayu. Mbwenye ngakhala munthu adatemwayo anagona patalimba, mbwenye m'nduli mwache mbakwanisa kulamuka mbafamba panja na mthondodzo, munthu adamtema ule, athema kupagali mwanzache, thangwi ya ndzidzi udavunga iye mbali gone ule, pontho mbamuyang'anire mwadidi mpakana iye awange.

²⁰“Ngakhala munthu anakwata ndodo mbamenya nayo bitchu wache wamamuna penu wamkazi, bitchuyo mbaferatu ponthopo, munthuyo athema kutchunyuswa.

²¹Mbwenye bitchuyo angakhala nsiku ibodzi penu ziwiri okhonda kufa, mbuyache hadatheme kutchunyuswa tayu. Kuvungika kwa pinthu pyache kwakwana.

²²“Ngakhala amuna anango anamenyana mbakuwaza mkazi wamimba, towera ataye mwanache, mbwenye mkaziyo mbakhonda kuwazika pikulu pene, munthu amkuwaza ule athema kupagali konta yonsene inalonga mamunacheyo mwakutsikimizirwa na anyakutonga miseru.

²³Mbwenye ngakhala mkazi yekha ene akuwazika kutchunyuswa, kwache ndi moyo kupagali moyo,

²⁴diso kupagali diso, dzino kupagali dzino, dzanja kupagali dzanja, dzinyalo kupagali dzinyalo,

²⁵kuotcha na moto kupagali kuotchambo na moto, chironda kupagali chironda, pontho mibzimbiri kupagali mibzimbiri.

²⁶“Ngakhala munthu anamenya diso ya bitchu wache wachimuna penu wachikazi mbisweka, iye athema kusudzula bitchuyo ninga kumpagali diso yacheyo.

²⁷Ngakhala iye amkhutcha dzino, iye athema kusudzula bitchuyo ninga kumpagali dzino yache.

²⁸“Ngakhala ng'ombe yapha munthu na kumdima, ng'ombeyo yathema kuphiwa na miyala, pontho nyamache ileke dyiwa; mbwenye mwenechiroache hadatheme kutchunyuswa tayu.

²⁹Mbwenye ngakhala ng'ombeyo ikhali na chisimo chakudima anthu, pontho kuti mwenechiro adacheuzwa mbakhonda kupiikha konta, tenepo ngakhala yapha munthu na kumdima, iyo yathema kuphiwa na miyala, pontho mwenechiroache athema kuphiwambo.

³⁰Kwache ngakhala mwenechiro ng'ombeyo atawiriswa kupagali mseruwu kuombola moyo wache, iye athema kupagali konta yonsene inafunikayo.

³¹Ngakhala ng'ombe yapha mphale penu mtsikana, matongero ache ambakhala sasawa.

³²Ngakhala ng'ombe yapha bitchu wachimuna penu wachikazi, mwenechiro ng'ombe athema kupagali mwenechiro bitchuyo kobiri zasiliva makumatatu, pontho ng'ombeyo yathema kuphiwa na miyala.

³³“Ngakhala munthu anabulusa mphampha padzenje penu angakumba dzenje mbakhonda kuiphopha, tenepo ng'ombe penu bulu angagweramo,

³⁴nyakukumba dzenjeyo athema kupasa kobiri mwenechiro chifuyocho, pontho nyama yakufayo yathema kukhala yache.

³⁵Ngakhala ng'ombe ya munthu yapha ng'ombe ya munthu unango, awiriwa athema kugulisa ng'ombe yamoyoyo mbagawana kobirizo; iwo athema pontho kugawana sasawa nyama yakufa ile.

³⁶Mbwenye ngakhala pikhadziwika kuti ng'ombeyo ikhali na chisimo chakudima, mwenechiro mbakhonda kuifungira m'thanga, iye athema kupagali ng'ombe inango yamoyo, mbwenye iye athema kukwata nyama yakufa iye.