Read cisena KUBULUKA 24 Bible Online

KUBULUKA 24 - cisena bible

KUBULUKA 24

¹MBUYA adalonga kuna Mose mbati, “Kwira paphiri pano kuna ine, iwe na Aroni, Nadabu, Abihu pontho na akadamu a Aisraele makumanomwe, pontho ndzidzi una imwe kutali pang'ono na phiriyi mulambe pansi kundipembedza.

²Iwe wekha, nee na anango tayu, wathema kudza chifupi na ine. Anthu aleke na kukwira kwene paphiri pano.”

³Mose adenda kapanga anthu pyonsene pidalonga MBUYA na matongero onsene, tenepo anthu onsene adatawira pabodzi pene mbati, “Tinachita pyonsene pyalonga MBUYA.”

⁴Mose adalemba matongero onsene a MBUYA. Mangwana mwache na machibese iye adamanga guwa mbaimirisa miyala khumi na miwiri kuimirira madzinza khumi na awiri a Aisraele.

⁵Kubuluka penepo iye adatuma aphale, tenepo iwo adapereka nsembe zakupyerera kuna MBUYA mbapereka nsembe ng'ombe zinango kukhala nsembe yachiphatizano.

⁶Mose adakwata theka ya chiropa cha nyama mbachiikha m'ndilo mbakwata theka inango mbachiwazira paguwa yansembe.

⁷Tenepo iye adakwata bukhu ya chiverano, mudalembwa matongero a Mulungu mule mbaiwerenga mwakugaluza fala kuna anthu. Iwo adalonga mbati, “Tinamvera MBUYA pontho tinachita pyonsene pyatipanga iye.”

⁸Mose adakwata chiropa chikhali m'ndilo chile mbachiwazira pana anthu. Iye adalonga mbati, “Chenechi ntchiropa chakutsikimiza chiverano, chile chidachita MBUYA na imwe ndzidzi udakupasani iye matongero onsenewa.”

⁹Mose, Aroni, Nadabu, Abihu na akadamu makumanomwe a Aisraele ale adakwira paphiri

¹⁰mbaona Mulungu wa Israele. Pansi pa manyalo ache pakhaoneka ninga njira yamiyala yakudula ya safire yachoza ninga thambo.

¹¹Mulungu hadathuswe akadamu enewa tayu; iwo adamuona Mulungu, natenepo adadya na kumwa.

¹²MBUYA adalonga kuna Mose mbati, “Kwira paphiri pano kuna ine. Ndzidzi una iwe pano, ndinakupasa pyakulemberapo piwiri pyamiyala pale palembwa mwambo na matongero onsene pyalembera ine anthu kuti uafunzise napyo.”

¹³Mose adalamuka mbaenda na Yoswa, nyakumphedzerache, tenepo Mose adatoma[22] kukwira paphiri ya Mulungu ile.

¹⁴Mose adalonga kuna akadamu ale mbati, “Tidikhireni pamsasa pano kufikirana ife tibwerere. Aroni na Huri ali namwe pabodzi pano; tenepo munthu ana mseruyo anakwanisa kwenda kuna iwo.”

¹⁵Mose adakwira paphiri ya Sinai, tenepo makole adaigudumira.

¹⁶Demelero ya MBUYA idadza paphiripo. Kuna Aisraele demelero ikhaoneka ninga moto wakugaka paphiri. Nsiku zitanthatu makole ale adabisa phiri ile, tenepo pansiku yachinomwe MBUYA adachemera Mose kubulukira m'makole mule.

¹⁸Mose adathimiza kukwira phiri m'makole mule kweneko iye adakhalako nsiku makumanayi mosiku na masikati.