Read cisena KUBULUKA 22 Bible Online

KUBULUKA 22 - cisena bible

KUBULUKA 22

¹“Ngakhala munthu anaba ng'ombe, penu bira mbampha penu kumgulisa, iye athema kupagali ng'ombe zishanu pa ng'ombe ibodzi, pontho mabira mashanu pa bira mbodzi.

²Iye athema kupagali pinthu pidaba iye pile. Ngakhala iye nkhabe pinthu pyakuti anakwanisa kupagali napyo, iye athema kuguliswa ninga bitchu kupagali pinthu pyaba iye pile. Ngakhala nyama yakubiwayo ndi ng'ombe, bulu, penu bira yagumanwa yamoyo m'manja mwache, iye athema kupagali ng'ombe ziwiri pa ng'ombe ibodzi. “Ngakhala mbava aphatwa akuswa nyumba na mosiku mbaphiwa, nyakumphayo hadadawe tayu. Mbwenye ngakhala pinachitika na masikati nyakumphayo adawa.

⁵“Ngakhala munthu anadyesa pifuyo pyache m'munda, penu m'munda wamfesa mbazitayika pyazo mbapidya mbewu[19] zonsene za m'munda mwa mwanzache, iye athema kupagali nyakudyerwa pyacheyo.

⁶“Ngakhala munthu anagasa moto mbuphata tsanga, tenepo motowo ungatanthawira m'munda mwa mwanzache mbapisa mbewu zakuimira, penu zakufa kale, nyakugasa motoyo athema kupagali pyakuvungikapyo.

⁷“Ngakhala munthu anatawira kukoya kobiri za munthu unango, penu pinthu pyakufunika mbapibiwa m'nyumba mwache, mbava angaphatwa athema kupagali kawiri.

⁸Mbwenye mbava angakhonda phatwa, nyakukoya pinthuyo athema kudzeswa kumbuto yakupembedzera Mulungu, tenepo kweneko iye athema kudumbira kuti hadabe ndiye tayu pinthu pya mwanzacheyo.

⁹“Ngakhala pana mseru wakukanganirana pinthu, penu ng'ombe, mabulu, mabira, chakuvala, penu mitolo inango ene yakutayika, anthu awiri athema kudzeswa kumbuto yakupembedzera Mulungu. Munthu analongwa na Mulungu miseru kuti adawa, weneyo athema kupagali mwanzacheyo kawiri.

¹⁰“Ngakhala munthu anatawira kukoya bulu, ng'ombe, bira, penu chifuyo chinango cha munthu unango, tenepo chifuyocho mbachifa, penu kukuwazika, penu chabiwa, mbapasowa umboni,

¹¹munthuyo athema kwenda kumbuto yakupembedzera MBUYA kadumbira kuti iye hadabe chifuyo cha mwanzacheyo tayu. Ngakhala chifuyocho nee chidabiwa tayu, mwenechiro athema kutawira, tenepo mwanzacheyo aleke kumpagali;

¹²mbwenye ngakhala chifuyocho chidabiwa, munthuyo athema kumpagali mwenechiro.

¹³Ngakhala chidachita kuphiwa na chirombo, munthuyo athema kudzesa manyenyeswa kuna mwenechiro ninga umboni; tenepo iye nkhabe thema pagali chinthu chakudyiwa na chirombo tayu.

¹⁴“Ngakhala unabwereka chifuyo kuna munthu unango mbichikuwazika, penu kufa, mwenemo mwenechiro nkhabepo, munthuyo athema kupagali.

¹⁵Mbwenye ngakhala penepyo pinachitika mwenechiro mbali penepo, munthuyo nkhabe thema kupagali tayu. Ngakhala chifuyocho chidachitwa kubwerekwa kuvungika kwa chifuyocho kwakwana na kobiri zidapereka iye pakubwereka.

¹⁶“Ngakhala munthu ananyengerera mbagona na mkazi okhonda dziwa mamuna, ule hadavunzirwe tayu, iye athema kupagali chuma, pontho akhaleletu mkazache.

¹⁷Mbwenye ngakhala babache anakhonda kuti iye ansembe, iye athema kupagali babache chuma chakuthemerana na mwali.

¹⁸“Iphani akazi onsene akuchita pyamatsenga.

¹⁹“Iphani munthu onsene anachita pyakuzuda na nyama.

²⁰“Iphani munthu onsene anapereka nsembe kuna milungu inango, kupambula kuna ine ene MBUYA.

²¹“Lekani vuya, penu kupondereza mlendo; kumbukani kuti imwe mukhalimbo alendo m'dziko ya Iguputo.

²²Lekani dyera nkope-kope mamfelwa, penu mwana masiye na mbodzi ene.

²³Mungachita tenepo, ine MBUYA, ndinaava angalira kuna ine kuti ndiaphedze,

²⁴tenepo ndinazhangali mbandikuphani pankhondo. Akazanu anasanduka amamfelwa, ananumbo anakhala amasiye.

²⁵“Ngakhala mwafiyalisa kobiri anthu anga akutcherenga, lekani khala ninga nyakufiyalisa kobiri mbamumpanga kuti apagali na pinango pyakuthimizira penepo.

²⁶Ngakhala munakwata pinyolo chakufinika cha munthu unango mwathema kumbwezera dzuwa mbidzati thobila,

²⁷thangwi chakufinika chache ntchokha chenecho basi kuti akhumbirwe. Iye anagonera papi? Iye angalira kuna ine kuti ndimphedze, ndinamva, thangwi ndine wansisi.

²⁸“Lekani shola Mulungu,[20] pontho lekani temberera akadamu a anthu anu.

²⁹“Perekani kuna ine nsembe za mbewu, vinyu na nsapo zaolivi zanu pandzidzi wache wakuthema. “Perekani kuna ine ananu achimuna autombo.

³⁰Perekani kuna ine ana autombo a pifuyo pyanu, ng'ombe na mabira. Mwana wautombo wachimuna angabalwa athema kukhala na mache nsiku zinomwe, mbaperekwa nsembe kuna ine nsiku yachisere.

³¹“Imwe ndimwe anthu anga, tenepo lekani kudya nyama yakuphiwa na chirombo; mbwenye muipasire anambwa.