Read cisena KUBULUKA 25 Bible Online

KUBULUKA 25 - cisena bible

KUBULUKA 25

¹MBUYA adalonga kuna Mose mbati,

²“Panga Aisraele adze kuna ine na pyakupereka. Tambira chakupereka chonsene chinakhumba munthu kundipasacho.

³Pyakupereka penepi pyathema kukhala pya golidi, siliva na nkuwa;

⁴usalu wachoza, msuzi wanyemba na wakufira; nguwo yakufewa; nguwo yakusasanywa na ubweya wa mbuzi;

⁵nthembe za mabira amuna zakuikhwa tinta yakufira; nthembe zakufewa; matabwa akesha;

⁶mafuta a m'nyale; pyakununkhira pya mafuta akudzoza nawo na pyakufukiza pyakununkhira;

⁷miyala ya onikisi na miyala yakudula inango yakuthemesera nguwo ya efodi pya Nyansembe Wamkulu, pontho na chapagangafuwa chache.

⁸Anthu athema kundisasanyira Chikhumbi chakupambulika, towera ine ndikhale pakati pawo.

⁹Muchisasanye na kuikha pyonsene pya mwenemo malingana na munafuna kukuoneserani ine.

¹⁰“Sasanya bokosi na matabwa akesha, ulaphiache ukhale khono ibodzi na dzanja, umimbache ukhale wakulapha kufika ntchafu, pontho chengo chache[23] chikhale chakulapha kufika ntchafu.

¹¹Uikukutize na golidi chadi-chadi kuzungulira m'bwalo na kunja kwene, pontho muikhe chigundiro chagolidi kuizungulira.

¹²Sasanya mphete zinayi zagolidi zakuthukulira, mbuzifeke kumiyendo yache minayi mphete ziwiri kukhundu zonsene ziwiri.

¹³Sasanya miti miwiri yakuthukulira yakesha, pontho mbuikukutize na golidi,

¹⁴pontho uipitise mphete kukhundu zonsene ziwiri za bokosi.

¹⁵Mitiyo yathema kukhala m'mphetemo, iyo yathema nee kubuluswave m'mphetemo tayu.

¹⁶Tenepo ikhani m'bokosimo pyakulemberapo piwiri pyamiyala pinafuna ine kukupasa pile, pale palembwa matongero.

¹⁷“Sasanya mphampha yagolidi chadi-chadi, ulaphiache ukhale khono ibodzi na dzanja, pontho umimbache ukhale wakulapha kufika ntchafu.[24]

¹⁸Sasanya pyakulengwa piwiri pyakukhala na maphaphido pyagolidi wakuchita kufulwa na nyundo,

¹⁹mbodzi kukhundu ibodzi, unangombo kukhundu inango. Pisasanyeni kuti makhundu mawiri akumalisirawo akhale phindi ibodzi ene na mphampha.

²⁰Pyakulengwa pyakukhala na maphaphidopyo piyang'anisane, pontho pifuthule maphaphido awo kuphimbira mphamphayo.

²¹Ikhani m'bwalo mwa bokosimo pyakulemberapo piwiri pyamiyala mbamuigudumire na mphampha.

²²Ine ndinagumana nawe penepo, pontho kubulukira pa mphampha pakati pa pyakulengwa piwiri pyakukhala na maphaphido ndinakupasa matongero anga onsene kuti uapange Aisraele.

²³“Sasanya thebulu na matabwa akesha, ulaphiache ukhale khono ibodzi, umimbache ukhale kati ya khono, pontho chengo chache[25] chikhale chakufika ntchafu.

²⁴Uikukutize na golidi chadi-chadi, pontho uikhe chigundiro chagolidi m'nkhomo zache kuzungulira thebulu yonsene.

²⁵Sasanya chigundiro chakukhala na magulupiya, chakulapha ninga chala chapakati cha m'manja,[26] kuzungulira thebuluyo na kuikha mthimba wagolidi kuzungulira chigundirocho.

²⁶Sasanya mphete zinayi zakuthukulira zagolidi mbuziikhe kunkhomo zinayi kumiyendo.

²⁷Mphete zakuphatisa miti yakuthukulira thebuluyo zathema kuikhwa chifupi na chigundiro cha magulupiya.

²⁸Sasanya miti yakuithukulira yakesha, pontho uikukutize na golidi.

²⁹Sasanya mapalato, na piwaya pyakufukizira pyakununkhira, pontho pitomba na ndilo kuti piphatiswe basa kupereka nsembe ya chakumwa. Pyonsenepi pyathema kusasanywa na golidi chadi-chadi.

³⁰Thebulu yathema kuikhwa kutsogolo kwa Bokosi ya Chiverano, tenepo pathebulu ndzidzi onsene pathema kukhala mkate wakupambulika wakuperekwa kuna ine.

³¹“Sasanya chakuikhirapo nyale chagolidi chadi-chadi. Thako na manungo ache pikhale golidi wakufulwa na nyundo, maluwache akuthemesera nawo, kuthimizapo mphukira na maluwa asasanye phindi ibodzi ene na chakuikhirapo nyale.

³²Nthambi zitanthatu zathema kuphutchukira khundu zache, nthambi zitatu kukhundu ibodzi, nthambi zinango zitatu kukhundu inangoyo.

³³Nthambi zonsene zitanthatu zathema kukhala na maluwa matatu akuthemesera akuoneka ninga maluwa a muti wamfula akukhala na mphukira na maluwa.

³⁴Manungo a chakuikhirapo nyale athema kukhala na maluwa akuthemesera manayi akuoneka ninga maluwa a muti wamfula akukhala na mphukira na maluwa.

³⁵Pathema kukhala mphukira ibodzi pansi pa nthambi ziwiri zonsene.

³⁶Mphukirazo, nthambi zache, pontho chakuikhirapo nyale pyathema kukhala phindi ibodzi pyagolidi chadi-chadi wakuchitwa kufulwa.

³⁷Sasanya nyale zinomwe pachakuikhirapo nyale chibodzi, pontho zigaseni towera zimwinikire kutsogoloko.

³⁸Sasanya pyakukwizira tsakalache na pyakuwolera dotha pyache pyagolidi chadi-chadi.

³⁹Phatisa basa golidi chadi-chadi wakulemera makilogramu makumatatu na mashanu kusasanyira chakuikhirapo nyalecho na pinthu pyache pyonsene.

⁴⁰Onesesa kuti pyonsene upisasanye malingana na mule mwakuonesera ine paphiri pano.